Aizaya 44:1-28
44 “Enẹna gaviezọ, O Jekọp, odibo mẹ,Te owhẹ, O Izrẹl, ọnọ mẹ salọ no.+
2 Enẹ Jihova ọ ta,Ọnọ ọ ma owhẹ gbe Ọnọ ọ ruẹrẹ owhẹ họ,+Ọnọ o fiobọhọ kẹ owhẹ no obọ edhede ze:*
‘Jọ ozọ u mu owhẹ hẹ, Jekọp odibo mẹ,+Te owhẹ, Jẹshurọn,*+ ọnọ mẹ salọ no.
3 Keme me ti ku ame ku ọnọ* uruame u bi kpe,+Je ti ru iko-ame nọ i bi su jọ otọ oyaya.
Me ti ku ẹzi mẹ ku ọmọ* ra,+Je ku oghale mẹ ku ahwo uyẹ ra.
4 A te dhẹ no otọ ze wọhọ ẹsenọ a rrọ udevie ẹbe ọrọrọ,+Wọhọ ire pọpla nọ e rrọ akotọ iko-ame.
5 Ọjọ ọ te ta nọ: “Jihova o wo omẹ.”+
Ọfa ọ te rehọ odẹ Jekọp se omariẹ,Yọ ọfa o ti kere fihọ obọ riẹ nọ: “Ọnọ Jihova o wo.”
O ve ti mu odẹ Izrẹl kẹ omariẹ.’
6 Enẹ Jihova,Ovie Izrẹl+ gbe Ọnọ ọ dẹ riẹ zihe ze,+ Jihova olori egbaẹmo ọ ta:
‘Mẹ họ ọrọ ọsosuọ, yọ mẹ họ ọrọ urere.+
Ọghẹnẹ ọfa ọ rrọ họ u te no omẹ no.+
7 Ono ọ wọhọ omẹ?+
Jọ o bo lahwe jẹ tae je dhesẹ iẹe kẹ omẹ!+
Jọ a ta eware nọ e be thaGbe eware nọ e rẹ te viaWọhọ epanọ me ru anwọ oke nọ mẹ rọ rehọ ahwo oke anwae ro mu.
8 Wha jọ idudu e jọ owhai oma ha,Wha jọ ozọ u kpe owhai no gbe he.+
Kọ mẹ gbẹ vuẹ owhai omomọvo no vẹre je whowho iei?
Whai họ isẹri mẹ.+
Kọ Ọghẹnẹ ọfa jọ ọ rrọ u te no omẹ no?
Ijo, Utho ọfa ọ rrọ họ;+ mẹ riẹ ọvuọvo ho.’”
9 Ahwo kpobi nọ a re ru emema nọ a kare a fioka ha,Yọ eware rai nọ a rri ghaghae na e te kẹ ae erere ọvo ho.+
A* be ruẹ oware ovo ho yọ a riẹ oware ovo ho+ wọhọ enọ e rrọ isẹri rai.Fikiere a ti ru oma vuọ ahwo nọ a ru rai.+
10 Ono ọ rẹ ma ẹmẹdhọ hayo ghra ayọno ro ru ẹmema ayọnoNọ o rẹ sae kẹ erere ọvo ho?+
11 Rri! A ti ru oma vuọ ahwo riẹ kpobi!+
Ewena na yọ ahwo-akpọ gheghe.
Jọ aikpobi a kokohọ re a dikihẹ ẹta rai.
Ozọ u ti mu ai gaga, yọ a ti ru oma vuọ aikpobi.
12 Odhogu-ayọno ọ rẹ rehọ okwakwa-iruo* riẹ rọ tehe ayọno nọ o fihọ eva iwowo-erae.
Ọ rẹ rọ ehama tehe iẹe ruẹrẹhọ,Be rehọ ugbobọ ogaga riẹ ro ru ei.+
Kẹsena ohọo u ve bi kpei, ẹgba riẹ o ve re no;Fikinọ ọ da ame he, oma o vẹ lọhọ iẹe no.
13 Ọwena-ire ọ rẹ rriẹ ufi nọ a rẹ rọ ma oware fihọ ure na, ọ vẹ rehọ echọko ọwawae si isi epanọ ọ te kare iẹe.
Ọ vẹ rehọ oware nọ a rẹ rọ kare ure kare iẹe jẹ rehọ ekọmpase koka họ iẹe.
Ọ vẹ kare iẹe wọhọ ohwo,+O ve ru ei wo erru wọhọ ohwo,Re ọ keria evaọ uwou.*+
14 Ọjọ ọ rrọ nọ iruo riẹ e rrọ re o ko ire sida fihọ otọ.
Ọ rẹ salọ oghẹrẹ ure jọ, ure ok,Ọ vẹ kẹe uvẹ rro evaọ udevie ire nọ e rrọ owhawho.+
Ọ rẹ kọ ure ọkaa, oso o ve ru ei rro.
15 Kẹsena u ve zihe ruọ ure nọ ohwo o re ro koko erae họ.
Ọ rẹ rọ abọjọ riẹ koko erae họ nọ ọ rẹ rria;Ọ rẹ rehọ iẹe koko erae họ ro there ebrẹdi.
Rekọ ọ rẹ jẹ rehọ iẹe kare ẹmẹdhọ, ọ vẹ be gọe.
Ọ rẹ rehọ iẹe kare ẹmema, ọ vẹ be hae guzou kpotọ evaọ aro riẹ.+
16 Ọ rẹ mahe ubro riẹ jọ evaọ erae;Ọ rẹ rọ ubro yena tọ arao nọ ọ rẹ re, eva e vẹ vọe.
Ọ rẹ jẹ rria erae re oma riẹ o sasa, ọ vẹ ta nọ:
“Ẹhẹẹ! Oma mẹ o sasa no nọ me bi rri erae na.”
17 Rekọ ọ vẹ rehọ abọ riẹ nọ o kiọkọ kare ẹmema nọ o re ro ru ọghẹnẹ.
O ve bi guzou kpotọ kẹe jẹ gọe.
Ọ rẹ lẹ sei, ọ vẹ be ta nọ:
“Siwi omẹ, keme whẹ họ ọghẹnẹ mẹ.”+
18 A riẹ oware ovo ho, a re wo otoriẹ oware ovo ho,+Keme ibiaro rai e fare kpegheghe, a rẹ sae ruẹ ude he,Yọ udu rai u wo ovuhumuo ho.
19 Ọvuọvo o re roro evaọ udu riẹ hẹHayo wo eriariẹ hayo otoriẹ hẹ, nọ ọ rẹ rọ ta nọ:
“Mẹ mahe abọjọ riẹ evaọ erae,Yọ mẹ rehọ iwowo-erae riẹ there ebrẹdi jẹ tọ arao nọ mẹ re.
Kọ u fo nọ mẹ rẹ rehọ abọ riẹ nọ o kiọkọ ru oware otọtọ?+
Kọ u fo nọ mẹ gọ ete-ure?”*
20 Enwo ọ rẹ re.
Udu ẹghẹ riẹ u su rie thọ no.
Ọ rẹ sai siwi omariẹ* hẹ, hayo ta nọ:
“Kọ ogbẹrọnọ ọrue ọ rrọ obọze mẹ na?”
21 “O Jekọp, kareghẹhọ eware nana, te owhẹ, O Izrẹl,Keme whẹ yọ odibo mẹ.
Mẹ ruẹrẹ owhẹ họ, yọ odibo mẹ whọ rrọ.+
O Izrẹl, whọ te thọrọ omẹ ẹro ho.+
22 Me ti voro iruthọ ra no wọhọ oware nọ ẹgho o ruru,+Je voro izieraha ra no wọhọ oware nọ ẹgho ọlala o ruru.
Zihe bru omẹ ze, keme mẹ te dẹ owhẹ zihe ze.+
23 Wha bo avọ oghọghọ, whai idhiwu,Keme Jihova o ru onana no!
Wha bo ubo obokparọ, whai edidi otọakpọ na!
Wha bo ubo oghọghọ, whai igbehru,+Whẹ owhawho gbe ire ra kpobi!
Keme Jihova ọ dẹ Jekọp zihe ze no,Yọ ọ be jọ oma Izrẹl dhesẹ erru riẹ via.”+
24 Enẹ Jihova ọ ta, Ọnọ ọ dẹ owhẹ zihe ze,+Ọnọ ọ ruẹrẹ owhẹ họ anwọ okenọ whọ jọ obọ edhede;
“Mẹ họ Jihova, ọnọ ọ ma eware kpobi.
Mẹ ọvo mẹ rriẹ idhiwu na fihọ,+Yọ mẹ rriẹ otọakpọ na fihọ.+
Ono ọ jọ kugbe omẹ?
25 Mẹ be raha eware oka ahwo nọ a be ta eme ifofe* na no,Yọ mẹ họ Ọnọ ọ be lẹliẹ egbẹva ru wọhọ ahwo ogheghẹ;+Ọnọ o bi reghe ezae iwareghẹ naJe bi zihe eriariẹ rai ruọ ugheghẹ;+
26 Ọnọ o bi ru ẹme odibo riẹ gbaJe bi ru nọ eruẹaruẹ enyukọ riẹ i bi ro rugba ẹrẹrẹe;+Ọnọ ọ be ta kpahe Jerusalẹm nọ, ‘A te rria eva riẹ,’+
Jẹ be ta kpahe ikpewho Juda nọ, ‘A te wariẹ bọ ae,+Yọ mẹ te ruẹrẹ eria riẹ nọ a raha no na’;+
27 Ọnọ ọ be ta kẹ ame odidi na nọ, ‘Kpọ no,Yọ me ti ru ithẹ ra kpobi kpọ yamu’;+
28 Ọnọ ọ be ta kpahe Sairọs+ nọ, ‘Othuru-igodẹ mẹ ọ rrọ,Yọ o ti ru oreva mẹ kpobi gba ẹrẹrẹe’;+Ọnọ ọ be ta kpahe Jerusalẹm nọ, ‘A te wariẹ bọe,’
Jẹ be ta kpahe etẹmpol na nọ, ‘A te wọ otọhotọ ra họ.’”+
Eme-Obotọ
^ Hayo “no oke eyẹ ze.”
^ Otofa riẹ họ “Ọnọ O Kiete,” odẹ-ova ọghọ nọ a kẹ Izrẹl.
^ Hayo “otọ nọ.”
^ Evaọ Hibru, “ubi.”
^ Koyehọ, emema na.
^ Hayo “amagha ogọle.”
^ Hayo “uwou-ẹdhọ.”
^ Hayo “ẹwẹ ure ọyaya?”
^ Hayo “eruẹaro erue.”
