Izikiẹl 28:1-26
28 Ẹme Jihova ọ tẹ wariẹ bru omẹ ze, inọ:
2 “Ọmọ ohwo, ta kẹ osu Taya nọ, ‘Enẹ Jihova Olori nọ Ọ Mai Kpehru na ọ ta:
“Fikinọ omorro o ruọ udu ra no,+ whọ ruabọhọ be ta nọ, ‘Mẹ yọ ọghẹnẹ.
Mẹ keria agbara-uvie ọghẹnẹ jọ evaọ udevie abade na.’+
Rekọ ohwo-akpọ gheghe whọ rrọ, orọnikọ ọghẹnẹ hẹ,Dede nọ whọ be jọ udu ra roro nọ ọghẹnẹ whọ rrọ.
3 Rri! Who wo areghẹ vi Daniẹl.+
A ko eware idhere evo no owhẹ hẹ.
4 Whọ rehọ areghẹ ra gbe orimuo ra ru omara fe no,Yọ whọ ruabọhọ bi koko igoru gbe isiliva họ eria ekwakwa-aghae ra.+
5 Onaa ekiọthuọ ra u ru owhẹ wo ekwakwa efe buobu no,+Omorro o ruọ udu ra fiki ekwakwa efe ra.”’
6 “‘Fikiere enẹ Jihova Olori nọ Ọ Mai Kpehru na ọ ta:
“Fikinọ whọ be jọ udu ra roro nọ whẹ yọ ọghẹnẹ,
7 Mẹ be rehọ ahwo erẹwho efa ze te họre owhẹ, enọ e mae geva evaọ usu erẹwho na,+A ti yolo egbọdọ rai ze rọsuọ erru areghẹ ra,A vẹ te raha erru ra nọ ọ vọ avọ oruaro na no.+
8 A te rehọ owhẹ ziọ obọ ọgọdọ* na,Yọ who ti whu uwhu oja evaọ udevie abade ọraragha na.+
9 Kọ whọ gbẹ te ta kẹ ọnọ o bi kpe owhẹ nọ, ‘Mẹ yọ ọghẹnẹ’?
Ohwo-akpọ gheghe whọ te jọ evaọ obọ enọ e be raha owhẹ na, orọnikọ ọghẹnẹ hẹ.”’
10 ‘Who ti whu wọhọ enọ a yawo ho evaọ obọ ahwo erẹwho efa,Keme mẹ omamẹ mẹ ta riẹ no,’ ere Jihova Olori nọ Ọ Mai Kpehru na ọ ta.”
11 Ẹme Jihova ọ tẹ wariẹ bru omẹ ze, inọ:
12 “Ọmọ ohwo, so ole uweri jọ kpahe ovie Taya, re whọ ta kẹe nọ, ‘Enẹ Jihova Olori nọ Ọ Mai Kpehru na ọ ta:
“Whọ jọ oriruo ẹgbagba,*Whọ vọ avọ areghẹ+ je wo erru gaga.+
13 Whọ jọ evaọ Idẹn, ọgbọ Ọghẹnẹ.
A rehọ oghẹrẹ itho eghaghae kpobi whẹ erru họ owhẹ oma—Rubi, topaz, gbe jaspa;krisolaet, oniks, gbe jed; safaya, tọkwọes,+ gbe ẹmerald;Igoru a ro ru eware nọ a ruẹrẹ e rai họ gbe enọ a thọrọ e rai họ.
Ẹdẹ nọ a ma owhẹ a ro ru ai.
14 Mẹ rehọ owhẹ mu chẹrub nọ a wholo nọ o re ruru.
Whọ jọ ugbehru ọrẹri Ọghẹnẹ,+ whọ jẹ nya evaọ udevie itho nọ e be ware erae.
15 Whọ kare afuẹwẹ evaọ idhere ra anwọ ẹdẹ nọ a rọ ma owhẹBẹsenọ umuomu o rọ ruọ owhẹ eva.+
16 Fiki ekiọthuọ obuobu ra,+Ozighi ọ tẹ vọ owhẹ oma, who te mu uzi họ ẹraha.+
Fikiere me ti gbolo owhẹ kufiẹ no ugbehru Ọghẹnẹ wọhọ ọnọ a zue oma jẹ raha owhẹ no+Udevie itho nọ e be ware erae na, O chẹrub nọ o re ruru na.
17 Omorro o ruọ udu ra fiki erru ra.+
Whọ raha areghẹ ra fiki oruaro erru ra.+
Me ti gbolo owhẹ fihọ otọ.+
Me ti ru owhẹ fihọ oware nọ ivie i re rri ughe riẹ.
18 Who zue eria aruẹri ra no fiki abe-ọriọ ologbo ra gbe ekiọthuọ ewhariọ ra.
Me ti ru erae muhọ ẹto evaọ eva ra, yọ erae na e te mahe owhẹ muotọ.+
Me ti ru owhẹ to zihe ruọ enwo evaọ otọakpọ na evaọ iraro ahwo kpobi nọ a bi rri owhẹ.
19 Ahwo kpobi nọ a riẹ owhẹ evaọ udevie ahwo na a te tẹrovi owhẹ avọ igbunu.+
Urere ra o te ze idudhe jẹ jọ yoyoma,Yọ whọ gbẹ te jọ bẹdẹ bẹdẹ hẹ.”’”+
20 Ẹme Jihova ọ tẹ wariẹ bru omẹ ze, inọ:
21 “Ọmọ ohwo, rẹriẹ ovao ku Saedọn+ re whọ ruẹaro oware nọ o te via kẹe.
22 Whọ rẹ ta nọ, ‘Enẹ Jihova Olori nọ Ọ Mai Kpehru na ọ ta:
“Rri, mẹ te rọsuọ owhẹ, O Saedọn, a vẹ te kẹ omẹ oruaro evaọ eva ra;Ahwo a vẹ te riẹ nọ mẹ họ Jihova okenọ me ti ru ei oware nọ me bruoziẹ riẹ, je dhesẹ evaọ eva riẹ nọ mẹ yọ ọrẹri.
23 Me ti vi okpẹyao nọ o re vo ruọ eva riẹ, azẹ o ve ti su evaọ iyẹrẹ riẹ.
A ti kpe ahwo evaọ eva riẹ okenọ ọgbọdọ na ọ te rọsuọ ẹe evaọ ofẹ kpobi;A vẹ te riẹ nọ mẹ họ Jihova.+
24 “‘“Kẹsena ekpajẹ iyoma gbe idhigbo edada e gbẹ te wariẹ uwou Izrẹl họ họ,+ koyehọ enọ e be rehọ ae jijehwẹ; ahwo a vẹ te riẹ nọ mẹ họ Jihova Olori nọ Ọ Mai Kpehru na.”’
25 “‘Enẹ Jihova Olori nọ Ọ Mai Kpehru na ọ ta: “Evaọ okenọ mẹ te wariẹ koko uwou Izrẹl họ no udevie ahwo nọ a vaha e rai kpohọ ze,+ erẹwho na e te ruẹ nọ mẹ yọ ọrẹri evaọ udevie rai.+ A vẹ te rria ẹkwotọ rai+ nọ mẹ kẹ Jekọp odibo mẹ.+
26 A te rria eva riẹ avọ omofọwẹ,+ a vẹ te bọ iwou jẹ kọ egbọ evaene,+ yọ a te rria avọ omofọwẹ evaọ okenọ mẹ te rọ uye te ahwo kpobi nọ a wariẹ e rai họ nọ a jẹ rehọ ae jijehwẹ;+ a vẹ te riẹ nọ mẹ họ Jihova Ọghẹnẹ rai.”’”
