Aizaya 25:1-12
25 O Jihova, whẹ họ Ọghẹnẹ mẹ.
Mẹ be kẹ owhẹ orro, me bi jiri odẹ ra,Keme who ru eware igbunu no,+Eware nọ whọ jiroro rai no oke anwae ze,+Who ru ẹme ra gba,+ je dhesẹ nọ a re fievahọ owhẹ.
2 Keme who zihe okpẹwho ruọ itho nọ a kwa kuku no,Who zihe ẹwho nọ a di ogba wariẹ họ* ruọ oria nọ o raha no.
Uwou ukpehru ohwo orẹwho ọfa na o gbẹ rrọ okpẹwho vievie he;A te gbẹ wariẹ bọe vievie he.
3 Oyejabọ nọ ahwo nọ a rrọ gaga a te rọ kẹ owhẹ orro;Yọ okpẹwho ahwo erẹwho egeva o te dhozọ ra.+
4 Keme who zihe ruọ oria omofọwẹ rọkẹ oruori no,Oria omofọwẹ rọkẹ oyogbe evaọ oke idhọvẹ riẹ,+Oria adhẹzọ evaọ oke okposo,Edhedhẹ evaọ oke ẹrrorro.+
Nọ ofu ahwo egeva na ọ tẹ tehe ugbẹhẹ wọhọ okposo,
5 Wọhọ ẹrrorro evaọ otọ oyaya,Who ru enuodo erara kpotọ.
Wọhọ epanọ uwoho ẹgho u re ru ẹrrorro uvo kpotọ na,Ere ole ahwo egeva na u do serihọ no.
6 Jihova olori egbaẹmo ọ te jọ ugbehru+ nana ruẹrẹEhaa emuọriọ nọ a jọ there obọdẹ emu họ rọkẹ ahwo na kpobi,+Ehaa emuọriọ nọ emamọ enwaene* o rrọ,Orọ obọdẹ emu nọ a rehọ iwhri ighogho-igbenwa there,Gbe orọ emamọ enwaene nọ a zẹ erara no.
7 Ọ te jọ ugbehru nana si* ohọ nọ u ruru ahwo kpobi na noJegbe ohọ* nọ a si ruru erẹwho na kpobi na.
8 Ọ te lọ* uwhu no bẹdẹ bẹdẹ,+Yọ Jihova Olori nọ Ọ Mai Kpehru na o ti ririe irui-oviẹ no ovao kpobi.+
O ti si ekela ahwo riẹ no otọakpọ na kpobi no,Keme Jihova omariẹ ọ ta riẹ no.
9 Evaọ ẹdẹ yena, a te ta nọ:
“Rri! Ọghẹnẹ mai ọna!+
Ma fi ẹruore mai họ iẹe no,+Yọ o ti siwi omai.+
Jihova ọna!
Ma fi ẹruore mai họ iẹe no.
Joma ghọghọ jẹ wereva fikinọ o bi siwi omai.”+
10 Keme obọ Jihova o te jọ ehru ugbehru nana,+Yọ a ti thihi Moab nyaotọ evaọ oria riẹ+Wọhọ ẹbe ọyaya nọ a thihi ruọ eva ẹko emaniọ.
11 Ọ te rriẹ abọ riẹ rọ faeWọhọ ohwo nọ ọ be ya ame nọ ọ be rehọ abọ riẹ fa ame,Ọ vẹ te rọ onaa veghe abọ riẹRo hrẹ omorro riẹ kpotọ.+
12 Okpẹwho nọ a di ogba wariẹ họ* na avọ igbẹhẹ ikpekpehru ra na,O ti kporo ai fihọ otọ;Ọ te fa ai fihọ otọ, i ti kie te otọ.
Eme-Obotọ
^ Hayo “o rẹ bẹ ẹvẹruọ.”
^ Hayo “enwaene nọ a kuvẹ re o dhẹmu.”
^ Hayo “iveli.”
^ Evaọ Hibru, “lọ.”
^ Hayo “O ti si.”
^ Hayo “o rẹ bẹ ẹvẹruọ.”
