Hosia 13:1-16
13 “Nọ Ifremu ọ tẹ ta ẹme, ahwo a jẹ hai nuhu;Ọ jọ ọnọ a riẹ gaga evaọ Izrẹl.+
Rekọ ọ tẹ te reabe fiki Bale,+ o te whu.
2 Obọnana a bi fiba uzioraha raiA be rọ isiliva rai ma emema;*+A be rọ onaa ma emedhọ, oghoghẹrẹ onaa ọwena kpobi.
A be ta kẹ ae nọ, ‘Jọ ezae nọ i bi dhe idhe a viọlọ emema emọ-iruẹ na.’+
3 Fikiere a te jọ wọhọ ẹgho ohiohiẹ,Wọhọ igrigri nọ i re kri ẹhiẹ hẹ,Wọhọ ehọrọ nọ ofou ọwhibo o fou no oria nọ a rẹ jọ si ibi no igbe ekakọ,Jẹ wọhọ iwiri nọ i bi kuye no eghogho ehru uwou ze.
4 Rekọ mẹ họ Jihova Ọghẹnẹ ra no obọ ẹkwotọ Ijipti ze;+Whọ riẹ Ọghẹnẹ ọvo vẹre he u te no omẹ no,Yọ u te no omẹ no osiwi ọfa ọ rrọ họ.+
5 Mẹ riẹ owhẹ evaọ udhude,+ evaọ otọ nọ oso ọ jẹ rrọ fihọ họ.
6 A re eva vọ evaọ etọ ẹbe ọrọrọ rai,+A re eva vọ, omorro o tẹ ruọ udu rai.
Fikiere mẹ tẹ thọrọ ae ẹro.+
7 Mẹ te jọ wọhọ okpohrokpo ọgragra rọkẹ ae,+Wọhọ okeke nọ o dhere akotọ edhere.
8 Mẹ te họrọ mu ai wọhọ adaka nọ ọ gwọlọ emọ riẹ bẹ no,Mẹ te za udu rai rovie fihọ.
Mẹ te jọ etẹe re ae no wọhọ okpohrokpo;Arao ojihẹ obọ ẹwọ ọ te za ae ekekẹ.
9 Ọ te raha owhẹ, O Izrẹl,Keme whọ wọso omẹ, ọnọ o bi fiobọhọ kẹ owhẹ.
10 Kọ ovie ra ọ rrọ, re o siwi owhẹ evaọ ikpewho ra kpobi,+Gbe isu* ra, enọ whọ ta nọ,‘Kẹ omẹ ovie gbe ikpahwo-esuo’?*+
11 Mẹ rọ evedha kẹ owhẹ ovie,+Yọ ofu mẹ te rọ rehọ iẹe mi owhẹ.+
12 A fare* oruthọ Ifremu họ oware;A rawo uzioraha riẹ fihọ oria.
13 Edada eyẹ i ti tei oma.
Rekọ ọmọ nọ o wo areghẹ hẹ ọ rrọ;Ọ rọ oma lahwe he nọ okenọ a re ro yẹe u te.
14 Me ti siwi ai no ogaga Uki;*Me ti si ai no uwhu ze.+
Obi ra ọ rrọ, O Uwhu?+
Ogaga ọraha ra o rrọ, O Uki?+
A te ko ọdawẹ dhere no ibiaro mẹ.
15 O tẹ make rọnọ o bi vihọ evaọ udevie ikpoko na,Ofou ovatha-ọre ọ te tha, ofou Jihova,O ti no obọ udhude ze, re o ru oza riẹ gbe ẹtẹre-ame riẹ kpọ no.
Ọ te kwa eware eghaghae riẹ kpobi nọ e rrọ oria ekwakwa-aghae riẹ no.+
16 A ti brukpe Sameria,+ keme ọ wọso Ọghẹnẹ riẹ.+
Ọgbọdọ a ti ro kpe ai,+A te gbẹre emọ rai ekekẹ,Yọ a te bẹre eva eyae rai nọ i dihọ.”
Eme-Obotọ
^ Hayo “ghra eware ro ru emema.”
^ Evaọ Hibru, “emezae-ivie.”
^ Evaọ Hibru, “ibruoziẹ.”
^ Hayo “rawo.”
