Jerimaya 24:1-10
-
Emamọ ifigi gbe ikpehre ifigi (1-10)
24 Kẹsena Jihova o te dhesẹ ikete ivẹ nọ ibi-ure ifigi e rrọ kẹ omẹ evaọ aro etẹmpol Jihova, evaọ okenọ Nebukadneza* ovie Babilọn o mu Jẹkonaya*+ ọmọzae Jehoyakim,+ ovie Juda, te ikpahwo-esuo Juda, ewena na, gbe idhogu* na kpohọ igbo no; o mu rai no Jerusalẹm kpohọ Babilọn.+
2 Ibi-ure ifigi nọ i woma gaga wọhọ ifigi ọsosuọ e jọ ekete jọ, rekọ ibi-ure ifigi nọ i yoma gaga te epanọ a gbẹ sae rọ re ae he e tẹ jọ ekete ọdekọ.
3 Jihova ọ tẹ nọ omẹ nọ: “Eme whọ be ruẹ, Jerimaya?” Mẹ tẹ ta nọ: “Ibi-ure ifigi; emamọ ifigi na i woma gaga, rekọ ikpehre na i yoma gaga, i yoma te epanọ a gbẹ sae rọ re ae he.”+
4 Kẹsena ẹme Jihova o te bru omẹ ze, inọ:
5 “Enẹ Jihova Ọghẹnẹ Izrẹl ọ ta, ‘Wọhọ epanọ emamọ ifigi nana e rrọ na, ere mẹ te rehọ emamọ ubiẹro rri ahwo Juda nọ a mu kpohọ igbo na, enọ me le no oria nana kpohọ ẹkwotọ ahwo Kaldia na.
6 Me ti fi ẹro mẹ họ ae rọkẹ ewoma rai, me ve ti ru ai zihe ziọ ẹkwotọ nana.+ Mẹ te bọ ai dikihẹ, yọ me ti kporo ai kuotọ họ; mẹ te kọ ae, yọ me ti vi ai no otọ họ.+
7 Mẹ te kẹ ae udu nọ a rẹ rọ riẹ omẹ, inọ mẹ họ Jihova.+ A te jọ ahwo mẹ, mẹ vẹ te jọ Ọghẹnẹ rai,+ keme a te rọ udu rai kpobi zihe bru omẹ ze.+
8 “‘Rekọ kpahe ikpehre ifigi na nọ i yoma te epanọ a gbẹ sae rọ re ae he na,+ enẹ Jihova ọ ta: “Ere me ti rri Zẹdikaya ovie+ Juda, ikpahwo-esuo riẹ, ikiọkotọ Jerusalẹm nọ i kiọkọ ẹkwotọ nana, gbe enọ e be rria ẹkwotọ Ijipti.+
9 Me ti ru ae jọ oware idudu avọ okpẹtu kẹ ekwotọ-ivie kpobi nọ e rrọ otọakpọ na,+ jẹ jọ oware ekela, oware nọ a re ro bru ohare, oware ijehwẹ, jegbe oware nọ a rẹ rọ bọwo ehao+ evaọ oria kpobi nọ mẹ vaha e rai kpohọ.+
10 Yọ me ti vi ọgbọdọ,+ ohọo nọ u ti mu, gbe okpẹyao nọ o re vo* bru ae,+ bẹsenọ a re whu muotọ no evaọ ẹkwotọ nọ mẹ rọ kẹ ae jẹ rọ kẹ esẹ-esẹ rai na.”’”
Eme-Obotọ
^ Evaọ Hibru, “Nebukadreza,” oghẹrẹ ofa nọ a kere i rie.
^ A re je sei Jehoyakin gbe Konaya.
^ Hayo o sae jọ nọ, “enọ e rẹ ma igbẹhẹ ilogbo.”
^ Hayo “ẹyao.”
