Hosia 14:1-9
14 “O Izrẹl, zihe bru Jihova Ọghẹnẹ ra ze,+Keme who zoruẹ no fiki oruthọ ra.
2 Zihe bru Jihova ze, re whọ ta eme nana kẹe,Ta kẹe nọ, ‘Rehọ oruthọ mai vrẹ omai+ re whọ rehọ oware uwoma mi omai,Ma vẹ te rọ igbenu mai dhe idhe ujiro kẹ owhẹ+ wọhọ epanọ ma rẹ rọ emọ iruẹ ru na.*
3 Asiria o ti siwi omai hi.+
Ma te dhẹ enyenya ha,+Yọ ma te gbẹ ta kẹ eware nọ ma rọ abọ mai ru inọ “O Ọghẹnẹ mai!” hi,Keme whẹ họ ọnọ ọ rẹ re ohrọ ọmọ nọ o wo ọsẹ hẹ.’+
4 Me ti siwi ai no uzioraha rai.+
Mẹ te rọ iroro obọmẹ you rai,+Keme me gbe bi mu ofu kẹe he.+
5 Mẹ te jọ wọhọ igrigri kẹ Izrẹl;Ọ te whẹ erru họ wọhọ ododoỌ te ta awọ ruọ otọ kokodo wọhọ ire Lebanọn.
6 Ọ te za egha,Erru riẹ ọ te wọhọ orọ ure olivi,Yọ ore awere riẹ o te wọhọ orọ Lebanọn.
7 A te wariẹ rria otọ edhedhẹ riẹ.
A te mọ ibi jẹ whẹ ivo họ wọhọ ure evaene.+
A te riẹe odẹ* wọhọ epaọ enwaene Lebanọn.
8 Ifremu ọ te ta nọ, ‘Eme me gbe wo kugbe emedhọ?’+
Me ti yo kẹe jẹ sẹro riẹ.+
Mẹ te jọ wọhọ ure junipa nọ o rrọ bọbọbọ.
Ubi ra u ti no obọ mẹ ze.”
9 Ono o wo areghẹ? Jọ ọ riẹ otọ eware nana.
Ono o wo orimuo? Jọ ọ riẹ ae.
Keme idhere Jihova i kiete,+Yọ ikiẹrẹe e te nya evaọ eva rai;Rekọ erahaizi e te jarai zoruẹ.
Eme-Obotọ
^ Evaọ Hibru, “rọ iruẹ esese igbenu mai ro dhe idhe zihe kẹ owhẹ.”
^ Evaọ Hibru, “A te hae kareghẹhọ iẹe.”
