Jerimaya 27:1-22
27 Evaọ obọ emuhọ esuo Jehoyakim ọmọzae Josaya, ovie Juda, ẹme nana o te no obọ Jihova bru Jerimaya ze, inọ:
2 “Enẹ Jihova ọ ta kẹ omẹ, ‘Ru ifi gbe ekpọ owhowha kẹ omara, re who fi ae họ uriohọ ra.
3 Kẹsena whọ vẹ rehọ ae kẹ enyukọ nọ e nyaze Jerusalẹm bru Zẹdikaya ovie Juda ze na re a wha ai se ovie Edọm,+ ovie Moab,+ ovie ahwo Ammọn,+ ovie Taya,+ gbe ovie Saedọn.+
4 Jie uzi nana kẹ ae ro se ilori rai:
“‘“Enẹ Jihova olori egbaẹmo, Ọghẹnẹ Izrẹl ọ ta; enẹ wha rẹ ta kẹ ilori rai,
5 ‘Mẹ họ ọnọ ọ rehọ ogaga ulogbo mẹ avọ ugbobọ mẹ nọ o rriẹ fihọ ma otọakpọ na, ahwo-akpọ, gbe erao nọ e rrọ otọakpọ na; yọ mẹ rehọ e riẹ kẹ ohwo kpobi nọ u je omẹ.*+
6 Whaọ enẹna mẹ rehọ ekwotọ nana kpobi họ obọ Nebukadneza ovie+ Babilọn odibo mẹ no; makọ erao ẹwọ na dede mẹ rehọ e rai kẹe no re e gbodibo kẹe.
7 Erẹwho na kpobi e te gbodibo kẹe avọ ọmọzae riẹ gbe ọmọ-uruọmọ* riẹ bẹsenọ oke ẹkwotọ obọriẹ u ti ro te,+ nọ erẹwho buobu gbe ivie ilogbo i ti ro ru ei fihọ ọrigbo rai.’+
8 “‘“‘Otẹrọnọ orẹwho jọ hayo uvie jọ o gbẹ rọwo gbodibo kẹ Nebukadneza ovie Babilọn ho, o gbẹ jẹ rọwo fi uriohọ riẹ họ otọ owhowha ovie Babilọn ho, mẹ te rehọ ọgbọdọ,+ ohọo nọ u ti mu, gbe okpẹyao nọ o re vo* kẹ orẹwho yena uye,’ ere Jihova ọ ta, ‘bẹsenọ mẹ rẹ rehọ obọ riẹ raha ae muotọ no.’
9 “‘“‘Fikiere, wha gaviezọ kẹ eruẹaro rai hi, te enọ e rẹ kiotọ gwọlọ eware oka kẹ owhai, ewezẹ-ewezẹ rai, enọ i re ru emajiki kẹ owhai, gbe egbẹva rai, enọ e be ta kẹ owhai nọ: “Wha te gbodibo kẹ ovie Babilọn ho.”
10 Keme a be ruẹaro erue kẹ owhai, fikiere a te rehọ owhai no ẹkwotọ rai kpohọ ugbothabọ, yọ mẹ te vaha owhai, wha ve ti whu.
11 “‘“‘Rekọ orẹwho nọ u fi uriohọ riẹ họ otọ owhowha ovie Babilọn jẹ gbodibo kẹe, mẹ te kẹe uvẹ re ọ gbẹ jọ* ẹkwotọ riẹ,’ ere Jihova ọ ta, ‘re ọ kọ eware fihọ iẹe jẹ rriae.’”’”
12 Epọvo na mẹ ta kẹ Zẹdikaya ovie+ Juda, inọ: “Wha fi uriohọ rai họ otọ owhowha ovie Babilọn re wha gbodibo kẹe gbe ahwo riẹ, wha vẹ te gbẹ jọ uzuazọ.+
13 Fikieme ọgbọdọ,+ ohọo nọ u ti mu,+ gbe okpẹyao nọ o re vo+ i re ro kpe owhẹ avọ ahwo ra, wọhọ epanọ Jihova ọ ta nọ o te via kẹ orẹwho nọ o te rọwo gbodibo kẹ ovie Babilọn ho?
14 Wha gaviezọ kẹ eme eruẹaro na ha, enọ e be ta kẹ owhai nọ, ‘Wha te gbodibo kẹ ovie Babilọn ho,’+ keme a be ruẹaro erue kẹ owhai.+
15 “‘Keme me vi rai hi,’ ere Jihova ọ ta, ‘rekọ a be rehọ odẹ mẹ ruẹaro erue, onọ o te whae ze nọ mẹ te rọ vaha owhai, wha ve ti whu, te owhai te eruẹaro nọ e be ruẹaro kẹ owhai na.’”+
16 Mẹ ta kẹ izerẹ na gbe ahwo nana kpobi nọ: “Enẹ Jihova ọ ta, ‘Wha gaviezọ kẹ eme eruẹaro rai hi, enọ e be ruẹaro kẹ owhai nọ: “Rri! A ti zihe ekwakwa uwou Jihova no obọ Babilọn ze kẹle!”+ keme a be ruẹaro erue kẹ owhai.+
17 Wha gaviezọ kẹ ae he. Wha gbodibo kẹ ovie Babilọn, wha vẹ te gbẹ jọ uzuazọ.+ Kọ fikieme okpẹwho nana u re ro zihe ruọ oria nọ a raha no?
18 Rekọ otẹrọnọ eruẹaro a rrọ, yọ otẹrọnọ ẹme Jihova ọ rrọ kugbe ai, ivie jọ a lẹ Jihova olori egbaẹmo re a siọ ekwakwa nọ i kiọkọ uwou Jihova, uwou* ovie Juda, gbe Jerusalẹm ba ẹrehọ vrẹ kpobọ Babilọn.’
19 “Keme enẹ Jihova olori egbaẹmo ọ ta kpahe ipila na,+ Abade* na,+ ighelie-eware na,+ gbe ekwakwa nọ i kiọkọ nọ a nyaseba okpẹwho nana,
20 enọ Nebukadneza ovie Babilọn ọ kwa ha evaọ okenọ o mu Jẹkonaya ọmọzae Jehoyakim, ovie Juda kpohọ igbo no Jerusalẹm kpobọ Babilọn, te ikpahwo kpobi nọ e rrọ Juda gbe Jerusalẹm;+
21 ẹhẹ, enẹ Jihova olori egbaẹmo, Ọghẹnẹ Izrẹl ọ ta kpahe ekwakwa nọ a nyaseba uwou Jihova, uwou* ovie Juda, gbe Jerusalẹm:
22 ‘“A te rehọ ai kpobọ Babilọn,+ a vẹ te jọ obei bọo ẹdẹ nọ mẹ te rẹriẹ ovao mẹ ku ae,” ere Jihova ọ ta. “Kẹsena mẹ vẹ te rehọ ae zihe ze, me ve ru ai wariẹ rria oria nana.”’”+
Eme-Obotọ
^ Evaọ Hibru, “kẹ ohwo nọ o kiehọ evaọ ibiaro mẹ.”
^ Nọ ọmọzae.
^ Hayo “ẹyao.”
^ Evaọ Hibru, “re o serihọ evaọ.”
^ Hayo “ighẹ.”
^ Koyehọ, Abade ekọpa nọ o rrọ etẹmpol na.
^ Hayo “ighẹ.”
