Ilezi 69:1-36
Ro se ọnọ o wuzou ile na; onọ a ruẹrẹ ekporo riẹ họ lele “Idodo Obọ Ẹwọ.” Orọ Devidi.
69 Siwi omẹ, O Ọghẹnẹ, keme ame obuobu na ọ joma le omẹ no.*+
2 Me zue ruọ ọloho odidi no, nọ otọ ogaga o rrọ họ.+
Mẹ ruọ ame odidi no,Yọ oko-ame nọ o bi kporo ẹkẹre na ọ wọ omẹ vrẹ no.+
3 Oma o rrọ omẹ no fiki ubo;+Edhuru mẹ o di no.
Ibiaro mẹ i dhe no nọ mẹ be hẹrẹ Ọghẹnẹ mẹ na.+
4 Enọ i mukpahe omẹ gheghe gheghe+I bu vi eto uzou mẹ.
Enọ e gwọlọ kpe omẹ no,Ewegrẹ eviẹhọ mẹ* i bu gaga no.
A gba omẹ họ hwa oware nọ me tho ho.
5 O Ọghẹnẹ, whọ riẹ kpahe ugheghẹ mẹ,Yọ abe-ọriọ mẹ o dhere owhẹ hẹ.
6 Whọ jọ oma o vuọ enọ e rẹroso owhẹ hẹ fiki mẹ,O Olori nọ Ọ Mai Kpehru, Jihova olori egbaẹmo na.
Whọ jọ a ru oma vuọ enọ e be gwọlọ owhẹ hẹ fiki mẹ,O Ọghẹnẹ Izrẹl.
7 A be poviẹ omẹ fiki ra;+Oma o be vuọ omẹ gholo gholo.+
8 Me zihe ruọ ọrara kẹ inievo mẹ no,Me zihe ruọ ohwo orẹwho ọfa kẹ emezae oni mẹ no.+
9 Ọwhọ kẹ uwou ra o da omẹ oma fia,+Yọ eka nọ ahwo a be la owhẹ i hwẹ ku uzou mẹ no.+
10 Nọ mẹ siọ emuọriọ ba ro hrẹ oma* mẹ kpotọ,*A rehọ e riẹ poviẹ omẹ.
11 Nọ me zihe ehọ-ekpa* ruọ iwu mẹ,Me te zihe ruọ ohwo nọ a bi ro jijehwẹ.*
12 Mẹ ahwo nọ a rẹ keria unuẹthẹ okpẹwho na a re ro gbiku,Yọ mẹ egba-idi e be rọ so ile.
13 Rekọ ivie, yo olẹ mẹ,O Jihova, evaọ oke nọ u kiehọ.+
Fiki uyoyou ulogbo ra nọ o rẹ hiẹ hẹ, O Ọghẹnẹ,Yo kẹ omẹ ro dhesẹ nọ who re gine siwi ahwo ra.+
14 Siwi omẹ no ọloho;Whọ jọ omẹ zue ruọ obọ otọ họ.
Siwi omẹ no obọ enọ i mukpahe omẹJe no ame odidi na.+
15 Whọ kuvẹ re ame owhe nọ o bi kporo ẹkẹre na ọ wọ omẹ vrẹ hẹ,+Hayo re ame odidi na* o le omẹ no ho,Hayo re oza* na u bru ruru omẹ hẹ.+
16 Yo kẹ omẹ, O Jihova, keme uyoyou ra nọ o rẹ hiẹ hẹ o rrọ wowoma.+
Rẹriẹ ovao ku omẹ fiki ohrọ ulogbo ra,+
17 Ivie, whọ kuọ ovao ra dhere odibo ra ha.+
Yo kẹ omẹ vẹrẹ vẹrẹ, keme mẹ rrọ uye.+
18 Go kẹle omẹ re who siwi omẹ;Siwi* omẹ fiki ewegrẹ mẹ.
19 Whọ riẹ ẹpoviẹ nọ a poviẹ omẹ, omovuọ nọ a kpe họ omẹ oma, gbe ọghọ nọ a si no omẹ oma.+
Whọ be ruẹ ewegrẹ mẹ kpobi.
20 Ẹpoviẹ o bru ola họ omẹ udu, ola nọ a rẹ sai siwi kpo ho.*
Me je rẹro nọ a ti weri kẹ omẹ, rekọ kaka,+Gbe nọ ahwo a te sasa omẹ oma, rekọ mẹ ruẹ ohwo ọvo ho.+
21 Ukpenọ a kẹ omẹ emu kọ enua* a kẹ omẹ,+Nọ uruame u je kpe omẹ a tẹ kẹ omẹ iviniga re mẹ da.+
22 Jọ emẹjẹ rai o zihe ruọ ẹta kẹ ae,Re efe rai o zihe ruọ agbefẹ kẹ ae.+
23 Jọ ibiaro rai i thuru ebi re a gbẹ ruẹ ude he,Ru re eku rai o gbe kpakpakpa kẹse kẹse.
24 Kpare ofu* ra ku ai,Jọ ofu ọgaga ra o hwẹ ruru ai.+
25 Jọ evuẹ rai* o zihe ruọ ofofe;Jọ ohwo ọvo ọ rria iwou-udhu rai hi.+
26 Keme a bi le ohwo nọ whọ fa,*Yọ a be hae ta kpahe edada ahwo nọ whọ nwoma.
27 Fi abe-ọriọ ba abe-ọriọ rai,Jọ a kiẹrẹe evaọ aro ra vievie he.
28 Jọ a voro odẹ rai no obe ahwo nọ a rrọ uzuazọ,*+Whọ jọ a kere odẹ rai kugbe ikiẹrẹe na ha.+
29 Rekọ oja o be re omẹ yọ mẹ rrọ edada.+
Jọ ogaga esiwo ra o thọ omẹ, O Ọghẹnẹ.
30 Mẹ rẹ so ile jiri odẹ Ọghẹnẹ,Yọ mẹ te kpare iẹe kpehru ẹkwoma uyere nọ mẹ te kẹe.
31 Onana o te were Jihova vi eruẹ,O te were iẹe vi eruẹ ọgaga nọ o wo izei gbe ekothawọ.+
32 Enọ e be romakpotọ na e te ruẹ e riẹ a vẹ ghọghọ.
Whai enọ e be gwọlọ Ọghẹnẹ, jọ udu rai u dhidhivi.
33 Keme Jihova ọ be gaviezọ kẹ iyogbe,+Yọ ọ te siọ ahwo riẹ nọ a mu kpohọ igbo ho.+
34 Jọ odhiwu avọ otọakpọ na i jiri ei,+Ebade na gbe eware kpobi nọ e be nya eva rai.
35 Keme Ọghẹnẹ o ti siwi Zayọn+Jẹ wariẹ bọ ikpewho Juda,A vẹ te rria etẹe jẹ rehọ iẹe* reuku.
36 Ahwo uyẹ idibo riẹ a te rehọ iẹe reuku,+Yọ ahwo nọ a you odẹ riẹ+ a te rria eva riẹ.
Eme-Obotọ
^ Hayo “Enọ e rrọ ewegrẹ mẹ gheghe gheghe.”
^ Hayo o sae jọ nọ, “Nọ mẹ viẹ jẹ siọ emuọriọ ba.”
^ Hayo “ehọ-ẹkporo.”
^ Evaọ Hibru, “zihe ruọ ohare.”
^ Hayo “edidi na.”
^ Hayo “ọgọdọ.”
^ Hayo “Ta.”
^ Hayo “yọ omẹ u re no.”
^ Hayo “okakọ enua.”
^ Hayo “evedha.”
^ Hayo “evuẹ rai nọ a ma ugbẹhẹ wariẹ họ.”
^ Hayo “whọ bọwo; who duwu.”
^ Hayo “obe uzuazọ.”
^ Koyehọ, ẹkwotọ na.
