Jerimaya 22:1-30
22 Enẹ Jihova ọ ta: “Nya kpobọ uwou* ovie Juda, re who whowho ovuẹ nana.
2 Whọ rẹ ta kẹ ae hrọ inọ, ‘Yo ẹme nọ Jihova ọ ta, O ovie Juda nọ ọ keria agbara-uvie Devidi, te owhẹ te idibo ra gbe ahwo ra, enọ e rẹ rọ inuethẹ nana ruọ eva.
3 Enẹ Jihova ọ ta: “Wha bru uvioziẹ je ru oware ukiẹrẹe. Wha siwi ọnọ a bi fru eware riẹ rehọ na no obọ ofiwhayo na. Wha re ru ọrara ọvuọvo nọ ọ be rria udevie rai yoyoma ha, yọ wha rẹ nwa ọmọ nọ o wo ọsẹ hẹ* hayo aye-uku ọvuọvo oma ha.+ Yọ wha re kpe azẹ ekueku ọvo evaọ oria nana ha.+
4 Wha tẹ romatotọ ru lele ẹme nana, ivie nọ e be keria agbara-uvie Devidi+ e vẹ te rehọ inuethẹ uwou nana ruọ eva, yọ a rrọ eva ekẹkẹ gbe ehru enyenya, te ai te idibo rai gbe ahwo rai.”’+
5 “‘Rekọ otẹrọnọ wha gbe ru lele eme nana ha, mẹ be rehọ omobọ mẹ duwu iyei,’ ere Jihova ọ ta, ‘inọ uwou nana u ti zihe ruọ oria nọ a raha no.’+
6 “Keme enẹ Jihova ọ ta kpahe uwou ovie Juda,‘Whẹ wọhọ Giliad kẹ omẹ,Wọhọ obehru Lebanọn.
Rekọ me ti ru owhẹ fihọ udhude;A te gbẹ rria ikpewho ra ọvuọvo ho.+
7 Mẹ te rehọ enọ e rẹ raha ọraha mu* re a rọsuọ owhẹ,+Omomọvo avọ ọvuọ ekwakwa ẹmo riẹ.
A ti ko ire sida ra nọ e mai woma fihọ otọA ve ru ai kie fihọ erae.+
8 “‘Erẹwho buobu e te nya akotọ okpẹwho nana vrẹ yọ a be nọ ohwohwo nọ: “Fikieme Jihova o ro ru okpẹwho ologbo nana enẹ?”+
9 A vẹ te kẹ uyo nọ: “Fikinọ a nyasiọ ọvọ Jihova Ọghẹnẹ rai ba, a te je guzou kpotọ kẹ eghẹnẹ efa jẹ gọ ae.”’+
10 Who du viẹ kẹ ọnọ o whu no na ha,Yọ who du weri kẹe gbe he.
Ukpoye, viẹ whrowhrowhro rọkẹ ọnọ a bi mu vrẹ na,Keme o ti gbe zihe ze te ruẹ ẹkwotọ nọ a jọ yẹi na ofa ha.
11 “Keme enẹ Jihova ọ ta kpahe Shalọm*+ ọmọzae Josaya, ovie Juda, ọnọ o bi su evaọ ẹta Josaya ọsẹ riẹ,+ ọnọ o no oria nana vrẹ no: ‘O ti gbe zihe ze ofa ha.
12 Keme o ti whu evaọ obonọ ọ jẹ rrọ igbo na, yọ ọ te gbẹ ruẹ ẹkwotọ nana ofa ha.’+
13 Uye u te ọnọ ọ be rọ edhere nọ o kiẹrẹe he bọ uwou riẹJẹ be rehọ edhere okienyẹ bọ ibriwou obehru riẹ,Ọnọ o re ru ọrivẹ riẹ gbodibo kẹe kufiẹ,Nọ ọ rẹ rọwo hwosa kẹe he;+
14 Ọnọ ọ be ta nọ, ‘Mẹ te bọ uwou ulogbo jọ kẹ omamẹAvọ ibriwou obehru nọ e rrọ lelele.
Me ve ti fi inwido họ iẹeJẹ rehọ ire sida hwae, mẹ vẹ rọ ọda ọwawae okuekue ralọ iẹe.’
15 Kọ whọ te ruabọhọ esuo fikinọ whọ rehọ ire sida ru eware vi amọfa?
Ọsẹ ra ọ re jẹ da,Rekọ o bru uvioziẹ je ru oware nọ u kiẹrẹe,+Yọ eware e riẹ nya kẹe.
16 Ọ jẹ thothọ enọ e jẹ reoja gbe iyogbe nọ i wo ẹdhọ,Eware e tẹ riẹ nya.
‘Kọ ogbẹrọnọ oware nọ u dhesẹ nọ ohwo ọ riẹ omẹ oye?’ ere Jihova ọ ta.
17 ‘Rekọ ibiaro gbe udu ra e tọvi epanọ who re ro wo erere ewhariọ ọvo,Epanọ who re ro kpe azẹ ekueku,Gbe epanọ who re ro fi iwhayo je fru ahwo re.’
18 “Fikiere enẹ Jihova ọ ta kpahe Jehoyakim+ ọmọzae Josaya, ovie Juda,‘A ti weri ei hi, inọ:
“U yoma kẹhẹ, oniọvo-ọmọzae mẹ! U yoma kẹhẹ, oniọvo-ọmọtẹ mẹ!”
A ti weri ei hi, inọ:
“U yoma kẹhẹ, O Olori! U yoma kẹhẹ, Ovie!”
19 Oghẹrẹ nọ a re ro ki eketekete a ti ro ki ei,+Ọnọ a re si kpenẹ avọ enẹ, a ve gbolo iei kufiẹFihọ otafe inuethẹ Jerusalẹm.’+
20 Nya kpobọ Lebanọn re who bo via,Kpare uvou ra evaọ Beshan,Re who bo via no obọ Abarim ze,+Keme a kpe ese ra nọ e be dhẹ lele owhẹ kpobi no.+
21 Mẹ ta ẹme kẹ owhẹ okenọ who roro nọ who wo omofọwẹ.
Rekọ whọ ta nọ, ‘Me ti yoẹme kẹ owhẹ hẹ.’+
Enẹ uruemu ra o rrọ no anwọ uzoge ra ze,Keme who ri ti yoẹme kẹ urru mẹ hẹ.+
22 Ofou ọ te wọ ithuru-igodẹ ra kpobi vrẹ,+Yọ ese ra nọ e be dhẹ lele owhẹ na i ti kpohọ igbo.
Kẹsena okpẹtu kpobi nọ o ti te owhẹ o ve ti ru oma vuọ owhẹ je hrẹ owhẹ kpotọ.
23 O whẹ ọnọ ọ be rria Lebanọn,+Nọ ọ be rria udevie ire sida na,+Rri epanọ who ti dimẹ okenọ edada e te jọ owhẹ oma,Edada* nọ e wọhọ erọ aye nọ o bi yẹ!”+
24 “‘Nọ mẹ rrọ uzuazọ na,’ ere Jihova ọ ta, ‘o tẹ make rọnọ whẹ Konaya*+ ọmọzae Jehoyakim,+ ovie Juda, yọ ẹmẹro oka-ukpehọ* nọ ọ rrọ obọze mẹ, me ti wolo owhẹ noi no!
25 Mẹ te rehọ owhẹ họ obọ enọ e be gwọlọ uzuazọ* ra kpe, obọ enọ whọ be dhozọ rai, obọ Nebukadneza* ovie Babilọn, gbe obọ ahwo Kaldia na.+
26 Me ti gbolo owhẹ avọ oni ra nọ o yẹ owhẹ fihọ ẹkwotọ nọ a jọ yẹ owhai hi, yọ obei wha te jọ whu.
27 Yọ a ti zihe ziọ ẹkwotọ nọ o bi si ai urru na vievie he.+
28 Kọ ọzae nana, Konaya, yọ othẹ gheghe nọ a jẹ kufiẹ, nọ a kpe no,Othẹ nọ ohwo ọvo ọ gwọlọ họ?
Kọ fikieme a ro gbolo ọyomariẹ avọ ahwo uyẹ riẹ fihọ otọ,Je gbolo ai fihọ ẹkwotọ nọ a riẹ hẹ?’+
29 O otọakpọ,* otọakpọ, otọakpọ, yo ẹme nọ Jihova ọ ta.
30 Enẹ Jihova ọ ta:
‘Kere odẹ ọzae nana fihọ otọ inọ o wo ọmọ họ,Inọ ọzae nọ oware ovo u ti woma kẹ evaọ oke uzuazọ* riẹ hẹ ọ rrọ,Keme ohwo ọvo evaọ uyẹ riẹỌ te sae keria agbara-uvie Devidi re ọ wariẹ su evaọ Juda ha.’”+
Eme-Obotọ
^ Hayo “ighẹ.”
^ Hayo “ọmọ nọ o wo ọsẹgboni hi.”
^ Evaọ Hibru, “Me ti ru enọ e rẹ raha ọraha fo.”
^ A re je sei Jehoahaz.
^ Evaọ Hibru, “Edada eyẹ.”
^ A re je sei Jehoyakin gbe Jẹkonaya.
^ Evaọ Hibru, “Nebukadreza,” oghẹrẹ ofa nọ a kere i rie.
^ Hayo “otọ.”
^ Evaọ Hibru, “edẹ.”
