Jerimaya 15:1-21
15 Kẹsena Jihova ọ tẹ ta kẹ omẹ nọ: “O tẹ make rọnọ Mosis avọ Samuẹle a dikihẹ aro mẹ dede,+ me ti dhesẹ uvumọ aruoriwo kẹ ahwo nana ha. Le ai no aro mẹ no. Jọ a nyavrẹ.
2 Yọ otẹrọnọ a nọ owhẹ nọ, ‘Diẹse ma re kpohọ?’ whọ rẹ ta kẹ ae hrọ inọ, ‘Enẹ Jihova ọ ta:
“Ohwo kpobi nọ ọ rrọ kẹ ẹyao ọgaga, jọ ẹyao ọgaga na o kpei!
Ohwo kpobi nọ ọ rrọ kẹ ọgbọdọ na, jọ ọgbọdọ na o kpei!+
Ohwo kpobi nọ ọ rrọ kẹ ohọo nọ u ti mu na, jọ ohọo na u kpei!
Yọ ohwo kpobi nọ ọ rrọ kẹ igbo, jọ o kpohọ igbo!”’+
3 “‘Me ti vi eware okpẹtu ene* bru rai,’+ ere Jihova ọ ta, ‘me ti vi ọgbọdọ na re o kpe, erakọ na re i si iri ahwo na vrẹ, gbe evra obọ ehru* na jegbe erao otọakpọ na re a re ai no jẹ raha ai no.+
4 Yọ me ti ru ae jọ oware idudu kẹ ekwotọ-ivie kpobi nọ e rrọ otọakpọ na+ fiki Manasẹ ọmọzae Hẹzikaya, ovie Juda, fiki oware nọ o ru evaọ Jerusalẹm.+
5 Ono o ti dhesẹ ọdawẹ kẹ owhẹ, O Jerusalẹm,Ono o ti weri kẹ owhẹ,Kọ ono ọ te wẹriẹ ze te nọ owhẹ kpahe epanọ eware e rrọ?’
6 ‘Who gbabọkẹ omẹ no,’ ere Jihova ọ ta.+
‘Who gbe bi kiukeku omẹ ọvo.*+
Fikiere mẹ te rriẹ obọ mẹ rọsuọ owhẹ jẹ raha owhẹ no.+
Ohrọ ra nọ mẹ be re* o bẹ omẹ no.
7 Mẹ te rehọ efọko frẹ rai kpehru evaọ inuethẹ ẹkwotọ na.
Me ti kpe emọ rai no.+
Mẹ te raha ahwo mẹ no,Nọ o rọnọ a rọwo kuomarẹriẹ no idhere rai hi na.+
8 Eyae-uku rai e te jọ aro mẹ bu vi uwẹkpẹ ebade na.
Mẹ te rehọ ọnọ ọ rẹ raha ọraha ze rọsuọ ae evaọ udevie uvo, rọsuọ ini gbe izoge emezae.
Mẹ te wha awaọruọ gbe ozọ họ ae oma idudhe.
9 Aro o bi aye nọ o yẹ emọ ihrẹ na no;Ẹwẹ* riẹ o bi te otọ te ehru hu.
Ọre riẹ o kiediwi no yọ oke u ri kpo ho,Onọ o be wha omovuọ sei je hrẹ riẹ kpotọ.’*
‘Yọ mẹ te rehọ umutho nọ i kiọkọ evaọ usu raiKẹ ọgbọdọ ewegrẹ rai,’ ere Jihova ọ ta.”+
10 Uye u te omẹ, O oni mẹ, fikinọ who yẹ omẹ,+Ohwo nọ ẹkwotọ na soso o bi lele whọ jẹ be họre.
Me momo kẹ ohwo ọvo hayo momo mi ohwo ọvo ho;Rekọ aikpobi a be bọwo omẹ ehao.
11 Jihova ọ ta nọ: “Mẹ te gbodibo kẹ owhẹ hrọ ro fiobọhọ kẹ owhẹ;Mẹ te lẹ rọkẹ owhẹ hrọ fiki ewegrẹ raEvaọ oke okpẹtu, evaọ oke uye.
12 Kọ ohwo jọ ọ sai wiri ayọno ibribro,Ayọno nọ u no obọ ẹkpẹlobọ ovatha-ọre ze, gbe ekọpa?
13 Mẹ te rehọ eware ra gbe ekwakwa-aghae ra kẹ ahwo nọ a rẹ kwa eware ahwo rehọ,+Orọnikọ fiki unuigho jọ họ, rekọ fiki izieraha ra kpobi nọ whọ raha evaọ ekwotọ ra kpobi.
14 Mẹ te rehọ ae kẹ ewegrẹ raRe a wha ae kpobọ ẹkwotọ nọ whọ riẹ hẹ.+
Keme ofu mẹ o ru erae muhọ ẹware noYọ e be mahe owhai.”+
15 Whọ riẹ, O Jihova,Kareghẹhọ omẹ re who ku ovao ra rẹriẹ bru omẹ ze.
Ru enọ i bi kpokpo omẹ kele kẹ omẹ.+
Whọ kẹ omẹ uvẹ whu hu* fikinọ whọ rẹ kaki mu ofu hu.
Riẹ nọ fiki ra mẹ be rọ reoja ekela nana.+
16 Mẹ ruẹ eme ra, mẹ tẹ re ae no;+Ẹme ra ọ tẹ lẹliẹ evawere gbe oghọghọ jọ udu mẹ,Keme a be rehọ odẹ ra se omẹ, O Jihova Ọghẹnẹ olori egbaẹmo.
17 Mẹ rẹ keria usu ahwo nọ a be re omaweromẹ re mẹ ghọghọ họ.+
Fikinọ obọ ra o rrọ ehru mẹ, mẹ keria omẹ sa,Keme who ru nọ evedha e rọ vọ omẹ eva.*+
18 Fikieme edada mẹ e rọ ga te enẹ, nọ a gbẹ be sai siwi ola mẹ kpo ho?
O be rọwo kpo ho.
Kọ whọ te jọ kẹ omẹ wọhọ eyeri ame eviẹhọNọ a rẹ sai fievahọ họ?
19 Fikiere enẹ Jihova ọ ta:
“Who te zihe ze, ẹsiẹe me ti siwi owhẹ,Who ve ti dikihẹ aro mẹ.
Otẹrọnọ whọ tẹ hẹriẹ oware nọ o rrọ ghaghae no oware nọ u fioka ha,Whọ te jọ wọhọ unu obọmẹ.*
A ti kuomarẹriẹ bru owhẹ ze,Rekọ who ti kuomarẹriẹ bru ai hi.”
20 “Me bi ru owhẹ fihọ ugbẹhẹ ekọpa ọgaga kẹ ahwo nana.+
A te siọ owhẹ ba ẹhọre he,Rekọ a ti fi owhẹ kparobọ họ,+Keme mẹ rrọ kugbe owhẹ re me siwi owhẹ jẹ thọ owhẹ,” ere Jihova ọ ta.
21 “Me ti siwi owhẹ no obọ ahwo omuomuJẹ te ta owhẹ no evabọ ahwo egeva.”
Eme-Obotọ
^ Hayo o sae jọ nọ, “oghẹrẹ edhọguo ene.” Evaọ Hibru, “iviuwou ene.”
^ Hayo “idhiwu.”
^ Hayo o sae jọ nọ, “Whọ be nya kpohọ emu ọvo.”
^ Hayo “Ẹda nọ o be da omẹ.”
^ Hayo o sae jọ nọ, “Oma o vo riẹ no.”
^ Evaọ Hibru, “Whọ rehọ omẹ vrẹ hẹ.”
^ Hayo “ovuẹ obrukpe o rọ vọ omẹ eva.”
^ Hayo “Who ti zihe ruọ ọtota mẹ.”