Ilezi 71:1-24
71 Whẹ họ oria adhẹzọ nọ mẹ dhẹ ro, O Jihova.
Whọ jọ a ru oma vuọ omẹ vievie he.+
2 Siwi omẹ re whọ jẹ thọ omẹ fiki ẹrẹreokie ra.
Fi ezọ ra hotọ* kẹ omẹ re who siwi omẹ.+
3 Zihe ruọ utho adhẹzọ kẹ omẹOria nọ mẹ rẹ dhẹ ro ẹsikpobi.
Jie uzi re a siwi omẹ,Keme whẹ họ ugbehru-utho mẹ gbe oria omofọwẹ mẹ.+
4 O Ọghẹnẹ mẹ, siwi omẹ no obọ ohwo omuomu na,+Rono obọ ọnọ o bi kienyẹ omẹ gheghe gheghe na.
5 Keme whẹ họ ẹruore mẹ, O Jihova Olori nọ Ọ Mai Kpehru na;Whẹ me fievahọ* no oke emaha mẹ ze.+
6 Whẹ mẹ rẹroso no anwọ oke nọ a ro yẹ omẹ ze;Whẹ họ ọnọ ọ rehọ omẹ no eva edhede oni mẹ ze.+
Me re jiri owhẹ kẹse kẹse.
7 Me zihe ruọ ohwo nọ o bi gbe ahwo buobu unu no,Rekọ whẹ họ oria adhẹzọ ọgaga mẹ.
8 Unu mẹ o vọ avọ ujiro rọkẹ owhẹ;+Ẹsikpobi* mẹ be ta kpahe oruaro ra.
9 Who gbolo omẹ kufiẹ hẹ evaọ oke owho mẹ;+Whọ nyasiọ omẹ ba ha evaọ okenọ ẹgba mẹ o te re no.+
10 Ewegrẹ mẹ a be ta ẹme wọso omẹ,Yọ enọ e be gwọlọ uzuazọ mẹ kpe* a bi si uzou koko gba ẹgwae mẹ,+
11 A be ta nọ: “Ọghẹnẹ ọ nyase iẹe ba no.
Wha lei re wha kru ei, keme ohwo ọvo ọ riẹ nọ o ti siwi ei hi.”+
12 O Ọghẹnẹ, whọ nya thabọ no omẹ hẹ.
O Ọghẹnẹ mẹ, nyaze vẹrẹ ti fiobọhọ kẹ omẹ.+
13 Enọ e be wọso omẹ*Jọ a ru oma vuọ ae re a whu.+
Enọ e be gwọlọ nọ okpẹtu o re te omẹJọ a si ọghọ no ai oma je ru oma vuọ ai gholo gholo.+
14 Rekọ rọkẹ omẹ, mẹ te ruabọhọ ẹhẹrẹ;Me ti jiri owhẹ vi epaọ ọsosuọ.
15 Unu mẹ u ti gbiku ẹrẹreokie ra,+Kẹdẹ kẹdẹ* mẹ te ta kpahe iruẹru esiwo ra,Dede nọ i bu vi epanọ mẹ sae rọ riẹ unu rai.*+
16 Mẹ te nyaze te ta kpahe iruo igbunu ra,O Jihova Olori nọ Ọ Mai Kpehru na;Mẹ te ta kpahe ẹrẹreokie ra, ọra ọvo.
17 O Ọghẹnẹ, who wuhrẹ omẹ no oke emaha mẹ ze,+Yọ rite inẹnẹ na, me gbe bi whowho iruo igbunu ra.+
18 Mẹ tẹ make who jẹ dhẹ eza no, O Ọghẹnẹ, whọ nyasiọ omẹ ba ha.+
Jomẹ vuẹ oge nọ ọ be tha kpahe ogaga* raJẹ vuẹ enọ e be te tha kpobi kpahe ẹgba ra.+
19 Ẹrẹreokie ra, O Ọghẹnẹ, o kpehru gaga;+Who ru eware ilogbo no;O Ọghẹnẹ, ono ọ wọhọ owhẹ?+
20 Dede nọ who ru omẹ rẹriẹ ovao dhe idhọvẹ gbe okpẹtu buobu no,+Wariẹ ru omẹ dhidhi aro vi;Rehọ omẹ no edidi* otọakpọ na ze.+
21 Ivie ru oruaro mẹ rro viereRe whọ thọ omẹ* jẹ sasa omẹ oma.
22 Kẹsena mẹ vẹ te rọ akpata-ifi jiri owhẹFiki ọtẹruo ra, O Ọghẹnẹ mẹ.+
Mẹ te so ile jiri* owhẹ avọ akpata nọ me bi kporo,O Ọrẹri Izrẹl.
23 Igbenu mẹ i ti bo ubo oghọghọ nọ mẹ be so ile jiri owhẹ na,+Keme who siwi uzuazọ* mẹ no.+
24 Ẹrọo mẹ ọ te ta kpahe* ẹrẹreokie ra kẹdẹ kẹdẹ,+Keme oma o te vuọ enọ e be gwọlọ epanọ a re ro kpe omẹ no.+
Eme-Obotọ
^ Hayo “Ruwẹ re whọ gaviezọ.”
^ Hayo “mẹ rẹroso.”
^ Hayo “Evaọ okpẹdoke na soso.”
^ Hayo “mẹ sai ro kele ai.”
^ Hayo “Evaọ okpẹdoke na soso.”
^ Evaọ Hibru, “ugbobọ.”
^ Hayo “ame odidi.”
^ Hayo “wariẹ omẹ họ.”
^ Hayo “Me ti kporo ile kẹ.”
^ Hayo “o ti roro didi kpahe.”
