Ikelakele 23:1-30
23 Belam ọ tẹ ta kẹ Belak nọ: “Bọ egbada-idhe ihrẹ+ fihọ etenẹ, re whọ ruẹrẹ iruẹ ezae ihrẹ avọ igbo ihrẹ kpahe kẹ omẹ.”
2 Belak ọ tẹ nwani ru epanọ Belam ọ ta na. Belak avọ Belam a tẹ rehọ eruẹ ọzae ọvo gbe egbo ọvo dhe idhe evaọ ehru agbada-idhe ọvuọvo.+
3 Belam ọ tẹ ta kẹ Belak nọ: “Jọ etenẹ kugbe idhe emahọ ra, re mẹ nya. Ẹsejọhọ Jihova ọ te ta ẹme kẹ omẹ. Oware kpobi nọ ọ ta* kẹ omẹ, mẹ te vuẹ owhẹ.” Fikiere o te kpohọ ugbehru nọ oware ovo o rrọ họ.
4 Ọghẹnẹ ọ tẹ ta ẹme kẹ Belam,+ ọ tẹ kpahe kẹ Ọghẹnẹ nọ: “Mẹ bọ egbada-idhe ihrẹ fihọ ihie, yọ mẹ rehọ eruẹ ọzae ọvo gbe egbo ọvo dhe idhe evaọ ehru agbada-idhe ọvuọvo.”
5 Jihova o te fi ẹme họ Belam unu,+ ọ ta kẹe nọ: “Zihe bru Belak, yọ enẹ whọ rẹ ta.”
6 Fikiere o te zihe ọ tẹ ruẹ nọ Belak avọ ikpahwo-esuo Moab kpobi a dikihẹ gba idhe emahọ riẹ.
7 Kẹsena ọ tẹ ta ẹme ohare nana:+
“Belak ovie Moab ọ rehọ omẹ no obọ Eram ze,+Rono igbehru obọ ovatha-ọre ze inọ:
‘Nyaze te bọwo Jekọp ehao kẹ omẹ.
Ẹhẹ, nyaze ti brukpe* Izrẹl.’+
8 Ẹvẹ mẹ rẹ rọ bọwo ahwo nọ Ọghẹnẹ ọ bọwo ehao ho ehao?
Ẹvẹ me re ro brukpe ahwo nọ Jihova o brukpe he?+
9 Mẹ be ruẹ e rai no ehru igbehru-itho na ze,Jẹ be ruẹ e rai no ikpehru na ze.
Ae ọvo họ ahwo nọ a be rria etẹe;+A kele omarai kugbe erẹwho na ha.+
10 Ono ọ rẹ sai kele ibi-ẹkpẹ Jekọp+Hayo kele makọ abọvo abane Izrẹl?
Jọ me* whu uwhu ohwo nọ o kiete,Re ukuhọ mẹ o jọ wọhọ orai.”
11 Belak ọ tẹ ta kẹ Belam nọ: “Nọ eme na who ru omẹ na? Mẹ rehọ owhẹ ze re whọ bọwo ewegrẹ mẹ ehao, rekọ who ru oware ovo ho ukpoye whọ tẹ ghale ae.”+
12 Ọ tẹ kpahe kẹe nọ: “Kọ ogbẹrọnọ ẹme nọ Jihova o fihọ omẹ unu kpobi mẹ rẹ ta?”+
13 Belak ọ tẹ ta kẹe nọ: “Ivie nyaze ma kpohọ oria ofa nọ whọ sae jọ ruẹ e rai. Umutho rai jọ ọvo whọ te ruẹ; whọ te ruẹ e rai kpobi hi. Jọ etẹe bọwo ae ehao kẹ omẹ.”+
14 Fikiere ọ tẹ rehọ iẹe kpohọ ẹwọ Zofim, kpohọ ehru Pisga,+ ọ tẹ bọ egbada-idhe ihrẹ, ọ tẹ rehọ eruẹ ọzae ọvo gbe egbo ọvo dhe idhe evaọ ehru agbada-idhe ọvuọvo.+
15 Belam ọ tẹ ta kẹ Belak nọ: “Jọ etenẹ kugbe idhe emahọ ra, re mẹ nyabru Ọghẹnẹ* evaọ obei.”
16 Jihova o te lele Belam ta ẹme, o te fi ẹme họ iẹe unu, ọ ta kẹe nọ:+ “Zihe bru Belak, yọ enẹ whọ rẹ ta.”
17 Fikiere ọ tẹ nyabru ei ze, ọ tẹ ruẹ nọ ọ rrọ akotọ idhe emahọ riẹ be hẹrẹ, yọ ikpahwo-esuo Moab a rrọ kugbei. Belak ọ tẹ nọe nọ: “Eme Jihova ọ ta?”
18 Kẹsena ọ tẹ ta ẹme ohare nana:+
“Kpama Belak re whọ gaviezọ.
Gaviezọ kẹ omẹ, O ọmọzae Zipọ.
19 Ọghẹnẹ yọ ohwo-akpọ họ* nọ ọ rẹ ta erue,+Hayo ọmọ ohwo-akpọ họ nọ o re nwene iroro.*+
Nọ ọ tẹ ta oware, kọ o gbe ru ei?
Nọ ọ tẹ ta ẹme, kọ o gbe ru ei gba?+
20 Rri! A rehọ omẹ ze re mẹ ghale;Yọ obọnana Ọ ghale no,+ yọ mẹ rẹ sai nwene iei hi.+
21 Ọ rẹ kuvẹ hẹ re a rehọ ogaga emajiki nwa Jekọp oma,Yọ ọ rẹ kuvẹ hẹ re uye jọ u te Izrẹl oma.
Jihova Ọghẹnẹ riẹ ọ rrọ kugbe ai,+Yọ a bi jiri ei gaga inọ ọye họ ovie nọ ọ rrọ udevie rai.
22 Ọghẹnẹ ọ be rehọ ai no obọ Ijipti ze.+
Ọ wọhọ izei ogholi kẹ ae.+
23 Oka oware okpẹtu ovuovo nọ o te jọ obaro via kẹ Jekọp o riẹ hẹ,+Hayo ẹva-ọgba jọ kpahe Izrẹl.+
Evaọ obọnana a rẹ sae ta kpahe Jekọp avọ Izrẹl nọ:
‘Rri oware nọ Ọghẹnẹ o ru!’
24 Enana yọ ahwo nọ a te kpama wọhọ okpohrokpo,Yọ wọhọ okpohrokpo, ọye ọvo ọ te kpama.+
O ti rruẹ fihọ otọ họ bẹsenọ ọ rẹ re arao nọ o kpeJẹ da azẹ enọ a kpe no.”
25 Kẹsena Belak ọ tẹ ta kẹ Belam nọ: “Otẹrọnọ whọ sae bọwo ae ehao evuevo ho, who du ghale ae gbe he.”
26 Belam ọ tẹ kpahe kẹ Belak nọ: “Kọ mẹ gbẹ vuẹ owhẹ nọ, ‘Me ti ru oware kpobi nọ Jihova ọ ta’?”+
27 Belak ọ tẹ ta kẹ Belam nọ: “Ivie nyaze re mẹ jẹ rehọ owhẹ kpohọ oria ofa. Ẹsejọhọ u ti kiehọ evaọ aro Ọghẹnẹ uzẹme na re whọ jọ etẹe bọwo ae ehao kẹ omẹ.”+
28 Fikiere Belak ọ tẹ rehọ Belam kpohọ ehru Piọ, onọ o rẹriẹ ovao ku Jeshaemọn.*+
29 Kẹsena Belam ọ tẹ ta kẹ Belak nọ: “Bọ egbada-idhe ihrẹ fihọ etenẹ, re whọ ruẹrẹ iruẹ ezae ihrẹ avọ igbo ihrẹ kpahe kẹ omẹ.”+
30 Fikiere Belak o te ru epanọ Belam ọ ta na dẹẹ, ọ tẹ rehọ eruẹ ọzae ọvo gbe egbo ọvo dhe idhe evaọ ehru agbada-idhe ọvuọvo.
Eme-Obotọ
^ Hayo “dhesẹ.”
^ Hayo “te whọku.”
^ Hayo “re mẹ nyai lele iei ta ẹme.”
^ Hayo “ohwo-akpọ gheghe he.”
^ Hayo “nọ ọ rẹ ta nọ o hae jọ nọ mẹ riẹ.”
^ Hayo o sae jọ nọ, “udhude na.”
