Aizaya 21:1-17
21 Owhowhovia ẹdhoguo kpahe udhude abade na:*+
O be nyaze wọhọ okpofou nọ o bi fou evaọ ofẹ obọze ovatha-ọre,No obọ udhude na ze, no obọ ẹkwotọ imuozọ ze.+
2 A vuẹ omẹ eruẹaruẹ egaga jọ no:
Ohwo eviẹhọ na o bi ru eware eviẹhọ,Ohwo ọraha na ọ be raha ọraha.
Nya, O Ilam! Koi họ, O Midia!+
Me ti ru unuofiẹ kpobi nọ ọ wha ze te oba.+
3 Oyejabọ nọ mẹ be rọ ruẹ uye ogaga na.*+
Edada e ruọ omẹ oma no,Wọhọ epaọ aye nọ o bi yẹ.
Idhọvẹ nọ e rrọ omẹ oma e ga vi epanọ me re ro yo ẹme;Ukpokpoma nọ o rrọ omẹ oma o ga vi epanọ mẹ rẹ rọ ruẹ ude.
4 Udu u bi bru omẹ; me bi nuhu avọ ozọ.
Owọwọ nọ me bi rẹro riẹ o be lẹliẹ omẹ nuhu.
5 Ruẹrẹ emẹjẹ na họ jẹ ruẹrẹ ekpala na họ!
Re jẹ da!+
Wha kpama, whai ikpahwo-esuo, wha wholo* ojese na!
6 Enẹ Jihova ọ ta kẹ omẹ:
“Nya, fi ororoke họ re whọ vuẹe nọ ọ niyẹrẹ oware nọ ọ ruẹ.”
7 Ọ tẹ ruẹ akẹkẹ ẹmo nọ utu enyenya i bi si,Akẹkẹ ẹmo nọ eketekete i bi si,Akẹkẹ ẹmo nọ ekamẹle i bi si.
Ọ romatotọ je rri, yọ o bi muẹrohotọ gaga.
8 Kẹsena o te bo via wọhọ okpohrokpo inọ:
“O Jihova, ehru uwou-eroro na me bi dikihẹ kẹse kẹse evaọ oke uvo,Yọ mẹ rẹ jọ oria mẹ nọ me bi jo rou na kaso kaso.+
9 Rri oware nọ o be nyaze:
Ezae nọ e rrọ eva akẹkẹ ẹmo nọ utu enyenya i bi si!”+
Kẹsena ọ tẹ ta nọ:
“O kie no! Babilọn o kie no!+
Ọ whọlọ emema eghẹnẹ riẹ nọ a kare na kpobi fihọ otọ no!”+
10 O ahwo mẹ nọ a si ehọrọ no oma no,Ubi nọ u no* oria mẹ nọ mẹ rẹ jọ si ibi no igbe ekakọ ze,+Mẹ niyẹrẹ oware nọ me yo mi Jihova olori egbaẹmo, Ọghẹnẹ Izrẹl kẹ owhai no.
11 Owhowhovia ẹdhoguo kpahe Duma:*
Ohwo jọ o bi bo se omẹ no obọ Siya ze:+
“Ororoke, kọ ẹvẹ kpahe aso na?
Ororoke, kọ ẹvẹ kpahe aso na?”
12 Ororoke na ọ tẹ ta nọ:
“Ohiohiẹ ọ be tha, ere aso na re.
Otẹrọnọ whọ gwọlọ nekpẹ, nekpẹ.
Wariẹ nyaze!”
13 Owhowhovia ẹdhoguo kpahe udhude opraprara na:
Evaọ owhawho nọ o rrọ udhude na wha te jọ asohẹrioke,O whai ahwo Didan nọ avọ erao rai a bi kpohọ erẹ.+
14 Wha rehọ ame se ọnọ uruame u bi kpe na,Whai enọ e be rria ẹkwotọ Tima,+Re wha jẹ rehọ ebrẹdi se ọnọ ọ be dhẹ na.
15 Keme a dhẹ no fiki ọgbọdọ na, fiki ọgbọdọ nọ a yolo lahwe na,Fiki uze nọ a vẹ na, jegbe fiki epanọ ẹmo na ọ ga te.
16 Keme enẹ Jihova ọ ta kẹ omẹ: “Evaọ oware ukpe ovo, wọhọ unuikpe nọ a rẹ rehọ oruiruo,* oruaro Kida+ kpobi u ti te oba.
17 Ezae nọ e rẹ wha uze nọ i ti kiọkọ evaọ egbaẹmo Kida i ti tulo ho, keme Jihova Ọghẹnẹ Izrẹl ọ ta riẹ no.”
Eme-Obotọ
^ O sae jọ nọ o be ta kpahe ubrotọ Babilonia oke anwae.
^ Evaọ Hibru, “eku mẹ ọ rọ vọ avọ edada na.”
^ Hayo “gbe ewhri họ.”
^ Evaọ Hibru, “Ọmọzae nọ o no.”
^ Otofa riẹ họ “Fọfọ Rirẹ.”
^ Hayo “onọ a romatotọ kele wọhọ epanọ oruiruo o re ru”; koyehọ, ukpe ovo gbagba.
