Ilezi 12:1-8
-
Jihova ọ kpama re ọ jowọ
-
Eme Ọghẹnẹ e rrọ fuafo (6)
-
Ro se ọnọ o wuzou ile na; onọ a re kporo lele edo Shẹminit.* Ole Devidi.
12 Siwi omẹ, O Jihova, keme ohwo nọ a re fievahọ* ọ gbẹ riẹ hẹ;
Ahwo ọtẹruo a gbẹ riẹ hẹ.
2 A rẹ ta erue kẹ ohwohwo;
A re jiri ujiro igbenu* jẹ rọ idu eviẹhọ* ta ẹme.+
3 Jihova o ti bru igbenu nọ i bi jiri ujiro igbenu na kpobi kufiẹ
Gbe ẹrọo nọ o bi seha ilogbo na,+
4 Enọ e be ta nọ: “Ma te rọ ẹrọo mai fi kparobọ.
Ma rẹ rọ igbenu mai ta ẹme oghẹrẹ nọ u je omai;
Ono ọ sai su omai?”*+
5 “Fikinọ a bi kienyẹ ọnọ ọ be reoja,
Fiki imẹ-idio iyogbe na,+
Mẹ te kpama re me ru oware jọ,” ere Jihova ọ ta.
“Me ti siwi ai no obọ enọ i bi ru ai wọhọ ahwo nọ a fioka ha.”*
6 Eme Jihova e rrọ fuafo;+
E wọhọ isiliva nọ a ru fo evaọ umuwou-erae ẹkpẹ,* nọ a ru fo isiahrẹ.
7 Whọ te sẹro rai,* O Jihova;+
Whọ te thọ omomọvo rai no oge nana bẹdẹ bẹdẹ.
8 Irumuomu na a be nya epanọ u je rai
Keme emọ ahwo a bi jiri uruemu ogbekuo.*+
Eme-Obotọ
^ Hayo “ohwo nọ ọ rẹ talamu oware ezi.”
^ Evaọ Hibru, “Ẹrọo rai ọ rẹ whra.”
^ Evaọ Hibru, “rọ udu gbe udu.”
^ Hayo “Ono ọ te jọ olori mai?”
^ Hayo “enọ i bi fu uke kẹ ae.”
^ Hayo o sae jọ nọ, “umuwou-erae nọ a rẹ jọ ghra eware, onọ a bọ fihọ otọ.”
^ Hayo “Who ti rou rai.”
^ Hayo “a be wha uruemu ogbekuo họ aro.”
