Jerimaya 14:1-22
14 Onana họ ẹme Jihova nọ o bru Jerimaya ze kpahe oso nọ ọ be rrọ họ na:+
2 Juda o bi weri,+ yọ inuethẹ riẹ i kie no.
I zue ruọ otọ avọ ọkora,Yọ a be viẹ evaọ Jerusalẹm.
3 Ilori rai i vi idibo* rai nyai vo ame.
A nya kpohọ ighogho ame* na, rekọ a ruẹ ame he.
A zihe ze avọ ikolo ifofe.
Oma o be vuọ ae, yọ o be kẹ ae uye,A te je ruru izou rai.
4 Fiki oso nọ ọ be rrọ fihọ otọ na ha,Otọ na o tẹ va fihọ,+Ewhẹrẹ na e rrọ ọkora, yọ a ruru izou rai.
5 Makọ orua aye nọ ọ rrọ obọ ẹwọ o gbabọkẹ ọmọboba riẹFikinọ ẹbe ọ riẹ hẹ.
6 Eketekete ẹwọ i dikihẹ ehru ikpehru ivevẹ na.
A be wẹ fuele fuele wọhọ ikozi;Ibiaro rai i bi dhe no fikinọ ẹbe ọ riẹ hẹ.+
7 Dede nọ iruthọ obọmai i bi se isẹi kpe omai,O Jihova, ru oware jọ fiki odẹ ra.+
Keme iruẹru aghẹmeeyo mai e rrọ buobu,+Yọ whẹ họ ọnọ ma raha uzi riẹ.
8 O ẹruore Izrẹl, Osiwi riẹ+ evaọ etoke uye,Fikieme whọ rọ rrọ wọhọ ọrara evaọ ẹkwotọ na,Wọhọ ohwo nọ o bi kpohọ erẹ nọ o wohọ oria re ọ jọ etẹe asohẹrioke ọvo?
9 Fikieme whọ rọ wọhọ ohwo nọ o reghe no,Wọhọ ọgba nọ ọ rẹ sai siwi hi?
Keme whọ rrọ udevie mai, O Jihova,+Yọ a be rọ odẹ ra se omai.+
Who gbabọkẹ omai hi.
10 Enẹ Jihova ọ ta kpahe ahwo nana: “O rẹ were ai re a ghoro;+ Awọ rai ọ rẹ daji oria ovo ho.+ Fikiere eva rai e be were Jihova ha.+ Enẹna ọ te kareghẹhọ oruthọ rai, ọ vẹ rehọ ae guẹdhọ fiki izieraha rai.”+
11 Kẹsena Jihova ọ tẹ ta kẹ omẹ nọ: “Who du lẹ nọ eware i woma kẹ ahwo nana ha.+
12 Nọ a tẹ siọ emuọriọ ba, mẹ rẹ gaviezọ kẹ ayare rai hi,+ yọ nọ a te dhe idhe emahọ gbe idhe ibi ekakọ, e rẹ were omẹ hẹ,+ keme mẹ te rehọ ọgbọdọ, ohọo nọ u ti mu, gbe okpẹyao nọ o re vo* rọ raha ai no.”+
13 Fikiere mẹ tẹ ta nọ: “U yoma kẹhẹ, O Jihova Olori nọ Ọ Mai Kpehru na! Whaọ eruẹaro na e be ta kẹ ae nọ, ‘Wha te ruẹ ọgbọdọ họ, yọ ohọo u ti mu hu, rekọ mẹ te kẹ owhai uvi udhedhẹ evaọ oria nana.’”+
14 Kẹsena Jihova ọ tẹ ta kẹ omẹ nọ: “Eruẹaro na e be rọ odẹ mẹ ruẹaro erue.+ Me vi rai hi, hayo jie uzi kẹ ae he, hayo ta ẹme kẹ ae he.+ Aro nọ a be ruẹ kẹ owhai na yọ orọ ọrue, ẹva-ọgba nọ o fioka ha gbe eviẹhọ udu obọrai.+
15 Fikiere enẹ Jihova ọ ta kpahe eruẹaro nọ e be rọ odẹ mẹ ruẹaro na, dede nọ me vi rai hi, enọ e be ta nọ ọgbọdọ hayo ohọo nọ u re mu e te jọ ẹkwotọ nana ha: ‘Ọgbọdọ gbe ohọo i ti kpe eruẹaro yena whu.+
16 Yọ a ti gbolo ahwo nọ a be ruẹaro kẹ na lahwe fihọ iyẹrẹ Jerusalẹm fiki ohọo nọ u ti mu na gbe ọgbọdọ na, yọ ohwo ọvo o ti ki ai hi+—ai omarai, eyae rai, emezae rai, hayo emetẹ rai—keme me ti ku okpẹtu nọ u fo rai ku ai.’+
17 “Whọ rẹ ta ẹme nana kẹ ae hrọ,‘Jọ irui-oviẹ i su no ibiaro mẹ ze te aso te uvo, jọ i serihọ họ,+Keme a whọlọ oma ọmọtẹ-kọkọ ahwo mẹ kpobi no,+Omonwa riẹ o rro thesiwa.
18 Otẹrọnọ mẹ tẹ nya kpobọ ẹwọ nyai rri,Mẹ be ruẹ enọ ọgbọdọ na o kpe!+
Yọ otẹrọnọ mẹ ruọ evaọ okpẹwho na,Mẹ be ruẹ eyao nọ ohọo nọ u bi mu na o wha ze!+
Te ọruẹaro na te ozerẹ na a be nya wariẹ họ evaọ ẹkwotọ nọ a riẹ hẹ.’”+
19 Kọ whọ siọ Juda no riẹriẹriẹ, hayo kọ Zayọn o bi tu owhẹ oma?+
Fikieme who ro duwu omai, nọ who gbe bi ro siwi omai hi?+
Ma je rẹro udhedhẹ, rekọ oware uwoma ovo o ze he,Ma je rẹro oke usiwo, rekọ idudu họ oware nọ o riẹ!+
20 Ma rọwo umuomu mai, O Jihova,Jegbe oruthọ esẹ-esẹ mai,Keme ma raha uzi ra.+
21 Fiki odẹ ra, whọ siọ omai hi;+Whọ jẹ agbara-uvie oruaro ra kufiẹ hẹ.
Kareghẹhọ ọvọ nọ whọ re kugbe omai, whọ raha iẹe he.+
22 Kọ ọjọ evaọ usu emedhọ erẹwho na nọ i fioka ha na ọ sai ru oso rrọ,Hayo kọ idhiwu na dede e sae rọ iroro obọrai ru oso yoyo?
Kọ ogbẹrọnọ whẹ ọvo họ Ọnọ ọ rẹ sai ru ei, O Jihova Ọghẹnẹ mai?+
Ma fi ẹruore mai họ owhẹ,Keme whẹ ọvo họ ọnọ o ru eware nana kpobi no.
