Zẹfanaya 3:1-20
3 Uye u te okpẹwho ọkparesuọ na, ọnọ o gbeku na, ọrọ okienyẹ na!+
2 Ọ gaviezọ kẹ urru ovuọvo ho;+ ọ jẹ ọwhọkuo ọvuọvo rehọ họ.+
O fievahọ Jihova ha;+ o si kẹle Ọghẹnẹ riẹ hẹ.+
3 Ikpahwo-esuo riẹ nọ e rrọ eva riẹ yọ ikpohrokpo nọ i bi do enu.+
Ibruoziẹ riẹ yọ ijera evaọ aso;A be nyase ugbonwa ọvo dede ba ha nọ a rẹ va evaọ ohiohiẹ.
4 Eruẹaro riẹ yọ ezae nọ i wo orivo gbe ahwo eviẹhọ.+
Izerẹ riẹ a bi gbe eware nọ e rrọ ọrẹri ku;+A be raha uzi na.+
5 Jihova o kiẹrẹe evaọ udevie riẹ;+ o bi ru oware uyoma ovo ho.
Kohiohiẹ kohiohiẹ o bi whowho iziẹibro riẹ via,+U re fi ei abọ kie he wọhọ epanọ oke o rẹ seba ẹke he na.
Rekọ ọnọ o kiẹrẹe he na ọ riẹ omovuọ họ.+
6 “Mẹ raha erẹwho; iwou ikpehru ibienẹ rai i te zihe ruọ ifofe.
Mẹ raha iyẹrẹ rai, ohwo ọvuọvo ọ gbẹ jẹ nya ae vrẹ hẹ.
Ikpewho rai e raha kuotọ, ababọ ohwo, ohwo ọvo ọ be rria ae he.+
7 Enẹ mẹ ta kẹe, ‘Whọ te dhozọ mẹ jẹ jẹ ọwhọkuo* rehọ hrọ,’+
Re a gbẹ raha oria riẹ nọ ọ be rria ha+Rekọ ẹsiẹe a kru oma ga kẹ umuomu uruo.
Mẹ te rehọ iẹe guẹdhọ* hrọ fiki eware nana kpobi.+
8 ‘Fikiere wha rẹro mẹ,’*+ ere Jihova ọ ta,‘Bọo ẹdẹ nọ mẹ te kpama re mẹ kwa eware,*Keme oziẹobro mẹ họ re me koko erẹwho họ, re me koko ekwotọ-ivie họ,Re me ku ofu mẹ ku ai, ofu ọgaga mẹ kpobi;+Keme erae ajọwha mẹ e te mahe otọakpọ na kpobi no.+
9 Keme evaọ oke yena, me ti nwene ẹvẹrẹ ahwo na kpohọ ẹvẹrẹ ọgbagba,*Re aikpobi a ruẹsi se odẹ Jihova,Re a gọe no ẹkoko te ẹkoko.’*+
10 No obọ ẹkwotọ ithẹ Ẹtiopia ze,Enọ e be lẹ omẹ, ọmọtẹ ahwo mẹ nọ a vahabọ na a te rehọ okẹ se omẹ.+
11 Evaọ ẹdẹ yena, a ti kpomovuọ họ owhẹ oma haFiki eware kpobi nọ who ru rọ kpareso omẹ,+Keme evaọ oke yena me ti si enọ i re seha avọ omorro no udevie ra;Yọ who ti gbe bru omorro vievie he evaọ ugbehru ọrẹri mẹ.+
12 Mẹ te kẹ ahwo nọ a be romakpotọ gbe iruori na uvẹ re a kiọkọ udevie rai,+Yọ odẹ Jihova họ oria adhẹzọ nọ a te dhẹ ro.
13 Ahwo Izrẹl nọ a kiọkọ+ a ti ru umuomu hu;+A te ta ọrue he, yọ a te jọ unu rai ruẹ ẹrọo eviẹhọ họ;A te re emu* je kiẹzẹ, yọ ohwo ọvo o ti ru ozọ mu ai hi.”+
14 Bo ubo oghọghọ, O ọmọtẹ Zayọn!
Bo ubo obokparọ, O Izrẹl!+
Rọ udu ra kpobi ghọghọ jẹ wereva, O ọmọtẹ Jerusalẹm!+
15 Jihova o si obrukpe na no owhai uzou no.+
O le ọwegrẹ rai zihe no.+
Ovie Izrẹl, Jihova, ọ rrọ udevie rai.+
Wha te gbẹ dhozọ okpẹtu ofa ha.+
16 Evaọ ẹdẹ yena a te ta kẹ Jerusalẹm nọ:
“Jọ ozọ u mu owhẹ hẹ, O Zayọn.+
Jọ oma o lọhọ owhẹ hẹ.*
17 Jihova Ọghẹnẹ rai ọ rrọ udevie rai.+
Wọhọ ọgba, o ti siwi owhai.
Ọ te ghọghọ fiki rai avọ oghọghọ ulogbo.+
Ọ te fọ tou* evaọ uyoyou riẹ.
Ọ te ghọghọ fiki rai avọ edo oghọghọ.
18 Enọ i bi weri fikinọ a be sae nyaze ehaa ra ha, me ti koko ai họ;+A sae nyaze he fikinọ a jẹ ruẹ-uye ẹpoviẹ riẹ.+
19 Rri! Evaọ oke yena mẹ te kẹ enọ i bi kienyẹ owhẹ uye;+Me ti siwi ọnọ ọ be nya segbe segbe,+Yọ me ti koko enọ e vahabọ na họ.+
Me ti ru nọ a ti ro wo ujiro gbe odẹ nọ u re doEvaọ ẹkwotọ kpobi nọ a jọ kpomovuọ họ ae oma.
20 Evaọ oke yena mẹ te rehọ owhai ze,Oke nọ me ti koko owhai họ na.
Keme me ti ru nọ wha ti ro wo odẹ nọ u re do* gbe ujiro+ evaọ udevie ahwo otọakpọ na kpobi,Okenọ me ti koko ahwo rai nọ a mu kpohọ igbo zihe ze evaọ iraro rai,” ere Jihova ọ ta.+
Eme-Obotọ
^ Hayo “kẹe uye.”
^ Hayo “ọkpọvio.”
^ Hayo “rọ odiri hẹrẹ omẹ.”
^ Hayo o sae jọ nọ, “kpama wọhọ osẹri.”
^ Hayo “ọfuafo.”
^ Hayo “gọe evaọ okugbe.”
^ Hayo “ẹbe.”
^ Evaọ Hibru, “Who fi abọ họ otọ họ.”
^ Hayo “Oma u ti dhẹi; Eva e te vọe.”
^ Evaọ Hibru, “wo odẹ.”
