Hosia 4:1-19
4 O whai ahwo Izrẹl, wha yo ẹme nọ Jihova ọ ta,Keme Jihova o wo ẹdhọ kugbe ahwo nọ a be rria ẹkwotọ na,+Keme uzẹme hayo uyoyou nọ o rẹ hiẹ hẹ hayo eriariẹ Ọghẹnẹ e rrọ ẹkwotọ na ha.+
2 Iyei iduwu eviẹhọ gbe erue+ gbe ikpakpe+Gbe uji-utho gbe ẹnwae-obro+ e da otọ fia,Yọ a bi no azẹ-okpe ruọ azẹ-okpe.+
3 Fikiere ẹkwotọ na o ti weri+Yọ ohwo kpobi nọ ọ be rria eva riẹ ọ te whọlọ kuotọ;Erao ijihẹ obọ ẹwọ gbe evra obọ ehru,*Makọ iyei nọ e rrọ obọ abade, i ti whu.
4 “Rekọ, jọ ohwo ọvo o lele ai si ikẹ hayo whọku ai hi,+Keme ahwo ra a wọhọ enọ i re lele ozerẹ si ikẹ.+
5 Fikiere who ti zoruẹ evaọ uvo kekeke,Yọ ọruẹaro na o ti lele owhẹ zoruẹ, wọhọ ẹsenọ o rrọ aso.
Me ti ruru unu* oni ra.
6 A ti ruru unu* ahwo mẹ, keme a wo eriariẹ hẹ.
Fikinọ whọ siọ eriariẹ,+Mẹ te siọ owhẹ re, whọ te gbẹ jọ ozerẹ mẹ hẹ;Yọ fikinọ uzi* Ọghẹnẹ ra o thọrọ owhẹ ẹro no,+Emezae ra e te thọrọ omẹ omamẹ ẹro re.
7 Epanọ a bi bu te, ere a be raha izi mẹ bu te.+
Me ti zihe oruaro rai ruọ omovuọ.*
8 A be rọ ẹkwoma uzioraha ahwo mẹ kuọ oma rai,A be gwọlọ nọ ahwo mẹ a raha izi.
9 Epọvo na o te jọ kẹ ahwo na gbe ozerẹ na;Mẹ te rehọ ai guẹdhọ fiki oghẹrẹ nọ a bi ru,Yọ mẹ te kẹ ae uye fiki iruẹru rai.+
10 A te re emu rekọ eva e te vọ ae he.+
A ti bru igberẹ,* rekọ a ti vihọ họ,+Keme a be daezọ Jihova ha.
11 Igberẹ-ibro* gbe enwaene gbe enwaene ọkpokpọI re mi ohwo ọwhọ nọ o re ro ru oware nọ u kiehọ no.*+
12 Ahwo mẹ a be nọ emedhọ ire rai onọ a re ru,A bi ru onọ ọkpọ* rai ọ ta kẹ ae;Keme ẹzi igberẹ-ibro o bi su ai thọ,Yọ igberẹ-ibro* rai u ru nọ a gbe bi ro yoẹme kẹ Ọghẹnẹ rai hi.
13 A bi dhe idhe evaọ ehru igbehru na,+A bi ru idheidhe kuye iwiri evaọ ikpehru na,A rrọ otọ ire ok gbe ire storas gbe ure ulogbo kpobi,+Keme edhedhẹ rai ọ rrọ ziezi.
Oyejabọ nọ emetẹ rai a bi ro bru igberẹ*Yọ eyae emọ rai a bi bruẹnwae.
14 Mẹ te rọ emetẹ rai guẹdhọ fiki igberẹ-ibro* rai hi,Yọ mẹ te rọ eyae emọ rai guẹdhọ fiki ẹnwae-obro rai hi.
Keme ezae na a bi lele igberẹ naJe bi lele igberẹ etẹmpol na dhe idhe;Ahwo otiọye nọ a wo otoriẹ hẹ+ na a ti kpohọ ọraha.
15 Dede nọ who bi bru igberẹ,* O Izrẹl,+Jọ Juda ọ reabe he.+
Who du kpohọ Gilgal+ ha hayo kpohọ Bẹt-avẹn+ he,Yọ who duwu iyei hi inọ, ‘Nọ Jihova ọ rrọ uzuazọ na!’+
16 Keme wọhọ eruẹ* nọ o bi veghe uzou, ere Izrẹl o bi veghe uzou.+
Kọ Jihova ọ te rẹrote ai wọhọ ọmọ egbo nọ ọ rrọ oria uvevẹ nọ erao e rẹ jọ re ẹbe?*
17 Ifremu o kuomagbe emedhọ no.+
Vu ei wa!
18 Nọ udi ebiẹ* rai u te re no,A ve mu igberẹ-ibro họ.*
Yọ isu* riẹ a you omovuọ gaga.+
19 Ofou na ọ te rọ ibekpe riẹ wọe* vrẹ,Yọ idhe rai e te vuọ ae oma.”
Eme-Obotọ
^ Hayo “idhiwu.”
^ Hayo “Mẹ te raha.”
^ Hayo “uthubro.”
^ Hayo “A te raha.”
^ Hayo o sae jọ nọ, “A rehọ omovuọ nwene oruaro mẹ no.”
^ Hayo “duomahọ ọfariẹ-ogbe ọgaga.”
^ Evaọ Hibru, “I re mi ohwo udu no.”
^ Hayo “Ọfariẹ-ogbe.”
^ Hayo “ọkpọ ọgbẹva.”
^ Hayo “ọfariẹ-ogbe.”
^ Hayo “gbe-ọfariẹ.”
^ Hayo “ọfariẹ-ogbe.”
^ Hayo “gbe-ọfariẹ.”
^ Hayo “eruẹ aye.”
^ Evaọ Hibru, “oria nọ u whrowhro oma?”
^ Hayo “ebiẹ iwhiti.”
^ Hayo “duomahọ ọfariẹ-ogbe ọgaga.”
^ Evaọ Hibru, “ejese.”
^ Hayo “hwere iei.”
