Ro Se Ahwo Rom 4:1-25
4 Nọ o rrọ ere na, didi erere ma rẹ ta nọ o te Abraham ọsẹ-esẹ mai wọhọ ohwo-akpọ?*
2 Wọhọ oriruo, o hae jọ nọ fiki iruo a ro kuenu kẹ Abraham inọ o kiẹrẹe, ọ hai wo ẹjiroro nọ o re ro seha, rekọ ọ rẹ sai ru ere evaọ aro Ọghẹnẹ hẹ.
3 Kọ ogbẹrọnọ enẹ ikereakere na e ta? “Abraham o fi ẹrọwọ họ Jihova,* a te kele iei kẹe wọhọ ẹrẹreokie.”+
4 Whaọ ohwo nọ o bi ru iruo, a re kele osa nọ a hwa kẹe wọhọ uwowou ulogbo ho, rekọ wọhọ osa* nọ a kru rie.
5 Evaọ abọdekọ riẹ, ohwo nọ o bi ru iruo ho rekọ nọ o fi ẹrọwọ họ Ọnọ o re kuenu kẹ ọrahauzi inọ o kiẹrẹe na, a re kele ẹrọwọ riẹ wọhọ ẹrẹreokie.+
6 Wọhọ epanọ Devidi ọ ta re kpahe evawere ohwo nọ Ọghẹnẹ o rri nọ o kiẹrẹe* orọnikọ fiki iruo ho, inọ:
7 “Jọ eva e were enọ a kpairoro vrẹ eware imuomu nọ a ru jẹ rọ izieraha rai rọvrẹ* no;
8 jọ eva e were ohwo nọ Jihova* o ti kele izieraha riẹ kẹ vievie he.”+
9 Kọ ahwo nọ a yawo ọvo a re wo evawere nana manikọ te enọ e yawo ho?+ Keme ma be ta nọ: “A kele ẹrọwọ Abraham kẹe wọhọ ẹrẹreokie.”+
10 Oke vẹ a ro kele ẹrọwọ riẹ wọhọ ẹrẹreokie? Okenọ ọ yawo no manikọ okenọ ọ re yawo ho? Okenọ ọ re yawo ho, nọ ọ jọ ohwo nọ ọ yawo ho.
11 Ọghẹnẹ ọ tẹ ta kẹ Abraham nọ ọ yawo re o jọ oka*+ inọ o kiẹrẹe fiki ẹrọwọ nọ o wo evaọ okenọ ọ re yawo ho, re ọ sae jọ ọsẹ ahwo kpobi nọ a wo ẹrọwọ+ dede nọ a yawo ho, a vẹ sae ta nọ a kiẹrẹe;*
12 yọ re ọ sae jọ ọsẹ emọ nọ e yawo, orọnikọ rọkẹ enọ i se oyawo gboja ọvo ho, rekọ te enọ e be nya kpatiẹ nọ i wo oghẹrẹ ẹrọwọ nọ Abraham ọsẹ mai+ o wo evaọ okenọ ọ re yawo ho.
13 Keme orọnikọ fiki uzi na nọ a je koko oye a rọ ya eyaa na kẹ Abraham hayo ọmọ* riẹ hẹ inọ ọ te reuku akpọ jọ,*+ rekọ fiki ẹrẹreokie nọ ọ rọ ẹkwoma ẹrọwọ wo.+
14 Keme otẹrọnọ enọ i se Uzi na gboja gaga họ ereuku na, kiyọ ẹrọwọ o fioka ha, eyaa na e tẹ jẹ rrọ ofofe.
15 Evaọ uzẹme, Uzi na o rẹ wha ofu ze,+ rekọ uzi o gbẹ rrọ họ, uzioraha ọ rẹ gbẹ jariẹ hẹ.+
16 Oyejabọ nọ o rọ rọnọ ẹkwoma ẹrọwọ a re ro wo eyaa na, re o ruẹse jọ fiki uwowou ulogbo,+ re eyaa na e sae jọ rọkẹ emọ* riẹ kpobi,+ orọnikọ rọkẹ enọ i bi koko Uzi na ọvo ho, rekọ te enọ e be rọ aro kele ẹrọwọ Abraham, ọnọ ọ rrọ ọsẹ mai kpobi.+
17 (Nwane wọhọ epanọ a kere nọ: “Mẹ rehọ owhẹ mu ọsẹ erẹwho buobu.”)+ Onana o via evaọ aro Ọghẹnẹ, ọnọ o fi ẹrọwọ họ na, ọnọ o re zihe enọ i whu no ziọ uzuazọ je dhesẹ eware nọ e re via ha wọhọ ẹsenọ e via no.*
18 Dede nọ o wọhọ nọ o gbe wo ẹruore he, ọ rọ fiki ẹruore wo ẹrọwọ inọ ọ te sae jọ ọsẹ erẹwho buobu wọhọ epanọ a ya eyaa kẹe inọ: “Ere emọ* ra e te jọ.”+
19 Yọ dede nọ ẹrọwọ riẹ o whrehe he, o rri ugboma riẹ inọ o joma whu no (keme ọ kpako te oware wọhọ ikpe udhusoi no),+ gbe edhede Sera nọ o whu no.*+
20 Rekọ fiki eyaa Ọghẹnẹ, ẹrọwọ riẹ o whrehe he; rekọ ọ jọ gaga evaọ ẹrọwọ jẹ kẹ Ọghẹnẹ oruaro,
21 yọ u mu rie ẹro ziezi nọ oware nọ Ọghẹnẹ ọ ya eyaa riẹ na Ọ te sai ru ei gba.+
22 Fikiere “a te kele iei kẹe wọhọ ẹrẹreokie.”+
23 Rekọ orọnọ fiki riẹ ọvo a ro kere eme nana ha inọ “a te kele oyena kẹe,”+
24 rekọ fiki mai re enọ a ti kele iei kẹ, keme ma fi ẹrọwọ họ Ọnọ ọ kpare Jesu Olori mai no uwhu ze na.+
25 Ọ kuvẹ re a kpei fiki iruthọ mai+ yọ a kpare riẹ ze re a ruẹsi kuenu kẹ omai inọ ma kiẹrẹe.+
Eme-Obotọ
^ Hayo “wọhọ epaọ uwo?”
^ Rri Ẹme-Ofiba A5.
^ Hayo “oware.”
^ Hayo “o kele ẹrẹreokie kẹ.”
^ Evaọ Griki, “je ruru izieraha rai.”
^ Rri Ẹme-Ofiba A5.
^ Hayo “imuẹro.”
^ Hayo “a vẹ ruẹsi kele ẹrẹreokie kẹ ae.”
^ Hayo “akpọ ọkpokpọ na.”
^ Evaọ Griki, “ubi.”
^ Evaọ Griki, “ubi.”
^ Hayo o sae jọ nọ, “o re ru oware nọ o rrọ họ nọ o rẹ rọ romavia.”
^ Evaọ Griki, “ubi.”
^ Hayo “Sera nọ ọ be sai dihọ họ.”
