Jerimaya 39:1-18
39 Evaọ ukpe avọ izii Zẹdikaya ovie Juda, evaọ amara avọ ikpe, Nebukadneza* ovie Babilọn avọ ogbaẹmo riẹ soso a tẹ wọ ze Jerusalẹm, a te koi họ.+
2 Evaọ ukpe avọ ikpegbọvo Zẹdikaya, evaọ amara avọ ene, evaọ ẹdẹ avọ izii amara na, a te kporo ugbẹhẹ okpẹwho na ruọ eva.+
3 Ikpahwo-esuo ovie Babilọn kpobi e tẹ ruọ eva, a tẹ keria Unuẹthẹ Udevie na,+ edẹ rai họ, Negal-shariza nọ ọ rrọ Samga na, Nibo-sasekim nọ ọ rrọ Rabsaris na,* Negal-shariza nọ ọ rrọ Rabmag na,* gbe ikpahwo-esuo ovie Babilọn nọ i kiọkọ kpobi.
4 Nọ Zẹdikaya ovie Juda avọ isoja na kpobi a ruẹ e rai, a tẹ dhẹ,+ a tẹ rọ unuẹthẹ nọ o rrọ udevie igbẹhẹ ivẹ na, nọ o kẹle edhere ọgbọ ovie na rọ dhẹ no okpẹwho na evaọ aso, a tẹ be rọ edhere Araba* na dhẹ vrẹ.+
5 Rekọ ogbaẹmo ahwo Kaldia na a te mu ai họ ele, a te le Zẹdikaya mu evaọ udhude opraprara Jẹriko.+ A te mu ei, a tẹ rehọ iẹe bru Nebukadneza* ovie Babilọn evaọ Ribla+ nọ o rrọ ẹkwotọ Hemat,+ oria nọ ọ jọ bruoziẹ riẹ.
6 Ovie Babilọn ọ kẹ udu nọ a rọ jọ iraro Zẹdikaya kpe emezae riẹ no evaọ Ribla, ovie Babilọn ọ tẹ jẹ kẹ udu nọ a ro kpe ikpahwo Juda kpobi no.+
7 Kẹsena o te tu Zẹdikaya aro, nọ o ru ere no, ọ tẹ rehọ egbregba ekọpa gbae re ọ rehọ iẹe ziọ Babilọn.+
8 Kẹsena ahwo Kaldia na a tẹ mahe uwou* ovie na gbe iwou ahwo na no,+ a te je kporo ugbẹhẹ Jerusalẹm fihọ otọ.+
9 Nebuzaradan+ oletu iroiro na o te mu ahwo nọ a kiọkọ nọ a nyaseba okpẹwho na, ahwo nọ a dhẹ ruọ abọ riẹ, gbe ohwo kpobi nọ o kiọkọ kpohọ igbo evaọ obọ Babilọn.
10 Rekọ Nebuzaradan oletu iroiro na ọ nyasiọ ahwo jọ nọ a mai yogbe ba ẹkwotọ Juda, enọ i wo oware ovo vievie he. Evaọ ẹdẹ yena, ọ tẹ jẹ kẹ ae egbọ evaene gbe idhu nọ a rẹ jọ ru iruo.*+
11 Whaọ Nebukadneza* ovie Babilọn o jie izi nana kẹ Nebuzaradan oletu iroiro na kpahe Jerimaya, inọ:
12 “Rehọ iẹe lele oma re whọ rẹrotei; who ru ei oware uyoma ovo ho, yọ whọ rẹ kẹe oware kpobi nọ ọ yare mi owhẹ.”+
13 Fikiere Nebuzaradan oletu iroiro na, Nebushazban nọ ọ rrọ Rabsaris na,* Negal-shariza nọ ọ rrọ Rabmag na,* gbe ahwo ovie Babilọn kpobi nọ a viodẹ a te vi ahwo nya,
14 a tẹ rehọ Jerimaya no eva Ighẹ Iroiro na ze,+ a tẹ rehọ iẹe kẹ Gẹdelaya+ ọmọzae Ahaekam+ ọmọzae Shefan+ re ọ rehọ iẹe kpobọ uwou riẹ. Ere ọ jẹ rọ rria udevie ahwo na.
15 Evaọ okenọ Jerimaya ọ rọ jọ eva Ighẹ Iroiro na,+ ẹme Jihova o te bru ei ze, inọ:
16 “Nya re whọ ta kẹ Ibẹd-mẹlẹk+ ohwo Ẹtiopia na nọ, ‘Enẹ Jihova olori egbaẹmo, Ọghẹnẹ Izrẹl ọ ta: “Rri, me bi ru eme mẹ nọ mẹ ta kpahe okpẹwho nana gba, onọ o te wha okpẹtu ze, orọnikọ ewoma ha, yọ whọ te ruẹ e riẹ nọ o te via evaọ ẹdẹ yena.”’
17 “‘Rekọ me ti siwi owhẹ evaọ ẹdẹ yena,’ ere Jihova ọ ta, ‘yọ a te rehọ owhẹ kẹ ezae nọ whọ be dhozọ rai na ha.’
18 “‘Keme me ti ru owhẹ vabọ hrọ, yọ ọgbọdọ o ti kpe owhẹ hẹ. Who ti wo uzuazọ ra wọhọ egbo-ẹmo,*+ keme who fievahọ omẹ,’+ ere Jihova ọ ta.”
Eme-Obotọ
^ Evaọ Hibru, “Nebukadreza,” oghẹrẹ ofa nọ a kere i rie.
^ Hayo “Negal-shariza, Samga-nibo, Sasekim, Rabsaris,” wọhọ epaọ oghẹrẹ ofa nọ a rọ hẹriẹ eme Hibru na.
^ Hayo “olori enọ i re ru emajiki (ọnọ o re rri isi obehru rọ gbẹva).”
^ Hayo “udhude opraprara.”
^ Evaọ Hibru, “Nebukadreza,” oghẹrẹ ofa nọ a kere i rie.
^ Hayo “ighẹ.”
^ Hayo o sae jọ nọ, “iruo ọgbahọ.”
^ Evaọ Hibru, “Nebukadreza,” oghẹrẹ ofa nọ a kere i rie.
^ Hayo “ọnọ o wuzou iruiruo ighẹ ovie.”
^ Hayo “olori enọ i re ru emajiki (ọnọ o re rri isi obehru rọ gbẹva).”
^ Hayo “Whọ te zọ.”
