Hosia 9:1-17
9 “Whọ ghọghọ họ, O Izrẹl,+Whọ ghọghọ wọhọ ahwo na ha.
Keme whọ rọ ẹkwoma igberẹ-ibro* nyasiọ Ọghẹnẹ ra ba no.+
Who you osohwa ọnọ o re bru igberẹ evaọ oria nọ a rẹ jọ si ibi no igbe ekakọ.+
2 Rekọ a te jọ oria nọ a rẹ jọ si ibi no igbe ekakọ na gbe oria udi-uruo na ruẹ emu rọ kuọ oma ha,Ọ te ruẹ enwaene ọkpokpọ gbe he.+
3 A te gbẹ rria ẹkwotọ Jihova ha;+Ukpoye Ifremu o ti zihe kpobọ Ijipti,Yọ a te jọ obọ Asiria re emu nọ ọ fo ho.+
4 A ti gbe ku enwaene ro dhe idhe kẹ Jihova ha;+Idhe rai e te were iẹe he.+
E wọhọ ebrẹdi uweri;Enọ e be re iẹe kpobi a ti gbe omarai ku.
Keme ebrẹdi rai e rrọ kẹ ae* ọvo;E te ziọ uwou Jihova ha.
5 Eme who ti ru evaọ ẹdẹ okokohọ,*Evaọ ẹdẹ ehaa Jihova?
6 Keme rri! a te dhẹ fiki ọraha.+
Ijipti o ti koko ai họ,+ yọ Mẹmfis o ti ki ai.+
Ebe osokpọ i ti ruru ekwakwa eghaghae isiliva rai,Ire inwe e te jọ evaọ iwou-udhu rai.
7 Edẹ nọ a te rọ rehọ ae guẹdhọ fiki eware nọ a ru e te tha,+Edẹ nọ a te rọ hwosa kẹ ae e te tha,Yọ Izrẹl ọ te riẹ.
Ọruẹaro rai ọ te jọ gheghẹ, yọ ohwo nọ ọ be ta nọ ẹzi Ọghẹnẹ ọ be rọ ta ẹme ọ te mọ oruẹ;Fikinọ oruthọ ra ọ re ruaro, ofu* nọ ọ rọsuọ owhẹ ọ re ruaro.”
8 Ororoke+ Ifremu ọ jọ kugbe Ọghẹnẹ mẹ.+
Rekọ enẹna eware kpobi nọ eruẹaro riẹ i bi ru+ e wọhọ eta omuemevra;Ofu* ọ rrọ uwou Ọghẹnẹ riẹ.
9 A raha thabọ no, wọhọ epaọ edẹ Gibiah.+
Ọ te kareghẹhọ oruthọ rai jẹ kẹ ae uye fiki izieraha rai.+
10 “Mẹ ruẹ Izrẹl wọhọ ibi-ire evaọ udhude.+
Mẹ ruẹ esẹ-esẹ rai wọhọ ibi ifigi ọsosuọ evaọ ure ifigi.
Rekọ a nyabru Bale ọrọ Piọ;+A rọ omarai kẹ oware* omovuọ na,+A te zihe ruọ oware otọtọ wọhọ oware nọ a you na.
11 Oruaro Ifremu o be ra vrẹ wọhọ ọvra;Ohwo ọvo o bi yẹ hẹ, ọvuọvo o bi dihọ họ, a be kẹ ọvuọvo eva ha.+
12 A tẹ maki yẹ emọ dede,Me ti kpe ai no bẹsenọ ohwo ọvo o re kiọkọ họ;+Ẹhẹ, uye u ti te ai okenọ mẹ te nyase ae ba!+
13 Ifremu nọ a kọ fihọ otọ nọ erao e rẹ jọ re ẹbe ọ jọ wọhọ Taya kẹ omẹ;+Obọnana Ifremu ọ rẹ rehọ emezae riẹ ziọ oria nọ a re jo kpe ai hrọ.”
14 O Jihova, kẹ ae oware nọ u fo nọ whọ rẹ kẹ ae;Edhede nọ ọ rẹ sai kru ọmọ họ gbe ivie nọ e ya fia.*
15 “Imuomu rai kpobi e jọ obọ Gilgal,+ etẹe me jo mukpahe ae.
Me ti le ai no uwou mẹ fiki iruẹru imuomu rai.+
Me ti gbe you rai hi;+Ikpahwo-esuo* rai kpobi e rrọ uzou gaga.
16 A ti ko Ifremu fihọ otọ.+
Owọ rai u ti whu no, yọ a te mọ ubi hi.
A tẹ maki yẹ, me ti kpe emọ rai nọ e were rai gaga na no.”
17 Ọghẹnẹ mẹ ọ te siọ ae,Keme a gaviezọ kẹe he,+A vẹ te jọ enọ e dhẹ kpohọ erẹwho efa.+
Eme-Obotọ
^ Hayo “ọfariẹ-ogbe.”
^ Hayo “ẹdẹ ehaa ra nọ who fihọ.”
^ Hayo “egrẹ.”
^ Hayo “Egrẹ.”
^ Hayo “ọghẹnẹ.”
^ Hayo “dhẹgo.”
^ Hayo “Emezae-ivie.”
