Jerimaya 30:1-24
-
Eyaa ezihe tha gbe usiwo (1-24)
30 Ẹme nọ o no obọ Jihova bru Jerimaya ze, inọ:
2 “Enẹ Jihova Ọghẹnẹ Izrẹl ọ ta, ‘Kere eme kpobi nọ mẹ te ta kẹ owhẹ fihọ obe.
3 Keme “rri! edẹ e be tha,” ere Jihova ọ ta, “nọ me ti ro koko enọ a mu evaọ udevie ahwo mẹ, Izrẹl avọ Juda họ,”+ ere Jihova ọ ta, “mẹ vẹ te rehọ ae zihe ziọ ẹkwotọ nọ mẹ rọ kẹ esẹ-esẹ rai na, a vẹ te wariẹ woi.”’”+
4 Enana họ eme nọ Jihova ọ ta kẹ Izrẹl avọ Juda.
5 Enẹ Jihova ọ ta:
“Ma yo edo ahwo nọ a bi nuhu;Idudu e riẹ, udhedhẹ o riẹ hẹ.
6 Ivie, wha nọ sọ ọzae ọ rẹ sai yẹ.
Kọ fikieme mẹ jẹ be ruẹ ọzae ọgaga kpobi nọ ọ rọ abọ duọ eva*Wọhọ aye nọ o bi yẹ?+
Fikieme ovao ohwo kpobi o be rọ fo?
7 U yoma kẹhẹ! Keme ẹdẹ yena yọ ẹdẹ oyoma.*+
Ẹdẹ nọ o wo ibe he,Oke idhọvẹ rọkẹ Jekọp.
Rekọ a ti siwi ei noi.”
8 “Yọ evaọ ẹdẹ yena,” ere Jihova olori egbaẹmo ọ ta, “me ti wiri owhowha na no uriohọ ra, yọ mẹ te sawo ifi ra* ibro ivẹ; erara* i gbe ti ru ei* fihọ ọrigbo rai ofa ha.
9 A te gbodibo kẹ Jihova Ọghẹnẹ rai gbe Devidi ovie rai, ọnọ me ti ro mu kẹ ae.”+
10 “Rọkẹ owhẹ, Jekọp odibo mẹ, jọ ozọ u mu owhẹ hẹ,” ere Jihova ọ ta,“Who guegue he, O Izrẹl.+
Keme me ti siwi owhẹ evaọ ugbothabọ,Je ti siwi emọ ra evaọ ẹkwotọ nọ a jọ rrọ igbo.+
Jekọp o ti zihe ze, ọ te jọ rirẹ jẹ jọ ababọ ukpokpoma,Ohwo ọvo o ti ru ozọ mu ai hi.”+
11 “Keme mẹ rrọ kugbe owhẹ,” ere Jihova ọ ta, “re me siwi owhẹ.
Rekọ me ti kpe ahwo erẹwho kpobi nọ mẹ vaha owhẹ kpohọ na muotọ;+Rekọ me ti kpe owhẹ muotọ họ.+
Mẹ te whọku owhẹ* te epanọ u fo,Yọ mẹ te siọ owhẹ uye ba ẹkẹ hẹ.”+
12 Keme enẹ Jihova ọ ta:
“Usiwo ovo o rrọ rọkẹ omonwa ra na ha.+
A rẹ sai siwi ola ra kpo ho.
13 Ohwo ọvo ọ riẹ nọ ọ rẹ lẹ kẹ owhẹ hẹ,Edhere ọvo nọ a re ro siwi ola ra kpo ọ riẹ hẹ.
Usiwo ovo o riẹ kẹ owhẹ hẹ.
14 Ese ra nọ e be dhẹ lele owhẹ kpobi a kpairoro vrẹ owhẹ no.+
A gbẹ be gwọlọ owhẹ hẹ.
Keme oviaviẹ ọwegrẹ mẹ rọ fa owhẹ na,+Uye ohwo ọgeva mẹ kẹ owhẹ na,Fiki abe-ọriọ ologbo ra gbe izieraha ibuobu ra.+
15 Fikieme who je bi bo fiki omonwa ra?
A rẹ sai siwi edada ra kpo ho!
Fiki abe-ọriọ ologbo ra gbe izieraha ibuobu ra+Me ro ru owhẹ enẹ na.
16 Fikiere, a te raha ahwo kpobi nọ a be raha owhẹ no,+Ewegrẹ ra kpobi i ti kpohọ igbo re.+
A ti tho eware enọ i bi tho eware ra,Yọ me ti ru re a kwa eware ahwo kpobi nọ a be kwa eware ra rehọ.”+
17 “Rekọ me ti ru re whọ wariẹ wo omokpokpọ, yọ me ti siwi ela ra,”+ ere Jihova ọ ta,“Dede nọ a bi se owhẹ ọnọ a leri, inọ:
‘Zayọn, ọnọ ohwo ọvo ọ be gwọlọ họ.’”+
18 Enẹ Jihova ọ ta:
“Rri, me bi koko ahwo uwou-udhu Jekọp nọ a mu kpohọ igbo na họ,+Yọ mẹ te re ohrọ iwou-udhu riẹ.
A te wariẹ bọ okpẹwho na fihọ ehru ukpehru riẹ,+Yọ uwou ukpehru nọ o rẹ bẹ ẹvẹruọ na u ti dikihẹ oria nọ u fo nọ o rẹ jọ.
19 A te kẹ uyere, yọ a te jọ udevie rai yo edo ehwẹ.+
Me ti ru ai vihọ, a te jọ kakao ho;+Me ti ru ai jọ buobu,*A te jọ kakao ho.+
20 Emezae riẹ i ti zihe ruọ epanọ a jọ okenọ u kpemu,Yọ a ti ru ogbotu ahwo riẹ dikihẹ gaga evaọ aro mẹ.+
Me ti dhesẹ akpọ kẹ ahwo kpobi nọ a bi kienyẹe.+
21 Omọvo ahwo riẹ jọ ọ te jọ ohwo ologbo riẹ,Yọ udevie riẹ osu riẹ o ti no ze.
Me ti si ei kẹle oma, yọ ọ te nyabru omẹ ze.”
“O gbẹ rrọ ere he, ono ọ rẹ dawo iẹe* nyabru omẹ ze?” ere Jihova ọ ta.
22 “Wha te jọ ahwo mẹ,+ yọ mẹ te jọ Ọghẹnẹ rai.”+
23 Rri! Ofou ọwhibo Jihova o ti du lahwe avọ ofu,+Okpofou ọgaga nọ o ti fou kurẹriẹ evaọ ehru uzou irumuomu na.
24 Ofu ọgaga Jihova o ti kuomarẹriẹ zihe heBẹsenọ o re ru eware nọ e rrọ udu riẹ gba no.+
Evaọ abọ urere edẹ na wha ti wo otoriẹ onana.+
Eme-Obotọ
^ Hayo “otorẹ.”
^ Evaọ Hibru, “ologbo.”
^ Evaọ Hibru, “eware nọ a rọ gba owhẹ.”
^ Hayo “ahwo erẹwho efa.”
^ Hayo “ai.”
^ Hayo “Mẹ te kpọ owhẹ họ.”
^ Hayo o sae jọ nọ, “wo ọghọ.”
^ Evaọ Hibru, “ọ rẹ rọ udu riẹ viowa.”
