Jerimaya 26:1-24
26 Evaọ obọ emuhọ esuo Jehoyakim+ ọmọzae Josaya, ovie Juda, ẹme nana o te no obọ Jihova ze:
2 “Enẹ Jihova ọ ta, ‘Dikihẹ evaọ ighẹ uwou Jihova re whọ ta ẹme kpahe* ahwo ikpewho Juda kpobi nọ a be nyaze te gọ* evaọ uwou Jihova na. Vuẹ ae oware kpobi nọ me jie uzi riẹ kẹ owhẹ; who si uvumọ ẹme noi hi.
3 Ẹsejọhọ a te gaviezọ, omomọvo o ve ti kurẹriẹ no edhere omuomu riẹ, me ve ti nwene iroro mẹ* kpahe okpẹtu nọ mẹ jiroro nọ me re ro te ai na fiki iruẹru imuomu rai.+
4 Ta kẹ ae nọ: “Enẹ Jihova ọ ta, ‘Otẹrọnọ wha gbẹ gaviezọ kẹ omẹ hẹ ẹkwoma uzi* mẹ nọ mẹ kẹ owhai na nọ wha re koko,
5 ẹkwoma eme idibo mẹ, eruẹaro na nọ wha rẹ gaviezọ kẹ, enọ me bi vi se owhai evievi na,* nọ wha be gaviezọ kẹ hẹ na,+
6 me ti ru uwou nana re o jọ wọhọ epanọ Shailo ọ rrọ na,+ yọ me ti ru okpẹwho nana fihọ oware nọ a rẹ rọ bọwo ehao rọkẹ erẹwho kpobi nọ e rrọ otọakpọ na.’”’”+
7 Izerẹ na gbe eruẹaro na gbe ahwo na kpobi a yo evaọ okenọ Jerimaya ọ be ta eme nana evaọ uwou Jihova na.+
8 Fikiere nọ Jerimaya ọ ta eme kpobi nọ Jihova o jie uzi kẹe nọ ọ ta kẹ ahwo na kpobi no, izerẹ na gbe eruẹaro na gbe ahwo na kpobi a tẹ jabọ kru ei, a tẹ ta nọ: “Whọ te seba ewhu hu.
9 Fikieme whọ be rọ rehọ odẹ Jihova ruẹaro, inọ, ‘Uwou nana u ti zihe ruọ epanọ Shailo ọ rrọ na, yọ a te raha okpẹwho nana no, ohwo ọvo ọ gbẹ te rriae he’?” Ahwo na kpobi a te su wariẹ Jerimaya họ evaọ uwou Jihova.
10 Nọ ikpahwo-esuo Juda a yo eme nana, a te no obọ uwou* ovie na ze ziọ uwou Jihova, a tẹ keria obọ aro unuẹthẹ okpokpọ uwou Jihova na.+
11 Izerẹ na gbe eruẹaro na a tẹ ta kẹ ikpahwo-esuo na gbe ahwo na kpobi nọ: “U fo nọ ọzae nana o re whu,+ keme ọ be ruẹaro nọ eware iyoma e te via kẹ okpẹwho nana nwane wọhọ epanọ wha rehọ ezọ obọrai yo na.”+
12 Kẹsena Jerimaya ọ tẹ ta kẹ ikpahwo-esuo na gbe ahwo na kpobi nọ: “Jihova họ ọnọ o vi omẹ nọ mẹ rehọ eme kpobi nọ wha yo na ruẹaro kpahe uwou nana gbe okpẹwho nana.+
13 Fikiere enẹna, wha nwene idhere rai gbe iruẹru rai, re wha yoẹme kẹ urru Jihova Ọghẹnẹ rai, Jihova o ve ti nwene iroro riẹ* kpahe okpẹtu nọ ọ ta nọ o ti ro te owhai na.+
14 Rekọ rọkẹ omẹ, mẹ rrọ owhai obọ. Wha ru omẹ oware kpobi nọ u woma je kiehọ evaọ aro rai.
15 Wha thakpe riẹ ọvo nọ wha te kpe omẹ, wha ti kpe azẹ ekueku fihọ uzou obọrai gbe uzou okpẹwho nana gbe ahwo nọ a be rriae eva, keme evaọ uzẹme, Jihova họ ọnọ o vi omẹ bru owhai ze re mẹ ta eme nana kpobi re wha yo.”
16 Kẹsena ikpahwo-esuo na gbe ahwo na kpobi a tẹ ta kẹ izerẹ na avọ eruẹaro na nọ: “Ọzae nana o fo uwhu hu, keme odẹ Jihova Ọghẹnẹ mai ọ rọ ta ẹme kẹ omai na.”
17 Ofariẹ, ekpako ẹkwotọ na jọ e tẹ kparoma, a te mu ukoko ahwo na soso họ ẹta kẹ nọ:
18 “Maeka+ ohwo Morẹshẹt ọ jẹ ruẹaro evaọ oke Hẹzikaya ovie+ Juda, ọ tẹ ta kẹ ahwo Juda kpobi nọ, ‘Enẹ Jihova olori egbaẹmo ọ ta:
“A ti kporo Zayọn wọhọ udhu,Jerusalẹm o ti zihe ruọ okpẹwho nọ a raha kuotọ,+Yọ ugbehru Uwou* na o te jọ wọhọ eria ikpehru nọ e rrọ owhawho.”’*+
19 “Kọ Hẹzikaya ovie Juda avọ Juda soso a kpe rie? Kọ ogbẹrọnọ ọ dhozọ Jihova ọ tẹ lẹ kẹ aruoriwo Jihova,* onọ u ru nọ Jihova o ro nwene iroro riẹ* kpahe okpẹtu nọ ọ ta nọ o ti ro te ai na?+ Fikiere okpẹtu ologbo ma be gwọlọ si se omamai na.
20 “Yọ ọzae ọfa jọ ọ jariẹ nọ ọ jẹ rehọ odẹ Jihova ruẹaro re, Uraejah ọmọzae Shimaya ohwo Kiriat-jierim,+ ọnọ ọ rehọ oghẹrẹ eme Jerimaya na ruẹaro eware nọ e te via kẹ okpẹwho nana gbe ẹkwotọ nana.
21 Jehoyakim ovie na+ avọ ezae egaga riẹ kpobi gbe ikpahwo-esuo riẹ a yo eme riẹ, ovie na ọ tẹ jẹ gwọlọ iẹe kpe.+ Nọ Uraejah o yo onana, ozọ o tẹ nwani mu ei họ emu, ọ tẹ dhẹ kpobọ Ijipti.
22 Kẹsena Jehoyakim ovie na o te vi Ẹlnetan+ ọmọzae Akbọ avọ ezae efa nọ e jọ kugbei kpobọ Ijipti.
23 A tẹ rehọ Uraejah no obọ Ijipti ze, a tẹ rehọ iẹe se Jehoyakim ovie na, ọnọ ọ rehọ ọgbọdọ duwu iei kpe,+ a te gbolo ori riẹ fihọ oria nọ a re ki ahwo gheghe fihọ.”
24 Rekọ Ahaekam+ ọmọzae Shefan+ ọ jọ abọ Jerimaya, fikiere a gbe siobọnoi kẹ ahwo na re a kpei no ho.+
Eme-Obotọ
^ Hayo “kẹ.”
^ Hayo “ti guzou kpotọ.”
^ Hayo “o vẹ te da omẹ.”
^ Hayo “uthubro.”
^ Evaọ Hibru, “mẹ be riọ kpama je vi.”
^ Hayo “ighẹ.”
^ Hayo “o te da Jihova.”
^ Hayo “ugbehru etẹmpol.”
^ Hayo “otọ nọ ikpire e vọ.”
^ Hayo “o tẹ da Jihova.”
^ Hayo “ọ tẹ daoma ru ovao Jihova ghariẹ.”
