Jerimaya 38:1-28
38 Whaọ Shẹfataya ọmọzae Mattan, Gẹdelaya ọmọzae Pashọ, Jukal+ ọmọzae Shẹlẹmaya, gbe Pashọ+ ọmọzae Malkaejah a yo eme nọ Jerimaya ọ jẹ ta kẹ ahwo na kpobi na, inọ:
2 “Enẹ Jihova ọ ta, ‘Ọgbọdọ, ohọo nọ u ti mu, gbe okpẹyao nọ o re vo*+ i ti kpe ohwo kpobi nọ o ti gbe kiọkọ okpẹwho nana. Rekọ ohwo nọ o fi oma hotọ kẹ* ahwo Kaldia na, ọ te gbẹ jọ uzuazọ, yọ o ti wo uzuazọ riẹ wọhọ egbo-ẹmo* jẹ rria.’+
3 Enẹ Jihova ọ ta, ‘A te siọ okpẹwho nana ba ẹrehọ kẹ ogbaẹmo ovie Babilọn ho, yọ o ti fi ei kparobọ.’”+
4 Ikpahwo-esuo na e tẹ ta kẹ ovie na nọ: “Ivie ru re a kpe ọzae nana no,+ keme ọ be ta eme itieye na ro ru udu no isoja nọ i kiọkọ okpẹwho nana awọ,* yọ ere ọvona o bi ru ahwo na kpobi re. Keme orọnikọ epanọ ahwo nana a re ro wo udhedhẹ ọzae nana ọ be gwọlọ họ, rekọ epanọ okpẹtu o re ro te ai.”
5 Zẹdikaya ovie na ọ tẹ kpahe nọ: “Rri! Ọ rrọ owhai abọ, keme ovie na ọ sai ru oware ovo rọ whaha owhai hi.”
6 Fikiere a te kru Jerimaya a te fi ei họ ọgọdọ-ame* Malkaejah ọmọzae ovie na, onọ o jọ evaọ Ighẹ Iroiro na.+ Ifi a ro si Jerimaya kpobọ otọ. Whaọ ame ọ jọ ọgọdọ-ame* na ha, ajokpaọ ọloho ọvo, Jerimaya o te mu ọloho na họ ezue ruọ.*
7 Ibẹd-mẹlẹk+ ohwo Ẹtiopia na, ọwharọ* nọ ọ jọ uwou* ovie na o te yo nọ a fi Jerimaya họ eva ọgọdọ-ame* na. Whaọ evaọ oke yena ovie na ọ keria Unuẹthẹ Bẹnjamin,+
8 fikiere Ibẹd-mẹlẹk o te no uwou* ovie na nyae ta ẹme kẹ ovie na, inọ:
9 “O olori mẹ ovie, oware uyoyoma ezae nana i ru Jerimaya ọruẹaro na! A gbolo i rie fihọ eva ọgọdọ-ame* na, yọ o ti whu fihọ etẹe fiki ohọo nọ u bi mu na, keme uvumọ ebrẹdi o gbe kiọkọ okpẹwho na ha.”+
10 Kẹsena ovie na ọ tẹ ta kẹ Ibẹd-mẹlẹk ohwo Ẹtiopia na nọ: “Jọ etenẹ rehọ ezae ọgba kugbe oma, re wha si Jerimaya ọruẹaro na no eva ọgọdọ-ame* na ze re ọ seba ewhu.”
11 Fikiere Ibẹd-mẹlẹk ọ tẹ rehọ ezae na kugbe oma, a tẹ ruọ eva uwou* ovie na kpobọ ubruwou nọ o rrọ obotọ oria ekwakwa-aghae na,+ a tẹ jọ etẹe tọlọ inwrehọ gbe ewẹ ehọ jọ, a tẹ rehọ ifi si ai kpotọ bru Jerimaya evaọ ọgọdọ-ame* na.
12 Kẹsena Ibẹd-mẹlẹk ohwo Ẹtiopia na ọ tẹ ta kẹ Jerimaya nọ: “Ivie fi inwrehọ na avọ ewẹ ehọ na họ otọ etaviemu ra re ifi na e siọ owhẹ ba ẹyawo.” Jerimaya o te ru ere,
13 a tẹ rehọ ifi na si Jerimaya lahwe no eva ọgọdọ-ame* na ze. Jerimaya ọ tẹ gbẹ jọ eva Ighẹ Iroiro na.+
14 Zẹdikaya ovie na ọ tẹ vuẹ se Jerimaya ọruẹaro na nọ ọ nyabru ei ze obọ unuẹthẹ avọ esa nọ o rrọ uwou Jihova, ovie na ọ tẹ ta kẹ Jerimaya nọ: “Me wo onọ jọ nọ mẹ gwọlọ nọ owhẹ. Whọ ko oware ovo dhere omẹ hẹ.”
15 Jerimaya ọ tẹ ta kẹ Zẹdikaya nọ: “Mẹ tẹ vuẹ owhẹ, whọ te siọ omẹ ba ekpe he. Yọ mẹ tẹ kẹ owhẹ ohrẹ, whọ te gaviezọ kẹ omẹ hẹ.”
16 Fikiere Zẹdikaya ovie na ọ tẹ lẹlẹ duwu iyei kẹ Jerimaya inọ: “Nọ Jihova ọ rrọ uzuazọ na, ọnọ ọ kẹ omai uzuazọ* nana, me ti kpe owhẹ hẹ, yọ mẹ te rehọ owhẹ kẹ ezae nana nọ e be gwọlọ uzuazọ* ra kpe na ha.”
17 Kẹsena Jerimaya ọ tẹ ta kẹ Zẹdikaya nọ: “Enẹ Jihova, Ọghẹnẹ olori egbaẹmo na, Ọghẹnẹ Izrẹl ọ ta, ‘Otẹrọnọ who fi oma hotọ kẹ* ikpahwo-esuo ovie Babilọn, a te siọ owhẹ* ba uzuazọ, yọ a te rọ erae mahe okpẹwho nana no ho, a te siọ owhẹ avọ ahwo uwou ra ba uzuazọ.+
18 Rekọ otẹrọnọ who gbe fi oma hotọ kẹ* ikpahwo-esuo ovie Babilọn na ha, a te rehọ okpẹwho nana kẹ ahwo Kaldia, a vẹ te rọ erae mahe iẹe no,+ yọ whọ te va ae abọ họ.’”+
19 Zẹdikaya ovie na ọ tẹ ta kẹ Jerimaya nọ: “Ozọ ahwo Ju nọ a ruọ abọ ahwo Kaldia no na u bi mu omẹ, keme otẹrọnọ a rehọ omẹ kẹ ae, a ti gboja kẹ omẹ.”
20 Rekọ Jerimaya ọ tẹ ta nọ: “A te rehọ owhẹ kẹ ae he. Ivie, yoẹme kẹ urru Jihova evaọ ẹme nọ mẹ be ta kẹ owhẹ na, eware e vẹ te riẹ nya kẹ owhẹ, whọ vẹ te gbẹ jọ uzuazọ.
21 Rekọ otẹrọnọ whọ gbẹ rọwo fi oma hotọ họ,* oware nọ Jihova o dhesẹ via kẹ omẹ ona:
22 Rri! A be rehọ eyae kpobi nọ i kiọkọ uwou* ovie Juda bru ikpahwo-esuo ovie Babilọn,+ yọ a be ta nọ,‘Ezae nọ who fievahọ* a viẹ owhẹ họ no je fi owhẹ kparobọ no.+
A ru owọ ra zue ruọ ọloho no.
Enẹna a kuomarẹriẹ zihe no.’
23 A be rehọ eyae ra kpobi gbe emezae ra kpobi lahwe bru ahwo Kaldia na, yọ whọ te va ae abọ họ, ukpoye, ovie Babilọn o ti mu owhẹ,+ yọ a te rọ erae mahe okpẹwho nana no fiki ra.”+
24 Zẹdikaya ọ tẹ ta kẹ Jerimaya nọ: “Who ru re ohwo ọvo ọ riẹ kpahe eware nana ha, re whọ seba ewhu.
25 Yọ otẹrọnọ ikpahwo-esuo na i te yo nọ me lele owhẹ ta ẹme, a jẹ nyabru owhẹ ze jẹ ta kẹ owhẹ nọ, ‘Ivie, vuẹ omai oware nọ whọ ta kẹ ovie na. Whọ ko oware ovo dhere omai hi, yọ ma ti kpe owhẹ hẹ.+ Eme ovie na ọ ta kẹ owhẹ?’
26 uyo nọ whọ rẹ kẹ ae họ, ‘Mẹ jẹ yare ovie na oware jọ, inọ o du zihe omẹ kpobọ uwou Jehonatan re mẹ jọ obei whu hu.’”+
27 Nọ u te oke jọ, ikpahwo-esuo na kpobi e tẹ nyabru Jerimaya, a te mu ei enọ họ ẹnọ. Ọ tẹ vuẹ ae oware kpobi nọ ovie na o jie uzi kẹe nọ ọ rẹ ta. Fikiere a gbẹ ta uvumọ ẹme kẹe he, keme ohwo ọvo o yo ẹme nọ aimava a ta ha.
28 Eva Ighẹ Iroiro na Jerimaya ọ jọ+ ri bọo ẹdẹ nọ a ro fi Jerusalẹm kparobọ; ọ gbẹ jọ etẹe evaọ okenọ a ro fi Jerusalẹm kparobọ.+
Eme-Obotọ
^ Hayo “ẹyao.”
^ Evaọ Hibru, “ọ nyabru.”
^ Hayo “ọ te zọ.”
^ Evaọ Hibru, “ru abọ lọhọ isoja nọ i kiọkọ okpẹwho nana.”
^ Koyehọ, ọgọdọ nọ a rẹ jọ sẹro ame.
^ Hayo “ẹmere ruọ.”
^ Koyehọ, ọgọdọ nọ a rẹ jọ sẹro ame.
^ Hayo “oruiruo ighẹ ovie.”
^ Hayo “ighẹ.”
^ Koyehọ, ọgọdọ nọ a rẹ jọ sẹro ame.
^ Hayo “ighẹ.”
^ Koyehọ, ọgọdọ nọ a rẹ jọ sẹro ame.
^ Koyehọ, ọgọdọ nọ a rẹ jọ sẹro ame.
^ Koyehọ, ọgọdọ nọ a rẹ jọ sẹro ame.
^ Hayo “ighẹ.”
^ Koyehọ, ọgọdọ nọ a rẹ jọ sẹro ame.
^ Evaọ Hibru, “whọ tẹ nyabru.”
^ Evaọ Hibru, “whọ gbẹ nyabru.”
^ Evaọ Hibru, “nya lahwe he.”
^ Hayo “ighẹ.”
^ Evaọ Hibru, “Ezae udhedhẹ ra.”
