Jerimaya 40:1-16
40 Ẹme nọ o no obọ Jihova bru Jerimaya ze evaọ okenọ Nebuzaradan+ oletu iroiro na o siobọnoi evaọ Rema+ re ọ nyavrẹ. Ọ rehọ e riẹ kpohọ obei avọ egbregba nọ a whẹhọ iẹe abọ, yọ ọ jọ usu ahwo kpobi nọ a mu evaọ Jerusalẹm gbe evaọ Juda nọ a jẹ rehọ kpobọ Babilọn.
2 Kẹsena oletu iroiro na ọ tẹ rehọ Jerimaya lahwe, ọ tẹ ta kẹe nọ: “Jihova Ọghẹnẹ ra ọ ta fihọ otọ nọ okpẹtu nana o ti te oria nana,
3 yọ Jihova o ru rie gba no nwane wọhọ epanọ ọ ta, keme wha raha uzi Jihova, wha yoẹme kẹ urru riẹ hẹ. Oyejabọ nọ oware nana o rọ via kẹ owhai na.+
4 Whaọ enẹna, me bi si egbregba nọ a rọ kare abọ ra na no nẹnẹ na. O tẹ were owhẹ nọ who bi lele omẹ kpobọ Babilọn, nyaze, mẹ te rẹrote owhẹ. Rekọ otẹrọnọ whọ gwọlọ lele omẹ kpobọ Babilọn ho, whọ nyaze he. Rri! Ẹkwotọ na soso ọ rrọ kẹ owhẹ. Nya kpohọ oria kpobi nọ u je owhẹ.”+
5 Nọ Jerimaya o ri kuomarẹriẹ hẹ na, Nebuzaradan ọ tẹ ta nọ: “Zihe bru Gẹdelaya+ ọmọzae Ahaekam+ ọmọzae Shefan,+ ọnọ ovie Babilọn o ro mu ọnọ o wuzou ikpewho Juda na, re whọ jọ kugbei evaọ udevie ahwo na; hayo nya kpohọ oria kpobi nọ u je owhẹ.”
Kẹsena oletu iroiro na ọ tẹ kẹe emuore jọ gbe okẹ, o te siobọnoi vrẹ.
6 Fikiere Jerimaya ọ tẹ nyabru Gẹdelaya ọmọzae Ahaekam evaọ obọ Mizpa,+ ọ tẹ jọ kugbei evaọ udevie ahwo nọ a nyaseba ẹkwotọ na.
7 Nọ u te oke jọ, iletu ogbaẹmo na kpobi nọ e jọ obọ ẹwọ kugbe egbaẹmo rai a te yo nọ ovie Babilọn ọ rehọ Gẹdelaya ọmọzae Ahaekam mu ọnọ o wuzou ẹkwotọ na no, gbe nọ ọ rehọ e riẹ mu ọnọ o wuzou ezae, eyae, gbe emọ nọ e rrọ usu iyogbe ẹkwotọ na nọ a mu vrẹ kpobọ Babilọn ho na.+
8 Fikiere a tẹ nyabru Gẹdelaya ze evaọ Mizpa.+ Ahwo na họ, Ishmẹl+ ọmọzae Nẹtanaya, Johenan+ avọ Jonatan emezae Kariya, Seraya ọmọzae Tanhumẹt, emezae Ifae ohwo Nẹtofa na, gbe Jezanaya+ ọmọzae ohwo Meakat na, avọ ahwo rai.
9 Gẹdelaya ọmọzae Ahaekam ọmọzae Shefan o te duwu iyei kẹ ae avọ ahwo rai, inọ: “Jọ ozọ ahwo Kaldia nọ wha rẹ gbodibo kẹ u mu owhai hi. Wha rria ẹkwotọ na jẹ gbodibo kẹ ovie Babilọn, eware e te riẹ nya kẹ owhai.+
10 Rọkẹ omẹ, mẹ te jọ Mizpa re me dikihẹ kẹ owhai nọ ahwo Kaldia na a tẹ nyabru omai ze.* Rekọ whai omarai wha re koko enwaene, ibi-ire ezi ivo, gbe ewhri họ, wha ve fi ai họ ithẹ rai nọ wha rẹ rọ sẹro* eware, wha vẹ jọ ikpewho nọ wha rehọ no na.”+
11 Ahwo Ju kpobi nọ a jọ Moab, Ammọn, gbe Edọm, jegbe enọ e jọ ekwotọ efa kpobi a te yo re inọ ovie Babilọn ọ kẹ ahwo jọ uvẹ re a kiọkọ Juda, ọ tẹ jẹ rehọ Gẹdelaya ọmọzae Ahaekam ọmọzae Shefan mu re o wuzou rai.
12 Fikiere ahwo Ju na kpobi a te muhọ ezihe no eria kpobi nọ a vahabọ kpohọ ze, a tẹ nyaziọ ẹkwotọ Juda, bru Gẹdelaya ze evaọ Mizpa. Yọ a koko enwaene gbe ibi-ire ezi ivo họ buobu gbidi gbidi.
13 Johenan ọmọzae Kariya avọ iletu ogbaẹmo na kpobi nọ e jọ obọ ẹwọ na e tẹ nyabru Gẹdelaya ze evaọ Mizpa.
14 A ta kẹe nọ: “Kọ whọ gbẹ riẹ nọ Bealis, ovie ahwo Ammọn+ o vi Ishmẹl ọmọzae Nẹtanaya ze re o kpe owhẹ* no?”+ Rekọ Gẹdelaya ọmọzae Ahaekam ọ rọwo ẹme rai hi.
15 Kẹsena Johenan ọmọzae Kariya ọ tẹ lẹlẹ vuẹ Gẹdelaya evaọ Mizpa nọ: “Mẹ gwọlọ nyai kpe Ishmẹl ọmọzae Nẹtanaya no, yọ ohwo ọvo ọ te riẹ hẹ. Fikieme o re ro kpe owhẹ* no, yọ fikieme ahwo Juda kpobi nọ a kokohọ bru owhẹ ze na a rẹ rọ vahabọ, ahwo nọ a kiọkọ Juda a ve whu no?”
16 Rekọ Gẹdelaya+ ọmọzae Ahaekam ọ tẹ ta kẹ Johenan ọmọzae Kariya nọ: “Who ru ere he, keme eme nọ whọ be ta kpahe Ishmẹl na yọ ọrue.”
