Izikiẹl 30:1-26
30 Ẹme Jihova ọ tẹ wariẹ bru omẹ ze, inọ:
2 “Ọmọ ohwo, ruẹaro jẹ ta nọ, ‘Enẹ Jihova Olori nọ Ọ Mai Kpehru na ọ ta:
“Kuenu oviẹ, ‘O, ẹdẹ na ọ be tha!’
3 Keme ẹdẹ na ọ kẹle no, ẹhẹ, ẹdẹ Jihova ọ kẹle no.+
O te jọ ẹdẹ ẹgho,+ oke nọ a fihọ kẹ erẹwho.+
4 Ọgbọdọ jọ ọ te rọsuọ Ijipti, ozọ u ti mu Ẹtiopia gaga evaọ okenọ a ti kpe ahwo fihọ otọ evaọ Ijipti;A kwa ekwakwa efe riẹ no, a te je kporo etọhotọ riẹ no.+
5 Ọgbọdọ a ti ro kpe ahwo na kpobi,Ahwo Ẹtiopia,+ Put,+ Lọd, gbe ahwo erẹwho sa-sa na kpobi,*Ahwo Kub, jegbe emezae ẹkwotọ ọvọ na.”’*
6 Enẹ Jihova ọ ta:
‘Enọ e be tha Ijipti uke i ti whu re,Yọ a te rọ ogaga riẹ nọ u bi mu ei na ziọ otọ.’+
“‘A te rọ ọgbọdọ kpe ai evaọ ẹkwotọ na, no Migdọl+ rite Sayini,’+ ere Jihova Olori nọ Ọ Mai Kpehru na ọ ta.
7 ‘A ti ru ai họ ekwotọ nọ e mae rrọ ofofe, yọ ikpewho obọriẹ i ti zihe ruọ ikpewho nọ a mae raha.+
8 A vẹ te riẹ nọ mẹ họ Jihova evaọ okenọ me ti tu erae họ Ijipti, jẹ te guọghọ enọ e be thae uke kpobi no.
9 Evaọ ẹdẹ yena, mẹ te rehọ ekọ ilogbo vi enyukọ re a nyai ru Ẹtiopia nọ o fievahọ omobọ riẹ na nuhu; ozọ u ti kpe ai no evaọ ẹdẹ nọ o bi bru Ijipti ze na, keme o te seba ẹtha ha.’
10 “Enẹ Jihova Olori nọ Ọ Mai Kpehru na ọ ta: ‘Mẹ te rọ ẹkwoma obọ Nebukadneza* ovie Babilọn rehọ ogbotu ahwo Ijipti na te oba.+
11 A te rehọ iẹe avọ egbaẹmo riẹ ze, koyehọ enọ e mae geva evaọ usu erẹwho na,+ re a raha ẹkwotọ na. A ti yolo egbọdọ rai ze rọsuọ Ijipti, a ve kpe ahwo vọ ẹkwotọ na.+
12 Me ti zihe iko-ame Naele+ ruọ otọ oyaya, mẹ te zẹ ẹkwotọ na kẹ ezae imuomu. Mẹ te rehọ obọ ahwo erẹwho efa ru ẹkwotọ na gbe oware kpobi nọ o rrọ eva riẹ fihọ ofofe.+ Mẹ omamẹ, Jihova, mẹ ta riẹ no.’
13 “Enẹ Jihova Olori nọ Ọ Mai Kpehru na ọ ta: ‘Mẹ te jẹ raha emedhọ etọtọ* na no, jẹ te raha eghẹnẹ Nọf* nọ i fioka ha na no.+ Okpohwo-esuo* o gbe ti no ẹkwotọ Ijipti ze ofa ha, yọ me ti ru ozọ jọ ẹkwotọ Ijipti.+
14 Me ti ru Patrọs fihọ ofofe,+ me ve tu erae họ Zoan je ru No*+ oware nọ me bruoziẹ riẹ kpahe iẹe.
15 Me ti ku ofu ọgaga mẹ ku Sin, oria omofọwẹ Ijipti, mẹ vẹ te raha ahwo nọ a rrọ No.
16 Me ti tu erae họ Ijipti; idudu e te ruọ Sin oma, a ti kporo ugbẹhẹ No ruọ eva, yọ a te họre Nọf* evaọ uvo kekeke!
17 A te rọ ọgbọdọ kpe izoge emezae Ọn* avọ Paebisẹt, a ve ti mu ahwo ikpewho rai kpohọ igbo.
18 Ẹdẹ na o ti muebi evaọ Tehafnihis okenọ me ti wiri ekpọ owhowha Ijipti evaọ etẹe.+ Ogaga riẹ nọ u bi mu ei na u ti te oba,+ ẹgho o ti ruru iei, a ve ti mu ahwo ewho riẹ kpohọ igbo.+
19 Me ti ru Ijipti oware nọ me bruoziẹ riẹ kpahe iẹe, a vẹ te riẹ nọ mẹ họ Jihova.’”
20 Evaọ ukpe avọ ikpegbọvo, evaọ amara ọsosuọ, evaọ ẹdẹ avọ ihrẹ amara na, ẹme Jihova o te bru omẹ ze, inọ:
21 “Ọmọ ohwo, me wiri ugbobọ Fẹro ovie Ijipti no; a te gbae re a siwi ei kpo ho, hayo rọ omohọ gbae re o sae ga te epanọ u re ro kru ọgbọdọ họ.”
22 “Fikiere enẹ Jihova Olori nọ Ọ Mai Kpehru na ọ ta: ‘Rri, mẹ te rọsuọ Fẹro ovie Ijipti,+ me ve wiri igbabọ riẹ no, te ọgaga na te onọ u wiri no na,+ me ve ru ọgbọdọ na kie no obọ riẹ.+
23 Kẹsena mẹ vẹ te vaha ahwo Ijipti fihọ udevie erẹwho na jẹ vaha ae fihọ udevie ekwotọ na.+
24 Me ti ru igbabọ ovie Babilọn jọ gaga,*+ je fi ọgbọdọ mẹ họ obọ riẹ,+ me ve ti wiri igbabọ Fẹro, o ve ti dimẹ gaga wọhọ ohwo nọ o bi whu evaọ aro riẹ.*
25 Me ti ru igbabọ ovie Babilọn jọ gaga, rekọ igbabọ Fẹro i ti kie fihọ otọ yọlọ; a vẹ te riẹ nọ mẹ họ Jihova evaọ okenọ me ti fi ọgbọdọ mẹ họ obọ ovie Babilọn, ọ vẹ te rehọ iẹe họre ẹkwotọ Ijipti.+
26 Mẹ te vaha ahwo Ijipti fihọ udevie erẹwho na jẹ vaha ae fihọ udevie ekwotọ na,+ a vẹ te riẹ nọ mẹ họ Jihova.’”
Eme-Obotọ
^ Hayo “ahwo kpobi nọ a no erẹwho efa ze.”
^ Ẹsejọhọ o be ta kpahe ahwo Izrẹl nọ a mu usu kugbe Ijipti.
^ Evaọ Hibru, “Nebukadreza,” oghẹrẹ ofa nọ a kere i rie.
^ Hayo “Osu.”
^ Hayo “Mẹmfis.”
^ Ẹme Hibru nọ a fa “emedhọ etọtọ” na avọ ẹme nọ a fa “isọ arao” e rẹ sai wo otofa ovona, yọ a rẹ rehọ iẹe ta kpahe oware nọ u fioka ha.
^ Koyehọ, Tebẹs.
^ Hayo “Mẹmfis.”
^ Koyehọ, Hiliopolis.
^ Hayo “Me ti ru ovie Babilọn wo ogaga vi epaọ anwẹdẹ.”
^ Koyehọ, evaọ aro ovie Babilọn.
