Jerimaya 35:1-19
-
Ahwo unuwou Rikab a dhesẹ emamọ oriruo ẹmeoyo (1-19)
35 Ẹme nọ o no obọ Jihova bru Jerimaya ze evaọ edẹ Jehoyakim+ ọmọzae Josaya, ovie Juda, inọ:
2 “Nya kpobọ uwou ahwo uyẹ Rikab+ re who lele ai ta ẹme jẹ rehọ ae ziọ eva uwou Jihova, who ve fi ai họ ọjọ evaọ usu ibriwou* emuọriọ na; kẹsena whọ vẹ kẹ ae enwaene re a da.”
3 Fikiere mẹ tẹ rehọ Jeazanaya ọmọzae Jerimaya ọmọzae Habazinaya, inievo-emezae riẹ, emezae riẹ kpobi, gbe ahwo uwou Rikab na soso
4 ziọ eva uwou Jihova. Mẹ rehọ e rae ziọ ubruwou emuọriọ emezae Henan ọmọzae Igdalaya, ohwo Ọghẹnẹ uzẹme na, onọ o kẹle ubruwou emuọriọ ikpahwo-esuo na nọ o jọ obehru ubruwou emuọriọ Measaya ọmọzae Shalọm, oriẹthẹ na.
5 Kẹsena mẹ tẹ wọ igho nọ i wo abọ avọ igho nọ i wo abọ họ nọ enwaene e vọ fihọ aro ezae unuwou Rikab na jẹ ta kẹ ae nọ: “Wha da enwaene.”
6 Rekọ a tẹ ta nọ: “Ma te da enwaene he, keme Jehonadab*+ ọmọzae Rikab, ọsẹ-esẹ mai, ọ kẹ omai ujaje nana inọ, ‘Te owhai te emezae rai wha rẹ da enwaene vievie he.
7 Yọ wha rẹ bọ uwou hu, kọ ubi hi, wha rẹ kọ hayo wo ọgbọ evaene he. Ukpoye, o gba owhai họ nọ iwou-udhu wha rẹ rria ẹsikpobi, re wha ruẹse rria oke krẹkri evaọ ẹkwotọ nọ wha jọ rrọ erara na.’
8 Fikiere ma gbe bi yoẹme kẹ urru Jehonadab ọmọzae Rikab ọsẹ-esẹ mai evaọ uzi kpobi nọ o jie kẹ omai, ma rẹ da uvumọ enwaene vievie he—te omai, te eyae mai, te emezae mai, gbe emetẹ mai.
9 Yọ ma rẹ bọ iwou nọ ma rẹ rria ha, ma wo egbọ evaene hayo idhu hayo ibi ekakọ họ.
10 Ma gbẹ be rria iwou-udhu je bi koko uzi kpobi nọ Jehonadab* ọsẹ-esẹ mai o jie kẹ omai.
11 Rekọ nọ Nebukadneza* ovie Babilọn ọ wọ ohọre ziọ ẹkwotọ na,+ ma tẹ ta nọ, ‘Wha nyaze re ma dhẹ kpobọ Jerusalẹm, re ma va ogbaẹmo ahwo Kaldia avọ orọ ahwo Siria na abọ,’ oye ma jẹ be rria Jerusalẹm enẹna.”
12 Ẹme Jihova o te bru Jerimaya ze, inọ:
13 “Enẹ Jihova olori egbaẹmo, Ọghẹnẹ Izrẹl ọ ta, ‘Nya re whọ ta kẹ ezae Juda avọ ahwo nọ a be rria Jerusalẹm nọ: “Kọ ogbẹrọnọ kẹse kẹse a jẹ tuduhọ owhai awọ nọ wha ru lele eme mẹ?”+ ere Jihova ọ ta.
14 “Jehonadab ọmọzae Rikab o jie uzi kẹ ahwo uyẹ riẹ nọ a da enwaene he, yọ a bi ru lele eme riẹ, a be da enwaene he rite ẹdẹ inẹnẹ na, be rọ ere koko uzi ọsẹ-esẹ rai.+ Rekọ, me bi dhe owhai ẹme ẹtẹta kẹ,* ghele na wha bi yoẹme kẹ omẹ hẹ.+
15 Yọ mẹ ruabọhọ je vi idibo mẹ kpobi eruẹaro na se owhai, me je dhe ai evievi,*+ be ta nọ, ‘Ivie, whai omomọvo o kurẹriẹ no idhere imuomu riẹ+ re wha ru oware nọ u kiehọ! Wha du nya lele eghẹnẹ efa hayo gọ ae he. Ẹsiẹe wha te gbẹ rọ rria ẹkwotọ nọ mẹ kẹ owhai avọ esẹ-esẹ rai na.’+ Rekọ wha fi ezọ rai hotọ họ hayo gaviezọ kẹ omẹ hẹ.
16 Ahwo uyẹ Jehonadab ọmọzae Rikab a bi koko uzi nọ ọsẹ-esẹ rai o jie kẹ ae,+ rekọ ahwo nana a be gaviezọ kẹ omẹ hẹ.”’”
17 “Fikiere enẹ Jihova, Ọghẹnẹ olori egbaẹmo na, Ọghẹnẹ Izrẹl ọ ta: ‘Rri mẹ be rehọ okpẹtu kpobi nọ mẹ vẹvẹ e rai unu kpahe na+ ze te Juda avọ ahwo kpobi nọ a be rria Jerusalẹm, keme mẹ ta ẹme kẹ ae, rekọ a gaviezọ họ, mẹ ruabọhọ je se ai, rekọ a kpunu hu.’”+
18 Jerimaya ọ tẹ ta kẹ ahwo uwou Rikab na nọ: “Enẹ Jihova olori egbaẹmo, Ọghẹnẹ Izrẹl ọ ta, ‘Fikinọ wha ru lele uzi Jehonadab ọsẹ-esẹ rai jẹ ruabọhọ bi koko izi riẹ kpobi na, bi ru epanọ ọ ta kẹ owhai ẹrẹrẹe na,
19 enẹ Jihova olori egbaẹmo, Ọghẹnẹ Izrẹl ọ ta: “Ohwo nọ ọ rẹ jọ aro mẹ gbodibo o ti no uyẹ Jehonadab* ọmọzae Rikab vievie he.”’”
Eme-Obotọ
^ Hayo “egwa.”
^ Evaọ Hibru, “Jonadab,” ubro odẹ na, Jehonadab.
^ Evaọ Hibru, “Jonadab,” ubro odẹ na, Jehonadab.
^ Evaọ Hibru, “Nebukadreza,” oghẹrẹ ofa nọ a kere i rie.
^ Evaọ Hibru, “mẹ jẹ riọ kpama jẹ ta ẹme kẹ owhai.”
^ Evaọ Hibru, “mẹ jẹ riọ kpama je vi ai.”
^ Evaọ Hibru, “Jonadab,” ubro odẹ na, Jehonadab.
