Jerimaya 16:1-21
16 Ẹme Jihova ọ tẹ wariẹ bru omẹ ze, inọ:
2 “Who re wo aye vievie he, yọ who re yẹ emezae gbe emetẹ evaọ oria nana vievie he.
3 Keme enẹ Jihova ọ ta kpahe emezae gbe emetẹ nọ a yẹ evaọ oria nana, gbe ini rai nọ i yẹ rai jegbe esẹ rai nọ i ru nọ a ro yẹ ai evaọ ẹkwotọ nana:
4 ‘Eyao egaga i ti kpe ai,+ rekọ ohwo ọvo o ti weri ai hayo ki ai hi; a te jọ wọhọ emaniọ evaọ otọ na.+ Ọgbọdọ gbe ohọo nọ u ti mu i ti kpe ai no,+ yọ iri rai i ti zihe ruọ emu rọkẹ evra obọ ehru* na jẹ rọkẹ erao otọakpọ na.’
5 Keme enẹ Jihova ọ ta,‘Whọ ruọ eva uwou nọ a be jọ re emu uweri hi,Yọ whọ nyae viẹ hayo weri kẹ ae he.’+
‘Keme me mi ahwo nana udhedhẹ mẹ no,’ ere Jihova ọ ta,‘Jegbe uyoyou mẹ nọ o rẹ hiẹ hẹ avọ ohrọ mẹ.+
6 Te ologbo te ọsese a ti whu evaọ ẹkwotọ nana.
A ti ki ai hi,Ohwo ọvo o ti weri ai hi,Yọ ohwo ọvo o ti bru ela họ oma hayo nware uzou fihọ rioriorio fiki rai hi.*
7 Ohwo ọvo ọ te kẹ enọ i bi weri emu hu,Re a sasa ae oma fiki ahwo rai nọ a whu;Yọ ohwo ọvo ọ te kẹ ae egho udi omosasọ họRe a da fiki ọsẹ hayo oni rai nọ o whu.
8 Yọ whọ rẹ ruọ eva uwou nọ a je bi ru ehaa emuọriọ họRe whọ keria kugbe ai re emu jẹ da.’
9 “Keme enẹ Jihova olori egbaẹmo, Ọghẹnẹ Izrẹl ọ ta, ‘Me ti ru edo evawere gbe edo oghọghọ, koyehọ edo uvou ọva gbe uvou ọmọtibobo serihọ evaọ oria nana, evaọ edẹ rai gbe evaọ iraro rai.’+
10 “Nọ whọ te ta eme nana kpobi kẹ ahwo nana, a te nọ owhẹ nọ, ‘Fikieme Jihova ọ rọ ta nọ okpẹtu ologbo nana kpobi o ti te omai? Eme ma ru thọ, kọ uzi Jihova Ọghẹnẹ mai vẹ ma raha?’+
11 Whọ rẹ kẹ ae uyo hrọ inọ, ‘“Fikinọ esẹ-esẹ rai e nyasiọ omẹ ba,”+ ere Jihova ọ ta, “a tẹ ruabọhọ je lele eghẹnẹ efa, be gọ ae je guzou kpotọ kẹ ae.+ Rekọ a nyasiọ omẹ ba, yọ a koko uzi mẹ hẹ.+
12 Whai omarai wha ru yoma vi esẹ-esẹ rai no,+ yọ whai omomọvo o bi lele udu umuomu aghẹmeeyo riẹ viukpenọ o re yoẹme kẹ omẹ.+
13 Fikiere me ti gbolo owhai kufiẹ no ẹkwotọ nana kpohọ ẹkwotọ nọ whai omarai hayo esẹ-esẹ rai a riẹ hẹ,+ wha vẹ te jọ obei gbodibo kẹ eghẹnẹ efa te aso te uvo,+ keme me ti dhesẹ uvumọ aruoriwo kẹ owhai hi.”’
14 “‘Rekọ, edẹ e be tha,’ ere Jihova ọ ta, ‘nọ a gbẹ te ta ha inọ: “Nọ Jihova, ọnọ ọ rehọ ahwo Izrẹl no ẹkwotọ Ijipti ze ọ rrọ uzuazọ na!”+
15 ukpoye, a te ta nọ: “Nọ Jihova, ọnọ ọ rehọ ahwo Izrẹl no obọ ẹkwotọ ẹkpẹlobọ ovatha-ọre ze je no ekwotọ kpobi nọ ọ vaha e rai kpohọ ze ọ rrọ uzuazọ na!” Yọ mẹ te rehọ ai zihe ziọ ẹkwotọ rai nọ mẹ rehọ kẹ esẹ-esẹ rai.’+
16 ‘Rri, mẹ be vuẹ se ikuori buobu re a nyaze,’ ere Jihova ọ ta,‘Yọ a te gwọlọ ai re a mu ai.
Nọ oyena o tẹ vrẹ no, mẹ te vuẹ se izuẹ buobu re a nyaze,Yọ a te gwọlọ ae ruẹ evaọ ehru ugbehru kpobi gbe ehru ukpehru kpobi,Gbe evaọ eria nọ e bẹre rovie fihọ evaọ igbehru-itho na.
17 Keme ibiaro mẹ i bi rri oware kpobi nọ a bi ru.*
I dhere no omẹ hẹ,Yọ oruthọ rai o dhere no ibiaro mẹ hẹ.
18 Orọ ọsosuọ, mẹ te hwosa oruthọ rai gbe uzioraha rai kẹ ae vọvọ,+Keme a rehọ emema emedhọ etọtọ rai nọ i wo uzuazọ họ* zue ẹkwotọ mẹ no,A tẹ jẹ rehọ eware etọtọ rai vọ ukuoriọ mẹ no.’”+
19 O Jihova, ẹgba mẹ gbe oria omofọwẹ mẹ,Oria mẹ nọ mẹ rẹ dhẹ kpohọ evaọ ẹdẹ uye,+Erẹwho na i ti no oka avọ oka otọakpọ na bru owhẹ ze,A vẹ te ta nọ: “Esẹ-esẹ mai e reuku eware eviẹhọ gheghe,Eware ifofe nọ i wo iruo ho, nọ e rẹ kẹ erere ọvo ho.”+
20 Kọ ohwo ọ rẹ sai ru eghẹnẹ kẹ omariẹKpakiyọ eghẹnẹ e ginẹ rrọ họ?+
21 “Fikiere me ti ru ae riẹ,Me ti ru ae riẹ kpahe ogaga mẹ gbe ẹgba mẹ evaọ oke nana,A vẹ te riẹ nọ odẹ mẹ họ Jihova.”
Eme-Obotọ
^ Hayo “idhiwu.”
^ Nọ uruemu nọ egedhọ a re ru nọ a tẹ rrọ uweri, onọ o wọhọ nọ ahwo Izrẹl nọ a siọ orọwọ na no a je ru.
^ Evaọ Hibru, “i bi rri idhere rai kpobi.”
^ Evaọ Hibru, “iri emedhọ etọtọ rai.”
