Jerimaya 11:1-23
11 Onana họ ẹme nọ o no obọ Jihova bru Jerimaya ze, inọ:
2 “Wha yo eme ọvọ nana, whai ahwo!
“Ta* ae kẹ ezae Juda gbe ahwo nọ a be rria Jerusalẹm
3 re whọ ta kẹ ae nọ, ‘Enẹ Jihova Ọghẹnẹ Izrẹl ọ ta: “Uye u te* ohwo nọ o ru lele eme ọvọ nana ha,+
4 enọ me jie uzi rai kẹ esẹ-esẹ rai evaọ ẹdẹ nọ mẹ rọ rehọ ai no ẹkwotọ Ijipti ze,+ no umuwou-erae nọ a rẹ jọ ghra ayọno ze,+ inọ, ‘Wha yoẹme kẹ urru mẹ, re wha ru eware kpobi nọ me jie uzi rai kẹ owhai; wha vẹ te jọ ahwo mẹ, mẹ vẹ te jọ Ọghẹnẹ rai,+
5 re mẹ ruẹsi ru iyei nọ me duwu kẹ esẹ-esẹ rai gba, inọ mẹ te kẹ ae ẹkwotọ nọ ame-ivie gbe ọnyọ i bi jo su,+ wọhọ epanọ o rrọ nẹnẹ na.’”’”
Mẹ tẹ ta nọ: “Ami,* O Jihova.”
6 Kẹsena Jihova ọ tẹ ta kẹ omẹ nọ: “Whowho eme nana kpobi evaọ ikpewho Juda gbe evaọ iyẹrẹ Jerusalẹm, inọ: ‘Wha yo eme ọvọ nana, re wha ru lele ai.
7 Keme mẹ vẹvẹ esẹ-esẹ rai unu gaga evaọ ẹdẹ nọ mẹ rọ rehọ ai no ẹkwotọ Ijipti ze je rite ẹdẹ inẹnẹ na, me je dhe unuovẹvẹ na ẹwẹwariẹ,* inọ: “Wha yoẹme kẹ urru mẹ.”+
8 Rekọ a gaviezọ họ hayo fi ezọ rai hotọ họ; ukpoye, omomọvo ọ ruabọhọ jẹ rọ udu ogaga lele udu umuomu obọriẹ.+ Fikiere me te ru re eme kpobi nọ e rrọ ọvọ nana nọ me ro jie uzi kẹ ae na e via kẹ ae, keme a rọwo ru lele ai hi.’”
9 Kẹsena Jihova ọ tẹ ta kẹ omẹ nọ: “Ezae Juda avọ ahwo nọ a be rria Jerusalẹm a lẹlẹ gba ẹgwae omuomu jọ.
10 A zihe kpohọ iruthọ esẹ-esẹ anwae rai no, enọ e rọwo lele eme mẹ hẹ.+ Ae omarai a bi lele eghẹnẹ efa jẹ be gọ ae.+ Uwou Izrẹl avọ uwou Juda a raha ọvọ mẹ nọ mẹ re kugbe esẹ-esẹ rai no.+
11 Fikiere enẹ Jihova ọ ta, ‘Rri, mẹ be re họ okpẹtu+ nọ a te sae dhẹ vabọ họ ze ro te ai. Nọ a ti bo se omẹ kẹ obufihọ, mẹ te gaviezọ kẹ ae he.+
12 Kẹsena ikpewho Juda avọ ahwo nọ a be rria Jerusalẹm a vẹ te nyabru eghẹnẹ nọ a bi dhe idhe* kẹ na re a bo kẹ obufihọ,+ rekọ enana i ti siwi ai vievie he evaọ oke okpẹtu rai.
13 Keme eghẹnẹ ra e rrọ buobu wọhọ ikpewho ra, O Juda, yọ egbada-idhe nọ wha ro vi kẹ oware omovuọ na* e rrọ buobu wọhọ epanọ iyẹrẹ i bu te evaọ Jerusalẹm, egbada-idhe nọ a rẹ jọ dhe idhe kẹ Bale.’+
14 “Rọkẹ owhẹ,* whọ lẹ fiki ahwo nana ha. Who bo via fiki rai hi hayo lẹ olẹ rọkẹ ae he,+ keme mẹ te gaviezọ họ evaọ okenọ a ti bo se omẹ fiki okpẹtu rai.
15 Didi udu oyoyou mẹ o wo nọ ọ rẹ rọ jọ uwou mẹKpakiyọ ahwo buobu evaọ udevie rai a ru eware imuomu nọ a ma omaa rai no?
Kọ a te sae rehọ uwo ọrẹri* whaha okpẹtu na evaọ okenọ u ti bru owhai ze?
Kọ eva e te were owhẹ evaọ oke yena?
16 Jihova o je se owhẹ ure olivi nọ o rrọ bọbọbọ vẹre,Nọ u wo erru avọ emamọ ibi.
Avọ edo ọgaga o ro tu erae họ iẹe,Yọ a wiri egha riẹ no.
17 “Jihova olori egbaẹmo, Ọnọ ọ kọ owhẹ,+ ọ ta no inọ okpẹtu o ti bru owhẹ ze fiki umuomu nọ uwou Izrẹl avọ uwou Juda a ru, enọ i ru omẹ eva dha ẹkwoma idhe nọ a bi dhe kẹ Bale.”+
18 Jihova ọ vuẹ omẹ re mẹ riẹ;Evaọ oke yena, who ru nọ mẹ rọ ruẹ oware nọ a je ru.
19 Mẹ jọ wọhọ omogodẹ owowou nọ a bi su nyai kpe.
Mẹ riẹ nọ a jẹ ma omaa kpahe omẹ hẹ, inọ:+
“Joma raha ure na avọ ibi riẹ no,Re ma je kpei no ẹkwotọ enọ e rrọ uzuazọ no,Re a gbẹ kareghẹhọ odẹ riẹ ofa ha.”
20 Rekọ Jihova olori egbaẹmo o re bruoziẹ okiẹrẹe;Ọ rẹ kiẹ iroro nọ e mai diwi* gbe udu na riwi.+
Jomẹ ruẹ epanọ who ti ro ru ai kele,Keme whẹ me tu ẹdhọ mẹ kẹ no.
21 Fikiere, enẹ Jihova ọ ta kpahe ezae Anatọt+ nọ e be gwọlọ uzuazọ* ra kpe na, jẹ be ta nọ: “Whọ rehọ odẹ Jihova ruẹaro vievie he,+ o gbẹ rrọ ere he, whọ te jọ obọ mai whu”;
22 fikiere enẹ Jihova olori egbaẹmo ọ ta: “Rri, mẹ te rehọ ai guẹdhọ. A te rehọ ọgbọdọ kpe izoge emezae na,+ yọ ohọo u ti mu nọ u ti kpe emezae rai gbe emetẹ rai whu.+
23 Makọ ọvo dede o ti kiọkọ evaọ usu rai hi, keme mẹ te rehọ okpẹtu te ezae Anatọt+ evaọ ukpe nọ mẹ te rọ rehọ ai guẹdhọ na.”
Eme-Obotọ
^ O wọhọ nọ Jerimaya a ta ẹme nana kẹ.
^ Hayo “Eka i te.”
^ Hayo “Ere o rẹ jọ.”
^ Evaọ Hibru, “mẹ jẹ riọ kpama jẹ vẹvẹ ai unu.”
^ Hayo “ru iwiri idhe kuye.”
^ Hayo “ọghẹnẹ omovuọ na.”
^ Koyehọ, Jerimaya.
^ Koyehọ, idhe nọ a dhe evaọ etẹmpol na.
^ Hayo “iroro ididi obeva.” Evaọ Hibru, “ibieku.”
