Ole nọ O Vi Ile 5:1-16
5 “Mẹ ruọ eva ọgbọ mẹ no,+O oniọvo-ọmọtẹ mẹ, ọmọtibobo mẹ.
Mẹ tọlọ mọr gbe eware mẹ nọ i re gbo ore awere no.+
Mẹ re othuzou-ọnyọ mẹ jẹ lalọ ọnyọ mẹ no;Mẹ da enwaene mẹ gbe imiliki mẹ no.”+
“Wha re emu, egbẹnyusu eghaghae!
Wha da eme uyoyou* vọ eva re i mu owhai!”+
2 “Mẹ rrọ owezẹ, rekọ udu mẹ o be wezẹ hẹ.+
Me bi yo edo ọghaghae mẹ nọ o bi kporo ẹthẹ!”
“Rovie kẹ omẹ, O oniọvo-ọmọtẹ mẹ, oyoyou mẹ,Erueruẹ mẹ, ọnọ oka ovuovo o rrọ oma ha na!
Keme igrigri e lẹliẹ uzou mẹ vo no,Ewhrọwhrọ aso na i ru eto mẹ vo no.”+
3 “‘Mẹ ba ewu mẹ no.
Kọ mẹ rẹ jẹ wariẹ ku ei họ?
Mẹ wozẹ awọ mẹ no.
Kọ mẹ rẹ jẹ wariẹ gbe ai no?’
4 Ọghaghae mẹ o si obọ riẹ no eghogho ẹthẹ na no,Oma o tẹ koyẹ omẹ fiki riẹ.
5 Mẹ kpama re me rovie kẹ ọghaghae mẹ na;Mọr o te bi su no abọ mẹ ze,Ame mọr o te bi su no iziabọ mẹ ze,Bi su fihọ oware nọ a rẹ rọ kare ẹthẹ na.
6 Me te rovie kẹ ọghaghae mẹ na,Rekọ ọghaghae mẹ na o kuomarẹriẹ no, ọ nyavrẹ no.
Ọkora ọ ruọ omẹ oma nọ ọ nyavrẹ.*
Mẹ gwọlọ e riẹ, rekọ mẹ ruẹ e riẹ hẹ.+
Me se rie, rekọ o yo kẹ omẹ hẹ.
7 Iroroke nọ e be nya okpẹwho na wariẹ a tẹ ruẹ omẹ.
A tehe omẹ, a nwa omẹ oma.
Iroroke nọ e rrọ akotọ ugbẹhẹ na a mi omẹ ohọ nọ me ro wowo.*
8 Mẹ be ta kẹ owhai nọ wha duwu iyei, O whai emetẹ Jerusalẹm:
Wha tẹ ruẹ ọghaghae mẹ,Wha ta kẹe nọ uyoyou o kọ ruọ omẹ uzou no.”
9 “Ẹvẹ ọghaghae ra o ro woma vi ọghaghae ọfa kpobi,Whẹ aye nọ o wo erru vi eyae kpobi?
Ẹvẹ ọghaghae ra o ro woma vi ọghaghae ọfa kpobi,Nọ whọ be rọ ta kẹ omai nọ ma duwu iyei itieye?”
10 “Ọghaghae mẹ na o bi lo, o te je wo emamọ ovioma;O wo ohẹriẹ evaọ udevie ahwo idu ikpe.
11 Uzou riẹ igoru, igoru nọ e mai woma.
Eto riẹ e wọhọ eya iriẹ* nọ i bi fou,E rrọ biebi wọhọ ọkọlọbe.
12 Ibiaro riẹ e wọhọ ibiaro irueruẹ nọ e rrọ akotọ iko-ame,Nọ e be rọ imiliki họ,Nọ e rrọ akotọ uto ame nọ o vọ te unu.*
13 Ibiegba riẹ e wọhọ ọgbọ idodo nọ i bi gbo ore awere,+Oria ukpehru nọ ebe nọ i re gbo ore awere e rrọ.
Igbenu riẹ idodo, nọ ame mọr+ o bi su no ze.
14 Abọ riẹ ekwakwa igoru igheghelie* nọ a rọ krisolaet whẹ erru họ.
Okpeva riẹ akọ-eni nọ o bi lo nọ a rọ safaya ruru.
15 Awọ riẹ ipila ibitho ikekeri* nọ a ro dikihẹ awọ nọ a rọ igoru nọ e mai woma ru.
Whọ tẹ ruẹ e riẹ, ọ wọhọ Lebanọn, wọhọ ire sida+ nọ a rẹ ruẹ ọkpọ rai hi.
16 Unu* riẹ o be mere jojojo,Yọ oware kpobi evaọ oma riẹ u re siuru.+
Ọnana họ ọghaghae mẹ, ọnana họ oyoyou mẹ, O emetẹ Jerusalẹm.”
Eme-Obotọ
^ Hayo “da uyoyou.”
^ Hayo o sae jọ nọ, “ta ẹme.”
^ Hayo “ohọ ovovo nọ me ro ruru ovao.”
^ Hayo o sae jọ nọ, “owhala ibi ideti.” Onana yọ oghẹrẹ ibi oriẹ jọ nọ e rẹ mere. Obọ Palẹstain a rẹ mae jọ ruẹ oghẹrẹ oriẹ nana.
^ Hayo o sae jọ nọ, “Nọ e rrọ ugbuhru eyeri-ame.”
^ Hayo “isilida igoru.”
^ Hayo “ipila marbo.”
^ Hayo “Ẹrọo.” Evaọ Hibru, “Ehru obeva unu.”
