Izikiẹl 32:1-32
32 Evaọ ukpe avọ ikpegbivẹ, evaọ amara avọ ikpegbivẹ, evaọ ẹdẹ ọsosuọ amara na, ẹme Jihova ọ tẹ wariẹ bru omẹ ze, inọ:
2 “Ọmọ ohwo, so ole uweri kpahe Fẹro ovie Ijipti, re whọ ta kẹe nọ,‘Whọ jọ wọhọ okpohrokpo ọgaga* ọrọ erẹwho na,Rekọ a ru owhẹ fọ rirẹ no.
Whọ jọ wọhọ arao ologbo obọ abade,+ whọ jẹ tehe kpenẹ avọ enẹ evaọ ithẹ ra,Whọ jẹ rehọ awọ ra thihi ọloho vọ ame na je gbudie ithẹ na* ku.’
3 Enẹ Jihova Olori nọ Ọ Mai Kpehru na ọ ta:
‘Mẹ te rehọ ogbotu erẹwho buobu gbolo ẹriri mẹ fihọ owhẹ,A vẹ te rọ osakrosa mẹ si owhẹ fihọ okpa.
4 Mẹ te nyasiọ owhẹ ba okpa na;Me ti gbolo owhẹ fihọ ẹwọ ovevẹ na.
Me ti ru evra obọ ehru na kpobi kiemu owhẹ,Mẹ te rọ owhẹ kuọ erao ijihẹ otọakpọ na soso eva vọ.+
5 Me ti gbolo uwo-oma ra fihọ ehru igbehru naJẹ rehọ eria nọ a re kiọkọ evaọ oma ra vọ ikiekpotọ na.+
6 Mẹ te rehọ azẹ ra nọ o bi kporo lahwe na ro ru otọ na fihọ tovo tovo rite obọ igbehru na,Yọ o te vọ iko-ame na.’*
7 ‘Okenọ me ti furie owhẹ, me ti ruru idhiwu na, me ve ru isi rai muebi.
Mẹ te rọ ẹgho ruru ọre na,Yọ ọvẹre na o ti lo ho.+
8 Mẹ te rọ fiki ra ru eware kpobi nọ e rẹ kẹ elo evaọ idhiwu na muebi,Me ve ti ru ẹkwotọ ra soso muebi,’ ere Jihova Olori nọ Ọ Mai Kpehru na ọ ta.
9 ‘Me ti ru edada jọ udu ahwo buobu okenọ mẹ te rehọ ahwo ra kpohọ igbo evaọ erẹwho efa,Kpohọ ekwotọ nọ whọ riẹ vẹre he.+
10 Me ti ru ọwhewhe mu ahwo buobu,Yọ ivie rai i ti nuhu avọ idudu fiki ra okenọ me ti veghe ọgbọdọ mẹ evaọ aro rai.
A ti nuhu ababọ eriosehọ, yọ omomọvo ọ te dhẹ kẹ uzuazọ riẹEvaọ ẹdẹ nọ who ti kie.’
11 Keme enẹ Jihova Olori nọ Ọ Mai Kpehru na ọ ta:
‘Ọgbọdọ ovie Babilọn o ti bru owhẹ ze.+
12 Me ti ru re egbaẹmo egaga e rehọ egbọdọ rai kpe ogbotu ahwo ra,Egbaẹmo nọ e mae geva evaọ usu erẹwho na, aikpobi.+
A te rehọ omorro Ijipti ziọ otọ, a vẹ te raha ogbotu ahwo riẹ na kpobi muotọ.+
13 Me ti kpe erao riẹ kpobi nọ e rrọ akotọ ame obuobu riẹ no,+Yọ uvumọ owọ ohwo-akpọ hayo ekothawọ erao i gbe ti gbudie ame na ku ofa ha.’+
14 ‘Evaọ oke yena, me ti ru ame rai fo,Me ve ti ru ithẹ rai su wọhọ ewhri,’ ere Jihova Olori nọ Ọ Mai Kpehru na ọ ta.
15 ‘Okenọ me ti ru Ijipti fihọ otọ ufofe nọ o raha no, ẹkwotọ nọ a kwa eware kpobi nọ e rrọ eva riẹ no,+Okenọ me ti kpe ahwo nọ a be rria eva riẹ kpobi no,A te riẹ nọ mẹ họ Jihova.+
16 Onana yọ ole uweri, yọ ahwo a te se iẹe ba ẹso ho;Emetẹ erẹwho na e te so ẹe.
A te so ẹe fiki Ijipti gbe fiki ogbotu ahwo riẹ kpobi,’ ere Jihova Olori nọ Ọ Mai Kpehru na ọ ta.”
17 Kẹsena evaọ ukpe avọ ikpegbivẹ, evaọ ẹdẹ avọ ikpegbisoi amara na, ẹme Jihova o te bru omẹ ze, inọ:
18 “Ọmọ ohwo, kuenu oviẹ fiki ogbotu ahwo Ijipti re whọ rehọ iẹe kpobọ otọ ẹkpẹ na, tei te emetẹ erẹwho ilogbo na, kugbe enọ i bi kpobọ ọgọdọ na.*
19 “‘Ono who wo erru vi? Kpohọ obotọ, re who kiẹzẹ kugbe enọ a yawo ho!’
20 “‘A ti whu fihọ udevie enọ a rọ ọgbọdọ kpe.+ A rehọ e riẹ kẹ ọgbọdọ na no; si rie avọ ogbotu ahwo riẹ kpobi vrẹ.
21 “‘Egbaẹmo nọ e mae ga e te jọ obọ edidi Uki* na ta ẹme kẹe avọ enọ i bi fiobọhọ kẹe. A te rọ ọgbọdọ kpe ai, yọ a te siọ obotọ ba ekpohọ họ, a ve ti kiẹzẹ nwane wọhọ enọ a yawo ho na.
22 Asiria avọ ogbotu ahwo riẹ kpobi a rrọ etẹe. Iki rai e wariẹ e riẹ họ, ọgbọdọ a ro kpe aikpobi.+
23 Iki riẹ e rrọ obọ edidi ọgọdọ* na, yọ ogbotu ahwo riẹ kpobi a wariẹ uki riẹ họ, ọgbọdọ a ro kpe aikpobi, keme a jẹ whẹ idudu họ ahwo oma evaọ ẹkwotọ enọ e rrọ uzuazọ.
24 “‘Ilam+ avọ ogbotu ahwo riẹ kpobi a rrọ etẹe wariẹ uki riẹ họ, ọgbọdọ a ro kpe aikpobi. A kpobọ otọ ẹkpẹ na no avọ epanọ a rọ yawo ai hi na, enọ e jẹ whẹ idudu họ ahwo oma evaọ ẹkwotọ enọ e rrọ uzuazọ na. Enẹna oma o te vuọ ae avọ enọ i bi kpobọ ọgọdọ na.*
25 A ruẹrẹ ehwa họ kẹe no evaọ udevie enọ a kpe na, te ogbotu ahwo riẹ kpobi nọ a wariẹ iki riẹ họ. Aikpobi yọ ahwo nọ a yawo ho, ọgbọdọ a ro kpe ai, fikinọ a jẹ whẹ idudu họ ahwo oma evaọ ẹkwotọ enọ e rrọ uzuazọ; yọ oma o te vuọ ae avọ enọ i bi kpobọ ọgọdọ na.* A fi rie họ udevie enọ a kpe na no.
26 “‘Etẹe Mishẹk avọ Tubal+ gbe ogbotu ahwo rai* kpobi a rrọ. Iki rai* e wariẹ e riẹ họ. Aikpobi yọ ahwo nọ a yawo ho, enọ a rọ ọgbọdọ duwu lafi, fikinọ a jẹ whẹ idudu họ ahwo oma evaọ ẹkwotọ enọ e rrọ uzuazọ.
27 Kọ a gbe ti kiẹzẹ kugbe egbaẹmo egaga nọ e yawo ho nọ i whu no, enọ avọ ekwakwa ẹmo rai a kpobọ Uki?* A ti fi egbọdọ rai họ otọ izou rai,* je fi izieraha rai họ ehru igbenwa rai, fikinọ egbaẹmo egaga na i je zighi ahwo evaọ ẹkwotọ enọ e rrọ uzuazọ.
28 Rọkẹ owhẹ, a te guọghọ owhẹ kugbe ahwo nọ a yawo ho na, yọ who ti kiẹzẹ kugbe enọ a rọ ọgbọdọ kpe na.
29 “‘Edọm+ ọ rrọ etẹe, ivie riẹ gbe isu riẹ kpobi, enọ i kiẹzẹ kugbe ahwo nọ a rọ ọgbọdọ kpe, ghelọ ogaga rai; ae omarai a ti kiẹzẹ kugbe ahwo nọ a yawo ho,+ je kugbe enọ i bi kpobọ ọgọdọ na.*
30 “‘Etẹe ikpahwo-esuo* obọ ẹkpẹlobọ ovatha-ọre kpobi e rrọ, gbe ahwo Saedọn+ kpobi, enọ i lele ahwo nọ a rọ ọgbọdọ kpe kpobọ otọ no avọ omovuọ, ghelọ ogaga rai nọ a jẹ rọ whẹ idudu họ ahwo oma na. A ti kiẹzẹ kugbe ahwo nọ a rọ ọgbọdọ kpe ababọ oyawo nọ a yawo rai, yọ oma o te vuọ ae avọ enọ i bi kpobọ ọgọdọ na.*
31 “‘Fẹro ọ te ruẹ enana kpobi, oma o vẹ te sasa iẹe fiki eware kpobi nọ e via kẹ ogbotu ahwo riẹ;+ a te rọ ọgbọdọ kpe Fẹro avọ ogbaẹmo riẹ soso,’ ere Jihova Olori nọ Ọ Mai Kpehru na ọ ta.
32 “‘Fẹro avọ ogbotu ahwo riẹ a ti whu kugbe enọ a yawo ho, enọ a rọ ọgbọdọ kpe, fikinọ ọ jẹ whẹ idudu họ ahwo oma evaọ ẹkwotọ enọ e rrọ uzuazọ,’ ere Jihova Olori nọ Ọ Mai Kpehru na ọ ta.”
Eme-Obotọ
^ Evaọ Hibru, “rai.”
^ Hayo “okpohrokpo nọ ọ rrọ whẹvu.”
^ Evaọ Hibru, “Whọ te vọ obotọ iko-ame na.”
^ Hayo “uki.”
^ Hayo “uki.”
^ Hayo “uki.”
^ Hayo “uki.”
^ Evaọ Hibru, “riẹ.”
^ Evaọ Hibru, “riẹ.”
^ Ẹsejọhọ o be ta kpahe egbaẹmo nọ a ki avọ egbọdọ rai, nọ a rọ kẹ ae ọghọ.
^ Hayo “uki.”
^ Hayo “isu.”
^ Hayo “uki.”
