Aizaya 39:1-8
-
Enyukọ nọ i no obọ Babilọn ze (1-8)
39 Evaọ oke yena, ovie Babilọn nọ a re se Mẹrodak-baladan ọmọzae Baladan, o vi ileta gbe okẹ se Hẹzikaya,+ keme o yo nọ ọ jẹ mọ, yọ ẹyao na o kpo no.+
2 Hẹzikaya ọ rehọ evawere dede ae rehọ* je dhesẹ uwou ekwakwa-aghae riẹ kẹ ae+—isiliva, igoru, ewhri balsam gbe iwhri eghaghae efa, ekwakwa ẹmo riẹ soso, gbe oware kpobi nọ o jọ eria ekwakwa-aghae riẹ. Oware ovo o riẹ hẹ nọ Hẹzikaya o dhesẹ kẹ ae he evaọ uwou* obọriẹ gbe evaọ otọ esuo riẹ kpobi.
3 Nọ oyena o vrẹ no, Aizaya ọruẹaro na ọ tẹ nyabru Hẹzikaya ovie na ze, ọ tẹ nọe nọ: “Eme ezae nana e ta, kọ bovẹ a no ze?” Hẹzikaya ọ tẹ ta nọ: “Ẹkwotọ ugbothabọ jọ a no ze, obọ Babilọn.”+
4 Kẹsena ọ tẹ nọ nọ: “Eme a jọ uwou* ra ruẹ?” Hẹzikaya ọ tẹ kẹ uyo nọ: “A ruẹ oware kpobi nọ o rrọ uwou* mẹ. Oware ovo o riẹ hẹ nọ me dhesẹ kẹ ae he evaọ eria ekwakwa-aghae mẹ.”
5 Aizaya ọ tẹ ta kẹ Hẹzikaya nọ: “Yo ẹme Jihova olori egbaẹmo,
6 ‘Rri! Edẹ e be tha nọ a te kwa eware kpobi nọ e rrọ uwou* ra gbe eware kpobi nọ esẹ-esẹ ra a kokohọ rite ẹdẹ inẹnẹ na kpohọ Babilọn. Oware ovo u ti kiọkọ họ,’+ ere Jihova ọ ta.+
7 ‘Yọ a te rehọ emezae obọra jọ nọ a ti yẹ kẹ owhẹ vrẹ, a vẹ te jọ iruiruo evaọ ighẹ ovie Babilọn.’”+
8 Nọ ọ ta ere, Hẹzikaya ọ tẹ ta kẹ Aizaya nọ: “Ẹme Jihova nọ whọ ta na o woma.” O te fibae nọ: “Keme udhedhẹ gbe omofọwẹ* o te jariẹ evaọ oke* uzuazọ mẹ.”+
Eme-Obotọ
^ Evaọ Hibru, “ọ ghọghọ fiki rai.”
^ Hayo “ighẹ.”
^ Hayo “ighẹ.”
^ Hayo “ighẹ.”
^ Hayo “ighẹ.”
^ Hayo “uzẹme.”
^ Evaọ Hibru, “edẹ.”
