Aizaya 19:1-25
19 Owhowhovia ẹdhoguo kpahe Ijipti:+
Rri! Jihova ọ be dhẹ ẹgho nọ o bi siawọ gaga, yọ obọ Ijipti ọ be nyaze.
Eghẹnẹ Ijipti nọ i fioka ha na i ti nuhu evaọ aro riẹ,+Yọ udu u ti no Ijipti awọ.*
2 “Me ti ru ahwo Ijipti wọso ahwo Ijipti,A te họre ohwohwo,Omomọvo ọ te wọso omoni riẹ gbe ọrivẹ riẹ,Okpẹwho o te wọso okpẹwho, uvie o te wọso uvie.
3 Iroro i ti dhe Ijipti ọvẹ,Mẹ te raha omaa riẹ no.+
A te dhẹ bru eghẹnẹ nọ i fioka ha,Bru enuahwo gbe ahwo nọ a re lele izi ta ẹme jegbe egbẹva.+
4 Mẹ te rehọ Ijipti họ obọ olori ọgeva,Yọ ovie ọgeva o ti su ai,”+ ere Olori uzẹme na, Jihova olori egbaẹmo ọ ta.
5 Ame abade na ọ te kpọ no,Yọ ethẹ na ọ te kpọ jẹ yamu.+
6 Ithẹ na i ti gbo dududu;Iko-ame Naele Ijipti e te kpọ jẹ yamu.
Ikpoko avọ agẹ-ethẹ i ti gbo no.+
7 Ekakọ nọ e rrọ akotọ Ethẹ Naele evaọ obọ unu Naele na,Jegbe otọ kpobi nọ a kọ eware fihọ evaọ akotọ Ethẹ Naele+ na o te ya fia.+
U ti fou kufiẹ, o gbẹ te jariẹ ofa ha.
8 Ikuori na i ti weri,Enọ i bi si eghọlọ evaọ Naele na i ti bruenu,Yọ enọ i bi fi iriri rai họ ame na i ti gbe bu hu.
9 A ti ru oma vuọ enọ e rẹ rehọ ẹbe eflase*+ nọ a ru fihọ ilulu zuo ewareGbe enọ e rẹ rehọ ekpọ nọ a re fi ilulu họ zuo eware ro ru ehọ efuafo.
10 A te whọlọ enọ e rẹ jọ eva riẹ zuo eware no;Iruiruo kpobi nọ a rehọ iruo i ti weri.
11 Ikpahwo-esuo Zoan+ a rrọ gheghẹ.
Ekohrẹ Fẹro nọ e mai wo areghẹ a be kẹ ohrẹ ugheghẹ.+
Ẹvẹ whọ rẹ ta kẹ Fẹro nọ:
“Mẹ yọ ohwo uyẹ iwareghẹ,Ohwo uyẹ ivie oke anwae”?
12 Kọ ezae iwareghẹ ra na e rrọ?+
Jọ a vuẹ owhẹ otẹrọnọ a riẹ oware nọ Jihova olori egbaẹmo ọ jiroro riẹ kpahe Ijipti no.
13 Ikpahwo-esuo Zoan a ru oware ugheghẹ no;A viẹ ikpahwo-esuo Nọf*+ họ no;Iletu erua Ijipti i su Ijipti thọ no.
14 Jihova o ku ẹzi ereghe ku ei no;+Yọ a su Ijipti thọ no evaọ oware kpobi nọ o bi ru,Wọhọ ohwo nọ ọ da idi bẹ no nọ o bi kpo geli geli evaọ ehru eware nọ o geli.
15 Ijipti o gbe ti wo iruo ọvo nọ o re ru hu,Makọ rọkẹ uzou na hayo uweli na, ogha oboba na hayo ẹbe othethei na.*
16 Evaọ ẹdẹ yena Ijipti ọ te jọ wọhọ eyae, o ti nuhu avọ ozọ ogaga fiki obọ nọ Jihova olori egbaẹmo ọ kpare rọsuọ ẹe bi ro guegue ei.+
17 Yọ ẹkwotọ Juda o ti zihe ruọ oware idudu kẹ Ijipti. Ozọ u ti mu ai nọ a tẹ fodẹ iẹe, fiki iroro nọ Jihova olori egbaẹmo ọ jẹ kpahe ae no.+
18 Evaọ ẹdẹ yena, ikpewho isoi e te jọ ẹkwotọ Ijipti nọ e be ta ẹvẹrẹ Kenan+ je bi duwu iyei inọ a rẹ talamu Jihova olori egbaẹmo. A re ti se okpẹwho ọvo jọ Okpẹwho nọ O rẹ Bẹre Fihọ Otọ.
19 Evaọ ẹdẹ yena, agbada-idhe jọ ọ te jọ rọkẹ Jihova evaọ udevie ẹkwotọ Ijipti, yọ upila jọ o te jọ rọkẹ Jihova evaọ uwhru riẹ.
20 O te jọ oware oka gbe isẹri kpahe Jihova olori egbaẹmo evaọ ẹkwotọ Ijipti; keme a ti bo se Jihova fiki enọ i bi kienyẹ ae, yọ o ti vi osiwi jọ se ai, osiwi ologbo, ọnọ o ti siwi ai.
21 Jihova ọ vẹ te jọ ọnọ ahwo Ijipti a riẹ, ahwo Ijipti a vẹ te riẹ Jihova evaọ ẹdẹ yena, yọ a ti dhe idhe jẹ kẹ ekẹ, a vẹ te ya eyaa kẹ Jihova je ru eyaa na gba.
22 Jihova ọ te tehe Ijipti,+ ọ te tehe iẹe je siwi ei; a ti zihe bru Jihova ze, yọ o ti ru oware nọ a be yare kẹ ae, o ve siwi ai.
23 Evaọ ẹdẹ yena, edhere ologbo+ jọ o ti no Ijipti kpohọ Asiria. Kẹsena Asiria ọ vẹ te nyaruọ Ijipti, Ijipti ọ vẹ jẹ nyaruọ Asiria, yọ Ijipti o ti kuomagbe Asiria gọ Ọghẹnẹ.
24 Evaọ ẹdẹ yena, Izrẹl ọ te jọ ọrọ avọ esa evaọ usu Ijipti gbe Asiria,+ ọ te jọ oghale evaọ udevie otọakpọ na,
25 keme oke yena yọ Jihova olori egbaẹmo ọ ghale riẹ no, inọ: “Jọ oghale u te ahwo mẹ, Ijipti, gbe iruo abọ mẹ, Asiria, jegbe ukuoriọ mẹ, Izrẹl.”+
Eme-Obotọ
^ Hayo “udu Ijipti o te ghra no evaọ eva riẹ.”
^ Nọ ẹbe nọ a kọ no oke anwae ze. A rẹ rehọ igbe riẹ ru emehọ iwu elọlọhọ.
^ Hayo “Mẹmfis.”
^ Hayo o sae jọ nọ, “oya oriẹ na hayo ukpoko na.”
