Izikiẹl 29:1-21
29 Evaọ ukpe avọ ikpe, evaọ amara avọ ikpe, evaọ ẹdẹ avọ ikpegbivẹ amara na, ẹme Jihova o te bru omẹ ze, inọ:
2 “Ọmọ ohwo, rẹriẹ ovao ku Fẹro ovie Ijipti, re whọ ruẹaro oware nọ o te via kẹe avọ Ijipti soso.+
3 Ta eme nana: ‘Enẹ Jihova Olori nọ Ọ Mai Kpehru na ọ ta:
“Rri, mẹ te rọsuọ owhẹ, O Fẹro ovie Ijipti,+Arao ologbo obọ abade nọ ọ rrọ iko-ame Naele* riẹ,+Ọnọ ọ ta nọ, ‘Mẹ me wo Ethẹ Naele mẹ.
Me ru rie kẹ omamẹ.’+
4 Rekọ mẹ te jẹ eghọlọ họ agba ra, me ve ru iyei nọ e rrọ Naele ra tamu egbẹ ra.
Mẹ te rehọ owhẹ no eva Naele ra ze avọ iyei Naele na kpobi nọ e tamu egbẹ ra.
5 Me ti gbabọkẹ owhẹ evaọ udhude na, te owhẹ te iyei Naele ra kpobi.
Who ti kie fihọ otọ evaọ ẹwọ na, yọ a ti koko owhẹ họ hayo kwa owhẹ koko ho.+
Mẹ te rehọ owhẹ kẹ erao ijihẹ otọakpọ na gbe evra obọ ehru na re a re owhẹ no.+
6 Kẹsena ahwo kpobi nọ a be rria Ijipti a vẹ te riẹ nọ mẹ họ Jihova,Keme obọ nọ a fihọ kẹ uwou Izrẹl o vrẹ orọ ẹbe ọyaya ha.*+
7 Okenọ a kru owhẹ obọ, whọ tẹ whọlọ fihọ otọ,Who te ru nọ ẹkoko rai ọ rọ bẹre.
Okenọ a roma rẹrẹ owhẹ, who te wiri no,Who te ru nọ awọ* rai i je ro nuhu zighi zighi.”+
8 “‘Fikiere enẹ Jihova Olori nọ Ọ Mai Kpehru na ọ ta: “Rri, mẹ be rehọ ọgbọdọ ze rọ họre owhẹ,+ yọ me ti kpe te ohwo te arao no eva ra.
9 Ẹkwotọ Ijipti o ti zihe ruọ oria ofofe nọ a raha no;+ a vẹ te riẹ nọ mẹ họ Jihova, keme whọ* ta nọ, ‘Mẹ me wo Ethẹ Naele na; mẹ họ ọnọ o ru rie.’+
10 Fikiere mẹ te rọsuọ owhẹ avọ Naele ra na, me ti ru ẹkwotọ Ijipti fihọ oria nọ a raha no nọ o rrọ yaya, otọ nọ o raha no nọ o rrọ ofofe,+ no Migdọl+ rite Sayini,+ je rite obọ uwhru Ẹtiopia.
11 Ohwo hayo erao e te rọ owọ nya eva riẹ vrẹ hẹ,+ yọ a te rriae he evaọ ikpe udhuvẹ.
12 Me ti ru ẹkwotọ Ijipti fihọ ẹkwotọ nọ ọ mae rrọ ofofe, yọ ikpewho riẹ e te jọ ikpewho nọ e mae rrọ ofofe evaọ ikpe udhuvẹ;+ mẹ te vaha ahwo Ijipti fihọ udevie erẹwho na jẹ vaha ae fihọ udevie ekwotọ na.”+
13 “‘Keme enẹ Jihova Olori nọ Ọ Mai Kpehru na ọ ta: “Nọ ikpe udhuvẹ e tẹ vrẹ no, me ti koko ahwo Ijipti na họ no obonọ a vaha kpohọ ze;+
14 mẹ te rehọ ahwo Ijipti nọ a mu kpohọ igbo zihe kpohọ ẹkwotọ Patrọs,+ kpohọ ẹkwotọ rai nọ a no ze, a vẹ te jọ obei zihe ruọ uvie nọ u te oware ovo ho.
15 Ijipti o ti kpotọ vi ekwotọ-ivie edekọ na, yọ o gbe ti su erẹwho edekọ na ha,+ me ti ru ai kawo te epanọ a gbẹ te sai ro su erẹwho efa ha.+
16 O gbẹ te jọ oware nọ o be kẹ uwou Izrẹl udu ofa vievie he,+ ukpoye o te kareghẹhọ ae ọvo inọ a ru thọ nọ a rọ dhẹ bru ahwo Ijipti kẹ obufihọ. A vẹ te riẹ nọ mẹ họ Jihova Olori nọ Ọ Mai Kpehru na.”’”
17 Whaọ evaọ ukpe avọ udhegbihrẹ, evaọ amara ọsosuọ, evaọ ẹdẹ ọsosuọ amara na, ẹme Jihova o te bru omẹ ze, inọ:
18 “Ọmọ ohwo, Nebukadneza*+ ovie Babilọn ọ rehọ ogbaẹmo riẹ ru iruo gaga rọsuọ Taya.+ Uzou kpobi o tẹ fa no, ẹkoko kpobi ọ tẹ whra no. Rekọ osohwa ovo u te ọyomariẹ avọ ogbaẹmo riẹ obọ rọkẹ iruo nọ a ru evaọ Taya ha.
19 “Fikiere enẹ Jihova Olori nọ Ọ Mai Kpehru na ọ ta, ‘Rri, mẹ be rehọ ẹkwotọ Ijipti kẹ Nebukadneza* ovie Babilọn,+ ọ te wọ ekwakwa efe riẹ vrẹ jẹ kwa egbo-ẹmo gbe eware buobu mi ei; o vẹ te jọ osa nọ a hwa ogbaẹmo riẹ.’
20 “‘Mẹ te kẹe ẹkwotọ Ijipti re o jọ osa iruo nọ o ru rọ họre iẹe,* keme mẹ a ru rie kẹ,’+ ere Jihova Olori nọ Ọ Mai Kpehru na ọ ta.
21 “Evaọ ẹdẹ yena, me ti ru uzei jọ ta ze rọkẹ uwou Izrẹl,*+ yọ mẹ te kẹ owhẹ uvẹ ta ẹme evaọ udevie rai; a vẹ te riẹ nọ mẹ họ Jihova.”
Eme-Obotọ
^ “Naele” nọ a jọ etenẹ gbe obotọ fodẹ na e be ta kpahe ethẹ na gbe iko-ame nọ e rrọ rọkẹ ekakọ.
^ Evaọ Hibru, “ukpoko ho.”
^ Evaọ Hibru, “igbeku.”
^ Evaọ Hibru, “ọ.”
^ Evaọ Hibru, “Nebukadreza,” oghẹrẹ ofa nọ a kere i rie.
^ Evaọ Hibru, “Nebukadreza,” oghẹrẹ ofa nọ a kere i rie.
^ Koyehọ, rọsuọ Taya.
^ Hayo “ru uwou Izrẹl wo ẹgba.”
