Jerimaya 43:1-13
43 Nọ Jerimaya ọ ta eme nana kpobi nọ i no obọ Jihova Ọghẹnẹ rai ze rọ kẹ ahwo na kpobi no, koyehọ ẹme kpobi nọ Jihova Ọghẹnẹ rai o vi rie nọ ọ ta kẹ ae na,
2 Azaraya ọmọzae Hoshaya, Johenan+ ọmọzae Kariya, gbe ezae nọ i wo omorro na kpobi e tẹ ta kẹ Jerimaya nọ: “Ẹme nọ whọ be ta na yọ ọrue! Jihova Ọghẹnẹ mai o vi owhẹ nọ whọ ta ẹme nana ha, inọ, ‘Wha kpobọ Ijipti nyae rria ha.’
3 Rekọ Barọk+ ọmọzae Neraya họ ọnọ o bi ru owhẹ ta eme nana re whọ rehọ omai họ obọ ahwo Kaldia na, re a kpe omai hayo mu omai kpohọ igbo evaọ obọ Babilọn.”+
4 Fikiere Johenan ọmọzae Kariya avọ iletu ogbaẹmo na kpobi gbe ahwo na kpobi a tẹ ghẹmeeyo kẹ urru Jihova nọ ọ ta nọ a daji ẹkwotọ Juda.
5 Ukpoye, Johenan ọmọzae Kariya avọ iletu ogbaẹmo na kpobi a tẹ rehọ ikiọkotọ Juda kpobi lele oma, enọ i zihe no obọ erẹwho kpobi nọ a vahabọ kpohọ ze te rria ẹkwotọ Juda.+
6 A rehọ ezae na, eyae na, emọ na, emetẹ ovie na, gbe ohwo* kpobi nọ Nebuzaradan+ oletu iroiro na ọ nyaseba kẹ Gẹdelaya+ ọmọzae Ahaekam+ ọmọzae Shefan,+ jegbe Jerimaya ọruẹaro na avọ Barọk ọmọzae Neraya.
7 A te kpobọ ẹkwotọ Ijipti, keme a yoẹme kẹ urru Jihova ha, a tẹ nya kpohọ ugbo obọ Tapanhis.+
8 Kẹsena ẹme Jihova o te bru Jerimaya ze evaọ Tapanhis, inọ:
9 “Tọlọ itho ilogbo fihọ obọ, re who si ai no họ oria nọ a rọ ibriki ma kpehru nọ o rrọ oria nọ a rẹ rọ ruọ uwou Fẹro evaọ Tapanhis na, whọ vẹ whẹ isimeti ro ruru ai, yọ ezae Ju na i bi rri ọvo.
10 Kẹsena whọ vẹ ta kẹ ae nọ, ‘Enẹ Jihova olori egbaẹmo, Ọghẹnẹ Izrẹl ọ ta: “Rri, mẹ be vuẹ se Nebukadneza* ovie Babilọn, odibo mẹ,+ re ọ nyaze, me ve ti fi agbara-uvie riẹ họ ehru itho nana nọ me si no na, yọ o ti ru uwou-udhu uvie riẹ kẹre fihọ ehru rai.+
11 Ọ te wọ ze, ọ vẹ te họre ẹkwotọ Ijipti.+ Ohwo kpobi nọ ọ rrọ kẹ ẹyao ọgaga, ẹyao ọgaga o ti kpei, ohwo kpobi nọ ọ rrọ kẹ igbo, o ti kpohọ igbo, yọ ohwo kpobi nọ ọ rrọ kẹ ọgbọdọ na, ọgbọdọ na o ti kpei.+
12 Me ti tu erae họ iwou* eghẹnẹ Ijipti,+ yọ ọ te mahe ae je mu ai vrẹ. Ọ te rehọ ẹkwotọ Ijipti whaliẹ oma nwane wọhọ epanọ othuru-igodẹ ọ rẹ rehọ ohọ riẹ whaliẹ omariẹ na, ọ vẹ te nya no etẹe dhedhẹ.*
13 O ti kporo ipila* Bẹt-shimẹsh* nọ e rrọ ẹkwotọ Ijipti fihọ otọ ehehẹhẹ, yọ ọ te rọ erae mahe iwou* eghẹnẹ Ijipti.”’”
Eme-Obotọ
^ Evaọ Hibru, “Nebukadreza,” oghẹrẹ ofa nọ a kere i rie.
^ Hayo “etẹmpol.”
^ Hayo “ababọ omonwa.”
^ Hayo “ipila ithethei.”
^ Hayo “Uwou (Etẹmpol) Ọre na,” koyehọ, Hiliopolis.
^ Hayo “etẹmpol.”
