Jerimaya 33:1-26
33 Ẹme Jihova o te bru Jerimaya ze orọ avọ isiava, evaọ okenọ ọ gbẹ jọ Ighẹ Iroiro na+ nọ a mu rie fihọ na, inọ:
2 “Enẹ Jihova Ọnọ ọ ma otọakpọ na ọ ta, Jihova nọ ọ ruẹrẹ e riẹ họ jẹ rehọ iẹe vi kothi; Jihova họ odẹ riẹ,
3 ‘Bo se omẹ, me ti yo kẹ owhẹ ababọ oke oraha jẹ vuẹ owhẹ ikpeware nọ a rẹ sai wo otoriẹ rai hi, enọ whọ re riẹ hẹ.’”+
4 “Keme enẹ Jihova Ọghẹnẹ Izrẹl ọ ta kpahe iwou okpẹwho nana gbe iwou ivie Juda nọ a zurie fihọ otọ fiki igbuhru nọ a ma ro koi họ gbe ọgbọdọ na,+
5 jẹ rọ kpahe enọ e be nyaze te họre ahwo Kaldia na, kpahe eria nana nọ iri ahwo nọ me kpe fiki evedha gbe ofu mẹ e te vọ na, enọ umuomu rai u ru nọ me ro si ovao mẹ dhere no okpẹwho nana:
6 ‘Rri, me bi ru re oma riẹ o ga, re o je wo omokpokpọ,+ yọ me ti siwi ai je ru ai wo udhedhẹ avọ uzẹme ziezi.+
7 Mẹ te rehọ ahwo Juda nọ a mu vrẹ zihe ze jẹ rehọ ahwo Izrẹl nọ a mu vrẹ zihe ze,+ yọ mẹ te bọ ai dikihẹ wọhọ epanọ me ru evaọ obọ emuhọ.+
8 Me ti ru ai fo no abe-ọriọ kpobi nọ izieraha rai nọ a raha wọso omẹ o wha ze, yọ mẹ te rọ abe-ọriọ rai kpobi rọvrẹ rai,+ enọ izieraha rai gbe eware nọ a ru omẹ thọ e wha ze.+
9 Odẹ okpẹwho nana o te jọ oware evawere, ujiro, gbe erru rọkẹ omẹ evaọ aro erẹwho otọakpọ na kpobi nọ i ti yo kpahe eware iwoma kpobi nọ me ti ru kẹ ae.+ Idudu e te ruọ ae oma, a ve ti nuhu+ fiki eware iwoma kpobi gbe udhedhẹ nọ mẹ te kẹe.’”+
10 “Enẹ Jihova ọ ta: ‘Evaọ oria nana nọ wha te ta nọ yọ otọ nọ o raha no na, nọ uvumọ ohwo hayo arao ọ rrọ họ na, evaọ ikpewho Juda gbe evaọ iyẹrẹ Jerusalẹm nọ e rrọ ofofe na, nọ uvumọ ohwo ọ rrọ họ na hayo nọ uvumọ ohwo ọ be rria ha na hayo nọ uvumọ arao ọ rrọ họ na, a te wariẹ jarai yo
11 edo evawere gbe edo oghọghọ,+ koyehọ edo uvou ọva gbe uvou ọmọtibobo, uvou ahwo nọ a be ta nọ: “Wha yere Jihova olori egbaẹmo, keme Jihova ọ rrọ wowoma;+ uyoyou riẹ nọ o rẹ hiẹ hẹ o rẹ jọ bẹdẹ bẹdẹ!”’+
“‘A te rehọ ekẹ uyere-okẹ ziọ uwou Jihova,+ keme mẹ te rehọ ahwo ẹkwotọ na nọ a mu vrẹ na zihe ze, wọhọ epanọ o jọ evaọ obọ emuhọ,’ ere Jihova ọ ta.”
12 “Enẹ Jihova olori egbaẹmo ọ ta: ‘Otọ nana nọ o raha no na, nọ uvumọ ohwo hayo erao e rrọ họ na, gbe ikpewho riẹ kpobi, e te wariẹ wo etọ nọ erao e rẹ jọ re ẹbe nọ ithuru-igodẹ i ti su igodẹ rai fihọ jọ serihọ.’+
13 “‘Evaọ ikpewho nọ e rrọ ubrotọ igbehru na, evaọ ikpewho nọ e rrọ ukiekpotọ na, evaọ ikpewho obọze ovatha-ọre na, evaọ ẹkwotọ Bẹnjamin, evaọ eria nọ e wariẹ Jerusalẹm họ,+ gbe evaọ ikpewho Juda,+ ithuru erao e te wariẹ nya otọ abọ ohwo nọ o bi kele ai vrẹ,’ ere Jihova ọ ta.”
14 “‘Rri! Edẹ e be tha,’ ere Jihova ọ ta, ‘nọ me ti ru eyaa eware iwoma nọ mẹ ya kpahe uwou Izrẹl gbe uwou Juda gba.+
15 Evaọ edẹ yena gbe evaọ oke yena, me ti ru okakọ* okiẹrẹe dhẹ ze+ rọkẹ Devidi, yọ o ti bru uvioziẹ je ru oware ukiẹrẹe evaọ ẹkwotọ na.+
16 Evaọ edẹ yena a ti siwi Juda,+ yọ Jerusalẹm ọ te rria avọ omofọwẹ.+ Odẹ nọ a ti sei họ: Jihova họ Ẹrẹreokie Mai.’”+
17 “Keme enẹ Jihova ọ ta: ‘Ohwo nọ ọ rẹ keria agbara-uvie uwou Izrẹl o ti no uyẹ Devidi vievie he,+
18 yọ oke kpobi izerẹ nọ e rrọ ahwo Livae na i ti wo ohwo nọ ọ rẹ jọ aro mẹ dhe idhe emahọ, mahe idhe ibi ekakọ, je dhe oghẹrẹ idhe efa.’”
19 Ẹme Jihova ọ tẹ wariẹ bru Jerimaya ze, inọ:
20 “Enẹ Jihova ọ ta, ‘Otẹrọnọ wha sae raha ọvọ mẹ kpahe uvo gbe ọvọ mẹ kpahe aso, re uvo gbe aso e siọ oma ba ẹrọvia evaọ ẹruoke rai,+
21 ẹsiẹe ọvo mẹ sae rọ raha ọvọ mẹ nọ mẹ re kugbe Devidi odibo mẹ,+ nọ o gbe ro wo ọmọzae nọ ọ rẹ jọ ovie nọ o re su evaọ agbara-uvie riẹ hẹ,+ yọ ere ọvona o rrọ re kpahe ọvọ mẹ nọ mẹ re kugbe izerẹ nọ e rrọ ahwo Livae na, egbodibo mẹ.+
22 Nwane wọhọ epanọ a rẹ sai kele ogbaẹmo obọ idhiwu na mu hu na, jẹ sae wawọ uwẹkpẹ obọ abade he na, ere me ti ru emọ* Devidi odibo mẹ gbe ahwo Livae nọ a be gbodibo kẹ omẹ na vihọ.’”
23 Ẹme Jihova ọ tẹ wariẹ bru Jerimaya ze, inọ:
24 “Kọ who rri muẹrohọ ẹme nọ ahwo nana a be ta, inọ, ‘Jihova ọ te siọ iviuwou ivẹ nọ ọ salọ na’? A bi rri ahwo obọmẹ vo, yọ a gbe bi rri rai wọhọ orẹwho ho.
25 “Enẹ Jihova ọ ta: ‘Nwane wọhọ epanọ me ru ọvọ mẹ kpahe uvo gbe aso dikihẹ na,+ izi odhiwu avọ otọakpọ na,+
26 ere mẹ te siọ emọ* Jekọp avọ erọ Devidi odibo mẹ vievie he, yọ mẹ te jọ usu emọ* riẹ rehọ isu nọ i re su ahwo uyẹ* Abraham, Aiziki, gbe Jekọp ze. Keme me ti koko ahwo rai nọ a mu vrẹ họ zihe ze+ jẹ re ae ohrọ.’”+
Eme-Obotọ
^ Hayo “ọreuku.”
^ Evaọ Hibru, “ubi.”
^ Evaọ Hibru, “ubi.”
^ Evaọ Hibru, “ubi.”
^ Evaọ Hibru, “ubi.”
