Aizaya 11:1-16
11 Omogha+ jọ o te ta no ehri-ure Jẹsi ze,+Yọ okakọ nọ o te dhẹ+ no awọ riẹ ze o te mọ ubi.
2 Ẹzi Jihova ọ te ruọ ẹe oma,+Ẹzi areghẹ+ gbe ọrọ otoriẹ,Ẹzi nọ ọ rẹ rọ kẹ ohrẹ gbe ọrọ ogaga,+Ẹzi eriariẹ gbe ọrọ ozodhẹ Jihova.
3 Ozodhẹ Jihova họ oware nọ o te kẹe evawere.+
Orọnikọ oware nọ ọ rọ ibiaro riẹ ruẹ o ti ro bruoziẹ hẹ,Hayo kọ oware nọ ọ rọ ezọ riẹ yo ọvo ọ te rọ kẹ ọwhọkuo ho.+
4 O ti bruoziẹ iruori na ababọ okienyẹ,*Yọ ọ te rọ ẹrẹreokie whọku ahwo fiki enọ e be romakpotọ evaọ otọakpọ na.
Ọ te rehọ ọkpọ unu riẹ fa otọakpọ na,+Ọ vẹ rehọ ẹwẹ* igbenu riẹ kpe ahwo omuomu na no.+
5 Ẹrẹreokie ọ te jọ umueku nọ ọ rọ gba eku riẹ,Yọ ọtẹruo ọ te jọ umueku eku riẹ.+
6 Ojera avọ omogodẹ a te hae jọ kugbe ẹsejọ,+Yọ okeke o ti ruẹ kugbe ọmọ ẹwe,Ọmọ-eruẹ avọ okpohrokpo* gbe arao ọpoporiẹ a te jọ kugbe;*+Yọ ọmọzae ọsese o ti su ai.
7 Eruẹ avọ adaka a te re emu kugbe,Yọ emọ rai i ti ruẹ fihọ oria ovo kugbe.
Okpohrokpo ọ te re ẹbe wọhọ eruẹ.+
8 Ọmọ unuevie ọ te jọ eghogho ọrọza* zaharo,Ọmọ nọ a bru evie no o ti dhobọ họ eghogho araomuomu nọ o wo obi.
9 A te wha enwoma ọvo ze he+Hayo wha ọraha ọvo ze he evaọ ugbehru ọrẹri mẹ na soso,+Keme eriariẹ Jihova e te ginẹ vọ otọakpọ naWọhọ epanọ ame ọ vọ abade na.+
10 Evaọ ẹdẹ yena, owọ-ure Jẹsi+ u ti dikihẹ wọhọ oware oka* rọkẹ ahwo na.+
Ọye erẹwho na e te nyabru re ọ kpọ ae,*+Yọ oria eriosehọ riẹ o ti wo erru.
11 Evaọ ẹdẹ yena, Jihova ọ te wariẹ rriẹ obọ riẹ, orọ avọ isiava, re o siwi ikiọkotọ ahwo riẹ nọ a kiọkọ evaọ obọ Asiria,+ Ijipti,+ Patrọs,+ Kush,+ Ilam,+ Shaena,* Hemat, gbe ikoliko abade na.+
12 Ọ te kpare oware oka* kpehru rọkẹ erẹwho na, o ve koko ahwo Izrẹl nọ a vahabọ na họ,+ yọ o ti je koko ahwo Juda nọ a vahabọ na họ no ibienẹ ene otọakpọ na ze.+
13 Ihri-eriọ Ifremu i ti kuhọ,+Yọ a re ti si enọ i bi mukpahe Juda no.
Ifremu ọ gbẹ te re Juda ihri hi,Yọ Juda o gbe ti mukpahe Ifremu hu.+
14 A te vẹruọ ikiekpotọ* ahwo Filistia evaọ ofẹ ukiediwo-ọre;A ti kuomagbe kwa eware ahwo obọ Ovatha-ọre.
A te rriẹ obọ rai rọsuọ* Edọm+ avọ Moab,+Yọ ahwo Ammọn a ti zihe ruọ ahwo nọ a rrọ otọ rai.+
15 Jihova ọ te ghale uto* abade Ijipti na kpohọ abava*+Je veghe obọ riẹ evaọ ehru Ethẹ na.*+
Ọ te rehọ ẹwẹ* ọrrorro riẹ tehe iẹe evaọ* iko-ame ihrẹ riẹ,O ve ti ru ahwo nyaruọ abọdekọ riẹ avọ eviẹ nọ a kuhọ.
16 Edhere ologbo+ nọ a re ro no Asiria ọ vẹ te jariẹ kẹ ikiọkotọ ahwo riẹ nọ a kiọkọ,+Wọhọ epanọ o jọ kẹ Izrẹl evaọ ẹdẹ nọ o ro no ẹkwotọ Ijipti ze.
Eme-Obotọ
^ Hayo “ẹzi.”
^ Hayo “avọ ẹrẹreokie.”
^ Hayo “okpohrokpo nọ ọ rrọ whẹvu.”
^ Hayo o sae jọ nọ, “Ọmọ-eruẹ avọ okpohrokpo a te re emu kugbe.”
^ Hayo “obi.”
^ Hayo “Erẹwho na e te kiẹ gwọlọ iẹe.”
^ Hayo “ọkpọ oka.”
^ Koyehọ, Babilonia.
^ Hayo “ọkpọ oka.”
^ Evaọ Hibru, “ẹkoko.”
^ Hayo “A ti dhesẹ ogaga rai te obọ.”
^ Evaọ Hibru, “ẹrọo.”
^ Hayo o sae jọ nọ, “o ti ru uto abade Ijipti kpọ yamu.”
^ Koyehọ, Yufretis.
^ Hayo “ẹzi.”
^ Hayo o sae jọ nọ, “tehe iẹe fihọ.”
