Aizaya 66:1-24
66 Enẹ Jihova ọ ta:
“Idhiwu na họ agbara-uvie mẹ, yọ otọakpọ na họ akpala nọ mẹ rẹ rọ awọ kpahe.+
Kọ didi uwou wha rẹ sae bọ kẹ omẹ,+Kọ diẹse họ oria eriosehọ mẹ?”+
2 “Obọ obọmẹ u ru eware nana kpobi,Yọ enẹ aikpobi e rọ romavia,” ere Jihova ọ ta.+
“Rekọ, ọnana họ ọnọ me ti rri,Ọnọ ọ romakpotọ jẹ rrọ ọkora, nọ o bi nuhu fiki* ẹme mẹ.+
3 Ọnọ o bi kpe eruẹ ọ wọhọ ọnọ o bi duwu ohwo kpe.+
Ọnọ ọ be rehọ ogodẹ dhe idhe ọ wọhọ ọnọ o bi wiri uriohọ arakọ.+
Ọnọ ọ be kẹ okẹ ọ wọhọ ọnọ ọ be rehọ azẹ esi dhe idhe!+
Ọnọ ọ be rehọ frankinsẹns+ ro dhe idhe ekareghẹhọ ọ wọhọ ọnọ ọ be rehọ eme emajiki+ rọ lẹ ẹro eghale.*
A salọ idhere obọrai no,Yọ eware etọtọ e rẹ were ae gaga.
4 Fikiere mẹ te salọ idhere nọ mẹ te rọ kẹ ae uye,+Yọ uzedhe eware nọ a be dhozọ rai na me ti ru re e via kẹ ae.
Keme okenọ me se, ohwo ọvo ọ kẹ uyo ho;Okenọ mẹ ta ẹme, ohwo ọvo ọ gaviezọ họ.+
A ruabọhọ je ru oware nọ u yoma evaọ aro mẹ,A tẹ salọ nọ a re ru oware nọ o dha omẹ eva.”+
5 Wha yo ẹme nọ Jihova ọ ta, whai enọ i bi nuhu fiki* ẹme riẹ:
“Inievo rai nọ i mukpahe owhai je le owhai no oma fiki odẹ mẹ a ta nọ, ‘Jọ a kẹ Jihova orro!’+
Rekọ Ọ te romavia, ọ vẹ wha oghọghọ se owhai,Ae omarai họ enọ a ti ru oma vo.”+
6 Edo ẹvohẹ jọ o bi do no obọ okpẹwho na ze, edo jọ o bi do no obọ etẹmpol na ze!
Onana yọ edo Jihova nọ ọ be hwosa oware nọ u fo ewegrẹ riẹ zihe kẹ ae.
7 Taure aye na o te ti mu othuẹ eyẹ họ ẹthuẹ, o te yẹ;+
Taure edada eyẹ i te ti muhọ, o te yẹ ọmọzae.
8 Kọ ono o yo oware utioye no ẹdẹ jọ?
Ono ọ ruẹ eware itieye no ẹdẹ jọ?
Kọ ẹdẹ ọvo a re ro yẹ ẹkwotọ?
Hayo kọ ẹsiẹvo idudhe a re ro yẹ orẹwho?
Rekọ, nọ Zayọn ọ nwani mu othuẹ eyẹ họ ẹthuẹ o te yẹ emezae riẹ.
9 “Kọ me re ru ei te epanọ a re ro yẹe no me ve ru re ọ seba ẹlahwe?” ere Jihova ọ ta.
“Hayo kọ me re ru nọ a re ro mu ei họ eyẹ no, me ve wuhu edhede na di?” ere Ọghẹnẹ ra ọ ta.
10 Wha lele Jerusalẹm ghọghọ je lele iei wereva,+ whai enọ i you rie kpobi.+
Wha lele iei ghọghọ gaga, whai enọ i bi weri fiki riẹ kpobi,
11 Keme wha te jọ evie omosasọ riẹ vi evie nọ ọ te vọ owhai eva ziezi,Wha te da bẹ je wo omaweromẹ fiki oruaro ulogbo riẹ.
12 Keme enẹ Jihova ọ ta:
“Mẹ be rehọ udhedhẹ nọ o wọhọ ethẹ rọ kẹe+Jẹ rehọ oruaro erẹwho nọ o wọhọ oko-ame nọ o bi kporo ẹkẹre rọ kẹe.+
Wha ti vi evie, yọ a te wọ owhai fihọ abefẹ,A ti je fi owhai kpehru kpotọ evaọ ehru ighilawọ.
13 Wọhọ epanọ oni ọ rẹ sasa ọmọzae riẹ oma na,Ere mẹ te gbẹ sasa owhai oma;+Yọ wha ti wo omosasọ fiki Jerusalẹm.+
14 Wha te ruẹ onana, oghọghọ o vẹ te jọ udu rai,Igbenwa rai e te rro wọhọ ẹbe ọrọrọ.
Obọ* Jihova u ve ti dhesẹ oma via kẹ idibo riẹ,Rekọ o ti brukpe ewegrẹ riẹ.”+
15 “Keme Jihova ọ te nyaze wọhọ erae,+Yọ ekẹkẹ riẹ e wọhọ ofou ọwhibo,+Re ọ rehọ ofu ọgaga hwosa zihe,Re ọ rehọ erri ebruerae+ whọku.
16 Keme Jihova ọ te rehọ erae bruoziẹ,Ẹhẹ, ọ te rehọ ọgbọdọ riẹ rọsuọ uwo kpobi;*Yọ enọ Jihova o ti kpe e te jọ buobu.
17 “Enọ i bi ru omarai ọrẹri je bi ru omarai fo re a ruọ eva egbọ*+ na bi lele ọnọ ọ rrọ udevie na, enọ e be re uwo isi+ gbe eware etọtọ gbe idhogbi,+ aikpobi a ti te oba evaọ oke ovona,” ere Jihova ọ ta.
18 “Nọ orọnọ mẹ riẹ kpahe iruo rai gbe iroro rai na, mẹ be nyaze ti koko ahwo erẹwho gbe evẹrẹ kpobi họ, a te nyaze a vẹ te ruẹ oruaro mẹ.”
19 “Me ti fi oka jọ họ udevie rai, yọ me ti vi ejọ evaọ usu ahwo nọ a vabọ kpobọ erẹwho na—kpobọ Tashish,+ Pul, gbe Lọd,+ enọ i re si uze, kpobọ Tubal gbe Jevan,+ je kpobọ ikoliko nọ e rrọ ugbothabọ—enọ i ri yo usi kpahe omẹ hẹ hayo ruẹ oruaro mẹ hẹ; yọ a ti whowho oruaro mẹ evaọ udevie erẹwho na.+
20 A te rehọ enyenya, ekẹkẹ, ekẹkẹ nọ i wo uwou, isi, gbe ekamẹle nọ i re siawọ gaga rọ wọ inievo rai no erẹwho na kpobi ze+ kpobọ ugbehru ọrẹri mẹ, Jerusalẹm, rọ kẹ Jihova okẹ,” ere Jihova ọ ta, “nwane wọhọ epaọ okenọ ahwo Izrẹl a rẹ rehọ omodhe nọ ọ fo wọ ekẹ rai ziọ uwou Jihova.”
21 “Mẹ te jẹ rehọ ejọ kẹ izerẹ na gbe ahwo Livae na,” ere Jihova ọ ta.
22 “Keme nwane wọhọ epanọ idhiwu ekpokpọ gbe otọakpọ okpokpọ+ nọ mẹ be ma e te gbẹ jariẹ evaọ aro mẹ na,” ere Jihova ọ ta, “ere emọ* rai gbe odẹ rai e te gbẹ jariẹ.”+
23 “Yọ no ehaa ọvẹre ọkpokpọ te ehaa ọvẹre ọkpokpọ je no ẹdijala te ẹdijala,Uwo kpobi o te* nyaze ti guzou kpotọ evaọ aro mẹ,”*+ ere Jihova ọ ta.
24 “A te ruọ otafe, a ve rri iri ahwo nọ a wọso omẹ;Keme ihoi nọ e rrọ ehru rai i ti whu hu,Yọ a ti furie erae rai hi,+A ve ti zihe ruọ oware nọ u re tu ahwo kpobi* oma.”
Eme-Obotọ
^ Hayo “nọ ọ be ruawa kpahe.”
^ o sae jọ nọ, “ọnọ o bi jiri ẹmẹdhọ.”
^ Hayo “enọ e be ruawa kpahe.”
^ Hayo “Ogaga.”
^ Hayo “ahwo-akpọ kpobi.”
^ Koyehọ, oghẹrẹ egbọ jọ nọ a rẹ jọ gọ emedhọ.
^ Evaọ Hibru, “ubi.”
^ Hayo “Ahwo-akpọ kpobi a te.”
^ Hayo “te gọ omẹ.”
^ Evaọ Hibru, “uwo kpobi.”
