Jerimaya 37:1-21
37 Zẹdikaya+ ọmọzae Josaya ovie na o te muhọ esuo evaọ ẹta Konaya*+ ọmọzae Jehoyakim, keme Nebukadneza* ovie Babilọn ọ rehọ e riẹ mu ovie evaọ ẹkwotọ Juda.+
2 Rekọ ọyomariẹ avọ idibo riẹ gbe ahwo ẹkwotọ na a gaviezọ kẹ eme Jihova nọ Jerimaya ọruẹaro na ọ ta ha.
3 Zẹdikaya ovie na o te vi Jehukọl+ ọmọzae Shẹlẹmaya avọ Zẹfanaya+ ọmọzae Measaya ozerẹ na bru Jerimaya ọruẹaro na, inọ: “Ivie lẹ se Jihova Ọghẹnẹ mai kẹ omai.”
4 Oke yena yọ Jerimaya ọ gbẹ be sae nya kpohọ oria kpobi nọ u je rie evaọ udevie ahwo na, keme a ri fi ei họ uwou-odi hi.+
5 Whaọ, evaọ oke yena yọ ogbaẹmo Fẹro o wọ bi no obọ Ijipti ze,+ usi na u te do te ahwo Kaldia nọ a ko Jerusalẹm họ na oma. Fikiere a te kuomarẹriẹ zihe siọ Jerusalẹm ba.+
6 Kẹsena ẹme Jihova o te bru Jerimaya ọruẹaro na ze, inọ:
7 “Enẹ Jihova Ọghẹnẹ Izrẹl ọ ta, ‘Enẹ wha rẹ ta kẹ ovie Juda nọ o vi owhai bru omẹ ze te nekpẹ mi omẹ na, inọ: “Rri! Ogbaẹmo Fẹro nọ o be nyaze ti fiobọhọ kẹ owhai na u ti zihe kpobọ ẹkwotọ riẹ, Ijipti.+
8 Yọ ahwo Kaldia na a ti zihe ze, a vẹ te họre okpẹwho nana je fi ei kparobọ jẹ rọ erae mahe iẹe.”+
9 Enẹ Jihova ọ ta, “Wha viẹ omarai* họ họ inọ, ‘Ahwo Kaldia na a te siọ omai ba ẹnyaseba ha,’ keme a te nyasiọ owhai ba ha.
10 Otẹrọnọ wha tẹ maki fi ogbaẹmo ahwo Kaldia soso nọ o be họre owhai na kparobọ dede, nọ ezae rai nọ e nwoma ọvo i je kiọkọ, a te kpama no iwou-udhu rai ze ghele, a vẹ rọ erae mahe okpẹwho nana.”’”+
11 Nọ ogbaẹmo ahwo Kaldia u kuomarẹriẹ zihe siọ Jerusalẹm ba no fiki ogbaẹmo Fẹro,+
12 Jerimaya ọ tẹ wọ no Jerusalẹm bi kpobọ ẹkwotọ Bẹnjamin+ re ọ jọ obei rehọ ẹkẹ riẹ evaọ udevie ahwo riẹ.
13 Rekọ nọ o te Unuẹthẹ Bẹnjamin, alakpa nọ o wuzou iroiro na nọ a re se Iraejah ọmọzae Shẹlẹmaya ọmọzae Hananaya, o te kru Jerimaya ọruẹaro na jẹ ta nọ: “Ahwo Kaldia whọ be dhẹ bru re whọ ruọ abọ rai na!”
14 Rekọ Jerimaya ọ tẹ ta nọ: “Ere o rrọ họ! Mẹ be dhẹ ruọ abọ ahwo Kaldia ha.” Rekọ ọ gaviezọ kẹe he. Fikiere Iraejah o te mu Jerimaya, ọ tẹ rehọ iẹe bru ikpahwo-esuo na.
15 Eva Jerimaya e tẹ dha ikpahwo-esuo na gaga,+ a te kpei je fi ei họ uwou-odi*+ evaọ uwou Jehonatan okere-obe na, onọ a ru fihọ uwou-odi no.
16 A fi Jerimaya họ eva uwou-odi na,* evaọ ibriwou obotọ uwou na jọ, ọ tẹ jọ etẹe edẹ buobu.
17 Kẹsena Zẹdikaya ovie na ọ tẹ ta nọ a rehọ iẹe ze, ovie na ọ tẹ jẹ lẹlẹ nọe enọ evaọ obọ uwou* riẹ.+ Ọ nọ riẹ nọ, “Kọ ẹme jọ o no obọ Jihova ze?” Jerimaya ọ tẹ ta nọ, “Ee!” o te fibae nọ, “A te rehọ owhẹ họ obọ ovie Babilọn!”+
18 Jerimaya ọ tẹ jẹ ta kẹ Zẹdikaya ovie na nọ: “Eme me ro ru owhẹ avọ idibo ra gbe ahwo nana thọ nọ wha ro fi omẹ họ uwou-odi?
19 Kọ enẹna, eruẹaro rai na e rrọ, enọ e ruẹaro kẹ owhai nọ, ‘Ovie Babilọn ọ te wọ ohọre bru owhai gbe ẹkwotọ nana ze he’?+
20 Enẹna ivie gaviezọ, O olori mẹ ovie. Ivie, ru ayare nọ mẹ be yare nọ who rri omẹ aro na kẹ omẹ. Who zihe omẹ kpobọ uwou Jehonatan+ okere-obe na ha, o gbẹ rrọ ere he me ti whu evaọ obei.”+
21 Fikiere Zẹdikaya ovie na ọ tẹ kẹ udu nọ a fi Jerimaya họ uwou-odi evaọ Ighẹ Iroiro na,+ yọ a jẹ kẹe ukulu ebrẹdi ogheghelie kẹdẹ kẹdẹ, onọ a jẹ rehọ no iyẹrẹ enọ i re there ebrẹdi na ze+ bẹsenọ ebrẹdi kpobi nọ e jọ okpẹwho na i ro re no.+ Yọ Jerimaya ọ gbẹ jọ Ighẹ Iroiro na.
Eme-Obotọ
^ A re je sei Jehoyakin gbe Jẹkonaya.
^ Evaọ Hibru, “Nebukadreza,” oghẹrẹ ofa nọ a kere i rie.
^ Evaọ Hibru, “uwou ekarọ.”
^ Evaọ Hibru, “uwou ọgọdọ-ame na.”
^ Hayo “ighẹ.”
