Jerimaya 31:1-40
31 Jihova ọ ta nọ: “Evaọ oke yena, mẹ te jọ Ọghẹnẹ rọkẹ iviuwou Izrẹl kpobi, yọ a te jọ ahwo mẹ.”+
2 Enẹ Jihova ọ ta:
“Ahwo nọ ọgbọdọ na o kpe he yọ ahwo nọ Ọghẹnẹ o dhesẹ aruoriwo kẹ evaọ udhude naEvaọ okenọ Izrẹl ọ jẹ nya kpohọ oria eriosehọ riẹ.”
3 Jihova ọ romavia kẹ omẹ evaọ ugbothabọ, ọ tẹ ta nọ:
“Uyoyou ebẹdẹ bẹdẹ me wo kẹ owhẹ.
Oyejabọ nọ mẹ rọ rehọ uyoyou nọ o rẹ hiẹ hẹ si owhẹ kẹle omamẹ.*+
4 Mẹ te wariẹ owhẹ bọ, yọ who ti dikihẹ.+
O whẹ ọmọtẹ-kọkọ Izrẹl, whọ te wariẹ tọlọ ejẹjẹ raWho ve bi gbile nya avọ oghọghọ.*+
5 Whọ te wariẹ kọ egbọ evaene evaọ igbehru Sameria;+Enọ e rẹ kọ na e te kọ jẹ reawere ibi rai.+
6 Keme ẹdẹ jọ ọ te tha nọ iroroke nọ e rrọ igbehru Ifremu a ti bo via nọ:
‘Wha kparoma, joma nya kpobọ Zayọn bru Jihova Ọghẹnẹ mai.’”+
7 Keme enẹ Jihova ọ ta:
“Wha rehọ evawere bo se Jekọp.
Wha bo ubo oghọghọ keme wha wuzou erẹwho na.+
Wha whowho iei; wha kẹ ujiro re wha ta nọ,‘O Jihova, siwi ahwo ra, ikiọkotọ Izrẹl na.’+
8 Mẹ be rehọ ai zihe no obọ ẹkwotọ ẹkpẹlobọ ovatha-ọre ze.+
Me ti koko ai họ no eria nọ e mai thabọ evaọ otọakpọ na ze.+
Enọ i tuaro gbe enọ e ko e te jọ usu rai,+Te aye nọ o dihọ gbe ọnọ o bi yẹ, aikpobi usu.
Ogbotu ahwo buobu o ti zihe ziọ etenẹ na.+
9 A te nyaze avọ oviẹ.+
Me ti su ai nọ a be lẹ kẹ aruoriwo na.
Me ti su ai kpohọ iko-ame,*+Evaọ edhere nọ ọ rrọ praprarapra nọ o ti ru ai zoruẹ hẹ.
Keme mẹ yọ Ọsẹ rọkẹ Izrẹl, yọ Ifremu họ ọmọ ọsosuọ mẹ.”+
10 Wha yo ẹme nọ Jihova ọ ta, whai erẹwho,Re wha whowho iei evaọ udevie ikoliko nọ e rrọ ugbothabọ,+ inọ:
“Ọnọ ọ vaha Izrẹl na o ti koko iei họ.
O ti rou* iei wọhọ epanọ othuru-igodẹ o re rou uthuru riẹ na.+
11 Jihova ọ te ta Jekọp no igbo+Je siwi ei no obọ* ọnọ ọ ga vi ei.+
12 A te nyaze a ve bo ubo oghọghọ evaọ ehru ugbehru Zayọn,+Ovao rai o te jọ sasasa fiki ewoma* Jihova,Fiki ibi ekakọ avọ enwaene ọkpokpọ+ gbe ewhri na,Gbe fiki erao eboba nọ e rrọ uthuru erao gbe owa erao na.+
A te jọ wọhọ ọgbọ nọ a bi ku ame ku ziezi,+Yọ oma o gbẹ te lọhọ ae vievie he.”+
13 “Evaọ oke yena, ọmọtẹ-kọkọ o ti gbile avọ oghọghọ,Te izoge emezae gbe ekpọkuezae na re.+
Me ti nwene uweri rai kpohọ evawere.+
Mẹ te sasa ae oma jẹ kẹ ae oghọghọ viukpọ uweri nọ a rrọ na.+
14 Mẹ te kẹ izerẹ na emu buobu,*Yọ emamọ eware nọ mẹ te kẹ ahwo mẹ e te vọ ae eva,”+ ere Jihova ọ ta.
15 “Enẹ Jihova ọ ta:
‘A yo urru jọ evaọ Rema,+ enuobro gbe oviẹ ogaga:
Reshẹl ọ be viẹ fiki emezae* riẹ.+
Ọ rọwo nọ a sasa iẹe oma ha fiki emezae riẹ,Keme a gbẹ rrọ họ.’”+
16 Enẹ Jihova ọ ta:
“‘Seri oviẹ họ je ru re irui-oviẹ e siọ ibiaro ra ba enoze,Keme a te hwa owhẹ osa iruẹru ra,’ ere Jihova ọ ta.
‘A ti zihe no obọ ẹkwotọ ọwegrẹ na ze.’+
17 ‘Ẹruore ọ riẹ rọkẹ owhẹ evaọ obaro,’+ ere Jihova ọ ta.
‘Emezae ra i ti zihe ziọ ẹkwotọ obọrai.’”+
18 “Ababọ avro, me yo imẹ-idio Ifremu no, inọ,‘Whọ kpọ omẹ họ, yọ me ru lele ọkpọvio na no,Wọhọ ọmọ-eruẹ nọ a ri wuhrẹ hẹ.
Rehọ omẹ zihe ze, me ti gine kuomarẹriẹ,Keme whẹ họ Jihova Ọghẹnẹ mẹ.
19 Keme eware nọ me ru vrẹ no e da omẹ gaga okenọ me kuomarẹriẹ no;+Nọ a ru omẹ wo otoriẹ no, mẹ tẹ tehe ekpokpowọ mẹ avọ uweri.
Oma o vuọ omẹ gaga,+Fiki eware nọ me ru evaọ oke uzoge mẹ.’”
20 “Kọ ogbẹrọnọ Ifremu yọ ọmọzae ọghaghae kẹ omẹ, ọmọ nọ me you?+
Keme oke kpobi nọ mẹ be ta oware nọ me ti ru ei, me re wo iroro iwoma kpahe iẹe ghele.
Oyejabọ nọ o be rọ da omẹ kẹe* na.+
Yọ mẹ te siọ ohrọ riẹ ba ẹre he,” ere Jihova ọ ta.+
21 “Fi eka họ edhere kẹ omara,Je thihi ekpọ eka họ.+
Muẹrohọ edhere ologbo na, edhere nọ whọ te nya na.+
Zihe ze, O ọmọtẹ-kọkọ Izrẹl, zihe ziọ ikpewho ra nana.
22 Ẹvẹ who ti ghoro kri te, O ọmọtẹ nọ o bi gbe-ọfariẹ?
Keme Jihova ọ ma oware okpokpọ jọ no evaọ otọakpọ na:
Aye ọ te rọ ọwhọ dhẹ lele ọzae.”
23 Enẹ Jihova olori egbaẹmo, Ọghẹnẹ Izrẹl ọ ta: “A te wariẹ ta eme nana evaọ ẹkwotọ Juda gbe evaọ ikpewho riẹ okenọ me ti koko ahwo rai nọ a mu vrẹ họ zihe ze: ‘Jọ Jihova ọ ghale owhẹ, O oria ukiẹrẹe nọ a be rria,+ O ugbehru ọrẹri.’+
24 Yọ Juda avọ ikpewho riẹ kpobi a te rria etẹe kugbe, te ewhẹrẹ te enọ i re su erao.+
25 Keme me ti ru ẹgwọlọ ọnọ* oma o rrọ no kẹe, je ru eva vọ ohwo* kpobi nọ oma o lọhọ no fiki ohọo.”+
26 Fikiere me te jojo ze je rovie ibiaro mẹ, yọ owezẹ na o jẹ mere omẹ oma.
27 “Rri! Edẹ e be tha,” ere Jihova ọ ta, “nọ mẹ te kọ ubi* ohwo-akpọ gbe ubi erao fihọ uwou Izrẹl gbe uwou Juda.”+
28 “Yọ wọhọ epanọ me je rou* ai re me vi ai no otọ, zurie ai fihọ otọ, kporo ai kuotọ, raha ae no, jẹ nwa ae oma na,+ ere ọvona me ti rou ai re mẹ bọ ae dikihẹ jẹ kọ ae,”+ ere Jihova ọ ta.
29 “Evaọ edẹ yena a te gbẹ ta ha inọ, ‘Esẹ na họ enọ e re ibi-ure nọ e ware he, rekọ emezae rai họ enọ ibiakọ e jẹ gheghe.’*+
30 Rekọ evaọ oke yena, omomọvo o ti whu fiki oruthọ riẹ. Ọzae kpobi nọ ọ re ibi-ure nọ e ware he, ọye ibiakọ e te gheghe.”
31 “Rri! Edẹ e be tha,” ere Jihova ọ ta, “nọ mẹ te re ọvọ ọkpokpọ kugbe uwou Izrẹl gbe uwou Juda.+
32 O te jọ wọhọ ọvọ nọ mẹ re kugbe esẹ-esẹ rai hi evaọ ẹdẹ nọ me ro kru ai obọ re me su ai no ẹkwotọ Ijipti,+ ‘ọvọ mẹ nọ a raha,+ dede nọ mẹ jọ olori uzẹme* rai,’ ere Jihova ọ ta.”
33 “Keme onana họ ọvọ nọ mẹ te re kugbe uwou Izrẹl nọ edẹ yena e tẹ vrẹ no,” ere Jihova ọ ta. “Me ti fi uzi mẹ họ eva rai,+ yọ udu rai me ti kere iei fihọ.+ Mẹ te jọ Ọghẹnẹ rai, a vẹ te jọ ahwo mẹ.”+
34 “Ae omomọvo o gbe ti wuhrẹ ọrivẹ riẹ gbe omoni riẹ hẹ inọ, ‘Riẹ Jihova!’+ keme aikpobi a te riẹ omẹ, no ọnọ ọ mae kawo rite ọnọ ọ mae rro evaọ usu rai,”+ ere Jihova ọ ta. “Keme mẹ te rọ oruthọ rai rọvrẹ rai, yọ mẹ gbẹ te kareghẹhọ uzioraha rai ofa ha.”+
35 Enẹ Jihova ọ ta,Ọnọ o fi ọre na họ re o kẹ elo evaọ uvo,Je fi izi họ kẹ ọvẹre na gbe isi na re e kẹ elo evaọ aso,Ọnọ ọ rẹ kiẹ abade na, u ve ru ẹkporo riẹ jọ gaga,Ọnọ odẹ riẹ o rrọ Jihova olori egbaẹmo:+
36 “‘Otẹrọnọ o tẹ via ẹdẹ jọ nọ izi nana i gbe wo iruo ho,’ ere Jihova ọ ta,‘Ẹsiẹe ọvo emọ Izrẹl e gbẹ te rọ jọ orẹwho ho evaọ aro mẹ ẹsikpobi.’”+
37 Enẹ Jihova ọ ta: “‘Otẹrọnọ a sae rehọ oware ma idhiwu na, a vẹ jẹ sae kiẹ otọhotọ otọakpọ na riwi, ẹsiẹe ọvo mẹ te sae rọ siọ emọ Izrẹl kpobi fiki eware kpobi nọ a ru,’ ere Jihova ọ ta.”+
38 “Rri! Edẹ e be tha,” ere Jihova ọ ta, “nọ a te bọ okpẹwho na+ kẹ Jihova, no umuo Uwou Ukpehru Hananẹl+ rite Unuẹthẹ Ubienẹ na.+
39 Ufi nọ a rẹ rọ ma oware na+ o te nya ovavo kpobọ ukpehru Gerẹb, o vẹ te gẹle rri obọ Goa.
40 Yọ ukiekpotọ* iri na avọ orọ enwo* na kpobi gbe ikuwhrẹrẹ na kpobi rite ugbo obọ Ukiekpotọ Kidrọn,+ je rite obọ ubienẹ Unuẹthẹ Anyenya+ evaọ ofẹ ovatha-ọre na, e te jọ oware ọrẹri kẹ Jihova.+ A gbẹ te wariẹ vi ei no otọ hayo kporo iei kuotọ vievie he.”
Eme-Obotọ
^ Hayo “me gbe bi ro dhesẹ uyoyou nọ o rẹ hiẹ hẹ kẹ owhẹ na.”
^ Hayo “Who ve bi gbile nya wọhọ ahwo nọ a be sakiehwẹ.”
^ Hayo “ito.”
^ Hayo “rroro.”
^ Hayo “Jẹ rehọ iẹe no obọ.”
^ Hayo “emamọ eware nọ i te rai obọ evaọ obọ.”
^ Evaọ Hibru, “ufuẹfu.”
^ Hayo “emọ.”
^ Evaọ Hibru, “ivu mẹ i ro duwuku fiki riẹ.”
^ Hayo “emọ.”
^ Hayo “rroro.”
^ Evaọ Hibru, “ibiakọ rai i whu no.”
^ Hayo o sae jọ nọ, “ọzae.”
^ Hayo “ukiekpotọ opraprara.”
^ Hayo “enwo iwhri-erao,” koyehọ enwo nọ iwhri-erao nọ a ro dhe idhe ọ daruọ oma.
