Zẹfanaya 2:1-15
2 Wha kokohọ, ẹhẹ, wha koko omarai họ,+O orẹwho nọ o wo omovuọ họ.+
2 Taure uzi na u te ti mu iruo họ,Taure ẹdẹ na ọ tẹ te vrẹ wọhọ ehọrọ,Taure ofu ọgaga Jihova o te ti bru owhai ze,+Taure ẹdẹ ofu Jihova o te ti bru owhai ze,
3 Wha gwọlọ Jihova,+ whai kpobi nọ e be romakpotọ* evaọ otọakpọ na,Enọ i bi koko izi ikiẹrẹe riẹ.*
Wha gwọlọ ẹrẹreokie, wha gwọlọ omaurokpotọ.*
Ẹsejọhọ* a te ko owhai dhere evaọ ẹdẹ ofu Jihova.+
4 Keme Gaza o ti zihe ruọ okpẹwho nọ a dhẹ seba no;Yọ Ashkelọn ọ te jọ ofofe.+
A ti le Ashdọd vrẹ evaọ uvo kekeke,Yọ a ti vi Ekrọn no otọ.+
5 “Uye u te ahwo nọ a be rria akotọ abade na, orẹwho ahwo Kẹrẹt!+
Jihova o brukpe owhẹ no.
O Kenan, ẹkwotọ ahwo Filistia, mẹ te raha owhẹ,Re ohwo ọvo o gbe kiọkọ eva ra ha.
6 Akotọ abade na o ti zihe ruọ otọ nọ erao e rẹ jọ re ẹbe,Avọ eza* rọkẹ ithuru-igodẹ gbe iwou-erao itho rọkẹ igodẹ.
7 U ti zihe ruọ ẹkwotọ ahwo uwou Juda nọ a kiọkọ;+Etẹe a te jọ kuọ omarai.
Evaọ iwou Ashkelọn a ti kiẹzẹ evaọ owọwọ.
Keme Jihova Ọghẹnẹ rai ọ te rẹriẹ ovao riẹ rri rai,*Yọ o ti koko ahwo rai nọ a mu kpohọ igbo họ zihe ze.”+
8 “Me yo ẹpoviẹ Moab+ gbe ekela ahwo Ammọn no,+Enọ e wọviẹ ahwo mẹ je seha kpahe ẹkwotọ rai.+
9 Fikiere nọ mẹ rrọ uzuazọ na,” ere Jihova olori egbaẹmo, Ọghẹnẹ Izrẹl ọ ta,“Moab ọ te jọ wọhọ Sọdọm,+Yọ ahwo Ammọn a te jọ wọhọ Gomora,+Oria ebe osokpọ, ọgọdọ uwhei, gbe otọ nọ o raha no bẹdẹ bẹdẹ.+
Ahwo nọ a kiọkọ evaọ ahwo mẹ a te kwa eware rai rehọ,Yọ ikiọkotọ orẹwho mẹ i ti le ai no otọ rai.
10 Onana o te jọ osohwa omorro rai,+Keme a wọviẹ jẹ wọ oma kpehru kẹ ahwo Jihova olori egbaẹmo na.
11 Jihova o ti fi ọwhewhe* họ ae oma;Keme ọ te raha eghẹnẹ otọakpọ na kpobi no,*Yọ ikoliko erẹwho na kpobi a ti guzou kpotọ kẹe,*+Ọvuọvo rai evaọ oria riẹ.
12 Whai ahwo Ẹtiopia mẹ te rọ ọgbọdọ mẹ kpe owhai re.+
13 Ọ te rriẹ obọ riẹ rri ẹkpẹlobọ ovatha-ọre ọ vẹ te raha Asiria,Yọ o ti ru Nanivi fihọ ofofe,+ ọ te ya fia wọhọ udhude.
14 Owa erao i ti ruẹ fihọ iẹe, oghoghẹrẹ erao ijihẹ* kpobi.
Te okpitolo* gbe evuẹ e te jọ izou ipila riẹ evaọ aso.
Urru jọ o te so ile evaọ unwido.
Ọraha o ti te unuẹthẹ na;Keme ọ te fere ire sida nọ a rọ tehe uwou na via.
15 Okpẹwho omorro nọ o wo omofọwẹ vẹre na ọna,Nọ ọ jẹ jọ udu riẹ ta nọ, ‘Mẹ họ ohwo na, omọfa ọ rrọ họ.’
Rri epanọ o zihe ruọ oware idudu no,Oria nọ erao ijihẹ i re ruẹ fihọ!
Ohwo kpobi nọ ọ be nya akotọ riẹ vrẹ ọ te fiunu jẹ frẹ obọ.”+
Eme-Obotọ
^ Hayo “nọ e rrọ wolẹ.”
^ Evaọ Hibru, “lele oziẹobro okiẹrẹe riẹ.”
^ Hayo “ẹwolẹ.”
^ Hayo “O sae jọ nọ.”
^ Koyehọ, eza nọ a rẹ jọ vo ame.
^ Hayo “ọ te rẹrote ai.”
^ Hayo “a te gọe.”
^ Hayo “o ti ru eghẹnẹ otọakpọ na kpobi dọ no.”
^ Hayo “iguegue.”
^ Evaọ Hibru, “oghẹrẹ arao orẹwho.”
^ Hayo “ọvisekpe.”