Jerimaya 48:1-47
-
Eruẹaruẹ oware nọ o te via kẹ Moab (1-47)
48 Rọ kpahe Moab,+ enẹ Jihova olori egbaẹmo, Ọghẹnẹ Izrẹl ọ ta:
“Uye u te Nibo,+ keme a raha e riẹ no!
A ru oma vuọ Kiriateyẹm+ je fi ei kparobọ no.
A ru oma vuọ oria adhẹzọ nọ o foma* na no jẹ guọghọ iẹe no.+
2 A gbe bi jiri Moab ho.
A jọ Hẹshbọn+ ma omaa epanọ o ti ro kie no inọ:
‘Nyaze, joma raha iẹe no re ọ siọ orẹwho ba ẹjọ.’
Whẹ Madmẹn omara fibo,Keme ọgbọdọ na o bi lele owhẹ.
3 Edo oviẹ o bi do no obọ Horoneyẹm ze,+Edo ọraha gbe ekie ologbo.
4 A raha Moab no.
Emọ esese riẹ e be viẹ.
5 A be viẹ ababọ eriosehọ nọ a be nya evaọ edhere-ukpehru Luhit na.
Yọ a bi yo edo ahwo nọ a be viẹ fiki okpẹtu na nọ a bi nwrotọ no Horoneyẹm ze na.+
6 Wha dhẹ, wha dhẹ kẹ uzuazọ rai!
Wha rẹ jọ wọhọ ure junipa nọ o rrọ udhude hrọ.
7 A ti fi owhẹ kparobọ reFikinọ who fievahọ iruo ra gbe ekwakwa-aghae ra.
Yọ Kimọsh+ o ti kpohọ igbo,Avọ izerẹ riẹ gbe ikpahwo-esuo riẹ.
8 Ọnọ ọ be raha ọraha na ọ te wọ ruọ okpẹwho kpobi,Yọ okpẹwho ọvo ọ te vabọ họ.+
Ukiekpotọ* na o te raha no,Yọ a te raha otọ opraprara* na no nwane wọhọ epanọ Jihova ọ ta.
9 Fi oka họ edhere kẹ Moab,Keme okenọ a te raha iẹe na ọ te dhẹ,Ikpewho riẹ i ti zihe ruọ oware idudu,Nọ ohwo ọvo ọ be rria ha.+
10 Uye u te* ohwo nọ o bi ru iruo Jihova jeve jeve!
Uye u te ohwo nọ ọ be rọwo rehọ ọgbọdọ riẹ kpe azẹ hẹ!
11 Oma o fọ ahwo Moab anwọ oke uzoge rai ze,Wọhọ udi nọ igbudugbu riẹ i dhẹmu obotọ.
A ri ku ae no othẹ jọ fihọ ọfa ha,Yọ a ri kpohọ igbo ẹdẹvo ho.
Oyejabọ nọ awere rai ọ gbẹ rọ rrọ epọvo na,Yọ ore rai u ri nwene he.
12 “‘Fikiere rri! edẹ e be tha,’ ere Jihova ọ ta, ‘nọ me ti vi ahwo re a gale ae vi. A te gale ae vi je ku idi nọ e rrọ ithẹ rai muotọ, a ve kpe ithẹ ilogbo rai ehehẹhẹ.
13 Oma Kimọsh o te vuọ ahwo Moab, nwane wọhọ epanọ oma Bẹtẹl o be vuọ uwou Izrẹl na, onọ o jọ oria nọ a fievahọ.+
14 Ono ọ kẹ owhai unu nọ wha be rọ ta nọ: “Mai yọ egbaẹmo egaga nọ e ruẹrẹ oma kpahe kẹ ẹmo”?’+
15 ‘A raha Moab no,A vẹruọ ikpewho riẹ no,+Yọ a kpe izoge emezae rai nọ e mai woma no,’+
Ere Ovie na, ọnọ odẹ riẹ o rrọ Jihova olori egbaẹmo ọ ta.+
16 Okpẹtu nọ o ti te ahwo Moab o totọ no,Yọ ekie rai ọ be tha kpata kpata.+
17 Ahwo kpobi nọ a wariẹ e rai họ a ti weri kẹ ae,Ahwo kpobi nọ a riẹ odẹ rai.
Ta kẹ ae nọ: ‘O rri epanọ a wiri ọkpọ ọgaga na no, ubiọkpọ erru na!’
18 Nwrotọ no oruaro ra ze,Re whọ keria avọ uruame nọ u bi kpe owhẹ,* O ọmọtẹ nọ ọ be rria Daebọn,+Keme ọnọ ọ be raha Moab na ọ wọ bru owhẹ ze no,Yọ ọ te raha eria ra nọ a di ogba wariẹ họ* fihọ otọ.+
19 Wha dikihẹ akotọ edhere na re wha rri, whai ahwo nọ a be rria Aroa.+
Wha nọ ọzae nọ ọ be dhẹ na gbe aye nọ ọ be dhẹ vabọ na nọ, ‘Eme ọ via?’
20 A ru oma vuọ Moab no jẹ whẹ idudu họ iẹe oma no.
Wha kuenu oviẹ je bo.
Wha woro evaọ Anọn+ inọ a raha Moab no.
21 “A bruoziẹ kpe otọ opraprara* na no,+ koyehọ Holọn, Jehaz,+ gbe Mẹfayat;+
22 te Daebọn,+ Nibo,+ gbe Bẹt-diblateyẹm;
23 te Kiriateyẹm,+ Bẹt-gemul, gbe Bẹt-miọn;+
24 te Kiriọt+ avọ Bọzra; jegbe ikpewho kpobi nọ e rrọ ẹkwotọ Moab, enọ e rrọ ugbothabọ gbe ekẹloma.
25 ‘A mi Moab ẹgba riẹ no;*A wiri ugbobọ riẹ no,’ ere Jihova ọ ta.
26 ‘Ru ei re idi i mu ei,+ keme ọ kpare omariẹ kpehru wọso Jihova.+
Moab ọ be thuẹ evaọ ehru eware nọ o geli,Ọ tẹ jẹ rrọ oware nọ a re ro se ẹkoko.
27 Kọ ogbẹrọnọ whẹ whọ jẹ rọ Izrẹl se ẹkoko?+
Kọ a ruẹ e riẹ evaọ udevie iji,Nọ who je ro nuhu uzou ra fiki riẹ jẹ ta ikpehre eme kpahe iẹe?
28 Wha nya no ikpewho na re wha nyae rria obọ ugbehru-utho na, whai ahwo nọ a be rria Moab,Re wha jọ wọhọ erueruẹ nọ ọ bọ uwou riẹ fihọ akotọ ukiekpotọ udidi nọ o rrọ udevie igbehru.’”
29 “Ma yo kpahe omorro Moab no—o re dhesẹ oma gaga—Ma yo kpahe uke-ufuo riẹ no, omorro riẹ, oma-udhesẹ riẹ, gbe oma nọ ọ be wọ kpehru evaọ udu riẹ.”+
30 “‘Mẹ riẹ ofu ọgaga riẹ,’ ere Jihova ọ ta,‘Rekọ oware ovo u ti no eme ifofe riẹ ze he.
I ti ru oware ovo ho.
31 Oyejabọ nọ me ti ro kuenu oviẹ fiki Moab na,Me ti bo fiki Moab sosoJe ti dimẹ fiki ahwo Kiẹ-hirẹs.+
32 O evaene Sibma,+ oviẹ nọ mẹ te viẹ fiki raU ti vi onọ mẹ viẹ fiki Jeza.+
Egha eboba ra nọ e rrọ bọbọbọ e fa abade na vrẹ no.
I te obọ abade na no, evaọ Jeza.
Ọnọ ọ be raha ọraha na ọ vẹruọ+Ehru ibi-ire ezi ivo ra gbe ibi-ire nọ whọ kọrọ no.
33 A si oghọghọ gbe evawere no ọgbọ na noJe no ẹkwotọ Moab no.+
Me ru nọ enwaene o gbe bi ro su no oria udi-uruo na ze he.
Yọ ohwo ọvo o gbe ti thihi ibi-ire avọ edo oghọghọ họ.
Edo na ọ te jọ oghẹrẹ edo ọfa.’”+
34 “‘A be jọ obọ Hẹshbọn+ bo ubo nọ u bi do te obọ Ẹliyela.+
A kpare uvou rai te epanọ a be rọ jọ obọ Jehaz+ yoi,Yọ ubo Zoa u bi do te obọ Horoneyẹm,+ je te obọ Ẹglat-shelaeshiya.
Makọ ame Nimrim dede ọ te kpọ yamu no.’+
35 Jihova ọ ta nọ, ‘Me ti ru nọ ohwo nọ ọ be rehọ ekẹ ziọ oria ukpehru naGbe ọnọ o bi dhe idhe kẹ ọghẹnẹ riẹỌ gbẹ te rọ jọ Moab ho.
36 Oyejabọ nọ udu mẹ u ti ro ru edo uweri fiki Moab wọhọ urete,*+Yọ udu mẹ u ti ru edo uweri fiki ezae Kiẹ-hirẹs wọhọ urete.*
Ekwakwa-efe nọ o kokohọ e te raha no.
37 Uzou kpobi o rrọ rioriorio,+Yọ a nware etuagba kpobi no.
A bru ela họ obọ kpobi,+Yọ ehọ-ekpa* e rrọ eku rai!’”+
38 “‘Uweri ọvo o vọEhru iwou Moab kpobiGbe iko-ore riẹ kpobi.
Keme me kpe Moab noWọhọ othẹ nọ a kufiẹ no,’ ere Jihova ọ ta.
39 ‘Rri epanọ ozọ ogaga u bi mu ei! Wha viẹ!
Rri epanọ Moab o ro kuomarẹriẹ avọ omovuọ no!
Moab o zihe ruọ oware nọ a re ro se ẹkoko no,Oware nọ o be lẹliẹ ozọ mu ahwo kpobi nọ a wariẹ e riẹ họ.’”
40 “Keme enẹ Jihova ọ ta:
‘Rri! Wọhọ ugo nọ o be tehe ziọ otọ,+Ọ te rriẹ ibekpe riẹ fihọ tehe bru Moab.+
41 A ti fi ewho na kparobọ,Yọ a te rehọ eria omofọwẹ riẹ no.
Evaọ ẹdẹ yena, udu egbaẹmo MoabO te jọ wọhọ udu aye nọ o bi yẹ.’”
42 “‘A te raha Moab muotọ, ọ gbẹ te jọ orẹwho ho,+Keme ọ kpare omariẹ kpehru wọso Jihova.+
43 Idudu, gbe ọgọdọ, gbe ẹta e rrọ aro ra,O whẹ ọnọ ọ be rria Moab,’ ere Jihova ọ ta.
44 ‘Ohwo kpobi nọ ọ be dhẹ fiki idudu na o ti kie fihọ ọgọdọ na,Yọ ohwo kpobi nọ o bi no ọgọdọ na ze, ẹta na o ti mu ei.’
‘Keme mẹ te kẹ Moab uye evaọ ukpe nọ me fihọ,’ ere Jihova ọ ta.
45 ‘Enọ e be dhẹ i dikihẹ otọ edhedhẹ Hẹshbọn ababọ ẹgba.
Keme erae i ti no Hẹshbọn ze,Erri erae i ve ti no eva Saehọn ze.+
E te mahe aruezo Moabe ukolo-uzou emọ ozighi no.’+
46 ‘Uye u te owhẹ, O Moab!
Ahwo Kimọsh+ a whu no.
Keme a mu emezae ra vrẹ no,Yọ emetẹ ra i kpohọ igbo no.+
47 Rekọ me ti koko ahwo Moab nọ a mu vrẹ na họ evaọ abọ urere edẹ na,’ ere Jihova ọ ta.
‘Enẹ ovuẹ oziẹ nọ a bru kpahe Moab u ro kuhọ.’”+
Eme-Obotọ
^ Hayo “oria ukpehru nọ o foma.”
^ Hayo “Ukiekpotọ opraprara.”
^ Hayo “ẹkwotọ ukpehru opraprara.”
^ Hayo “Eka i te.”
^ Hayo o sae jọ nọ, “otọ oyaya.”
^ Hayo “e rẹ bẹ ẹvẹruọ.”
^ Hayo “ẹkwotọ ukpehru opraprara.”
^ Evaọ Hibru, “A bru uzei Moab fihọ otọ no.”
^ Koyehọ, urete nọ a bi kporo ro weri uweri evaọ uwhori.
^ Koyehọ, urete nọ a bi kporo ro weri uweri evaọ uwhori.
^ Hayo “ehọ-ẹkporo.”
