Aizaya 23:1-18
-
Owhowhovia ẹdhoguo kpahe Taya (1-18)
23 Owhowhovia kpahe Taya:+
Wha kuenu oviẹ, whai ekọ ilogbo Tashish!+
Keme a raha oria nọ ekọ e rẹ kpahe na no; a sae gbẹ ruọ eva riẹ hẹ.
A jọ obọ ẹkwotọ Kitim+ dhesẹ iẹe via kẹ ae no.
2 Wha fibo, whai enọ e be rria akotọ abade na.
Egba-ihreki Saedọn+ nọ e fa abade na vrẹ a rehọ ekwakwa efe vọ eva ra no.
3 A rehọ ibi ekakọ* Shaehọ* fa ame buobu vrẹ,+Eware nọ a jọ ubrotọ Naele vu, enọ o bi wo ugho no ze,Be rọ ere wha erere erẹwho na ze.+
4 Jọ oma o vuọ owhẹ, O Saedọn, whẹ oria omofọwẹ abade na,Keme abade na ọ ta nọ:
“Me ri wo edada eyẹ ẹdẹvo ho, me ri yẹ ẹdẹvo ho,Yọ mẹ re te yọrọ emezae hayo yọrọ emetẹ hẹ.”*+
5 Uweri o te jọ ahwo oma fiki usi nọ a ti yo kpahe Taya,+Wọhọ epanọ o jọ okenọ a yo usi kpahe Ijipti.+
6 Fa vrẹ kpobọ Tashish!
Wha kuenu oviẹ, whai enọ e be rria akotọ abade na!
7 Kọ okpẹwho rai na ọna, ọnọ ọ jẹ hae ghọghọ gaga evaọ oke krẹkri nọ u kpemu, evaọ oke emuhọ riẹ?
Ọ jẹ hae rehọ awọ riẹ nya kpohọ ekwotọ ugbothabọ nyae rria.
8 Ono ọ jiroro nana kpahe Taya,Ọnọ ọ rẹ rehọ itu-uvie tu ahwo na,Ọnọ egba-ihreki riẹ e jọ ikpahwo-esuo,Ọnọ a jẹ kẹ ethueki riẹ ọghọ evaọ otọakpọ na soso?+
9 Jihova olori egbaẹmo omariẹ họ ọnọ ọ jiroro nana,Re o ru eware nọ ọ be rọ yoma gbe erru riẹ kpobi fihọ eware nọ i fioka ha,Re o ru oma vuọ ahwo kpobi nọ a jẹ kẹ ọghọ evaọ otọakpọ na soso.+
10 Fa ẹkwotọ ra vrẹ wọhọ Ethẹ Naele na, O ọmọtẹ Tashish.
Oria ọvo o gbẹ riẹ kẹ ekọ ilogbo ho.*+
11 Ọ rriẹ obọ riẹ fihọ abade na no;O nuhu ekwotọ-ivie no.
Jihova ọ ta nọ a raha eria omofọwẹ Fonisia no.+
12 Yọ ọ ta nọ: “Whọ te gbẹ ghọghọ ofa ha,+O ọnọ a kienyẹ, ọmọtẹ-kọkọ Saedọn.
Kpama, whọ fa vrẹ kpobọ Kitim.+
Makọ evaọ obei dede who ti wo omofọwẹ hẹ.”
13 Rri! Ẹkwotọ ahwo Kaldia.+
Ahwo nana họ ahwo na—Asiria+ họ ahwo na ha—A ru rie fihọ oria nọ erao udhude e rẹ rria.
A bọ iwou ikpehru ẹmo-ofio rai no;A kporo iwou ikpehru riẹ nọ e rẹ bẹ ẹvẹruọ kuotọ no,+A tẹ rọ ere guọghọ iẹe muotọ.
14 Wha kuenu oviẹ, whai ekọ ilogbo Tashish,Keme a raha oria omofọwẹ rai no.+
15 Evaọ ẹdẹ yena, Taya ọ te thọrọ ẹro evaọ ikpe udhosa-gbikpe,+ wọhọ etoke uzuazọ* ovie ọvo. Evaọ obọ ekuhọ ikpe udhosa-gbikpe, o te via kẹ Taya wọhọ epanọ o rrọ evaọ ole ogberẹ:
16 “Tọlọ akpata, re whọ nya okpẹwho na wariẹ, O ogberẹ nọ ọ thọrọ ẹro no.
Rehọ onaa kporo akpata ra;So ile buobu,Re a kareghẹhọ owhẹ.”
17 Evaọ obọ ekuhọ ikpe udhosa-gbikpe, Jihova ọ te rẹriẹ ovao riẹ rri Taya. Taya ọ vẹ te wariẹ mu osa riẹ họ ewo je mu igberẹ họ ebru kugbe ekwotọ-ivie akpọ na kpobi nọ e rrọ otọakpọ na.
18 Rekọ erere nọ o ti wo gbe osa riẹ i ti zihe ruọ oware ọrẹri kẹ Jihova. Yọ a ti koko ai họ oria ovo jọ họ hayo ku ai fiẹ hẹ, keme osa riẹ o te jọ rọkẹ ahwo Jihova, re a ruẹse re eva vọ je ku ikpiwu họ.+
Eme-Obotọ
^ Evaọ Hibru, “ubi.”
^ Koyehọ, ogha Ethẹ Naele na jọ.
^ Evaọ Hibru, “emetẹ-kọkọ họ.”
^ Hayo o sae jọ nọ, “Oria ọvo o gbẹ riẹ nọ ekọ ilogbo e rẹ kpahe he.”
^ Evaọ Hibru, “edẹ.”
