Jerimaya 49:1-39
49 Rọ kpahe ahwo Ammọn,+ enẹ Jihova ọ ta:
“Kọ Izrẹl o gbe wo emezae?
Kọ o gbe wo ọreuku?
Kọ fikieme Malkam+ ọ rọ rehọ Gad no?+
Fikieme ahwo riẹ a be rọ rria ikpewho Izrẹl?”
2 “‘Fikiere rri! edẹ e be tha,’ ere Jihova ọ ta,‘Nọ me ti ru re a yo edo use ẹmo* nọ a ti fi Raba+ ọrọ ahwo Ammọn.+
O ti zihe ruọ ukpehru ufofe,Yọ a ti tu erae họ ewho esese riẹ.’*
‘Izrẹl ọ vẹ te rehọ ẹkwotọ enọ e rehọ ẹkwotọ riẹ vẹre,’+ ere Jihova ọ ta.
3 ‘Kuenu oviẹ, O Hẹshbọn, keme a raha Ai no!
Wha bo, O whai ewho esese Raba.
Wha ku ehọ-ekpa* họ.
Wha kuenu oviẹ je ghoro kpenẹ avọ enẹ evaọ udevie iwou-erao itho* na,Keme Malkam o ti kpohọ igbo,Avọ izerẹ riẹ gbe ikpahwo-esuo riẹ.+
4 Fikieme whọ be rọ rehọ ikiekpotọ* naGbe oria opraprara ra nọ ame ọ be jọ su na seha, O whẹ ọmọtẹ nọ o bi gbe-ọfariẹ,Ọnọ ọ rẹroso ekwakwa-aghae riẹ,Jẹ be ta nọ: “Ono ọ te wọ ohọre bru omẹ ze?”’”
5 “‘Rri, mẹ be rehọ oware jọ ze nọ o te whẹ idudu họ owhẹ oma,’ ere Olori nọ Ọ Mai Kpehru na, Jihova olori egbaẹmo ọ ta,‘Mẹ te rehọ iẹe no udevie ahwo kpobi nọ a wariẹ owhẹ họ ze.
A te vaha owhai fihọ ofẹ kpobi,Yọ ohwo ọvo o ti koko enọ e dhẹ họ họ.’”
6 “‘Rekọ oyena o tẹ vrẹ no, me ti koko ahwo Ammọn nọ a mu vrẹ na họ,’ ere Jihova ọ ta.”
7 Rọ kpahe Edọm, enẹ Jihova olori egbaẹmo ọ ta:
“Kọ areghẹ ọvo ọ gbẹ rrọ Timan?+
Kọ emamọ ohrẹ u re no evaọ obọ ahwo nọ a wo otoriẹ?
Kọ areghẹ rai o zihe ruọ oware nọ u gbe wo iruo ho no?
8 Wha dhẹ, wha kuomarẹriẹ zihe!
Wha nyae jọ obọ eria ididi na, O whai ahwo nọ a be rria Didan!+
Keme mẹ te rehọ okpẹtu te EsọNọ oke nọ mẹ te rọ rẹriẹ ovao ku ei u te te.
9 Otẹrọnọ enọ e rẹ kwa ibi-ire e tẹ nyabru owhẹ ze,Kọ a gbẹ te kwa ejọ kiọkọ nọ a re ro si isogẹ?
Otẹrọnọ iji e nyaze evaọ aso,Eware nọ a gwọlọ kwa ọvo a rẹ kwa.+
10 Rekọ mẹ te ba Esọ fihọ.
Me ti rovie eria riẹ nọ a re dhere fihọ,Re ọ gbẹ sai dhere he.
A te raha emọ riẹ gbe imoni riẹ gbe erivẹ riẹ kpobi no,+Ọ gbẹ te jọ ofa ha.+
11 Nyasiọ emọ ra nọ i wo esẹ hẹ ba,Mẹ te sẹro uzuazọ rai,Yọ eyae-uku ra e te rẹroso omẹ.”
12 Keme enẹ Jihova ọ ta: “Rri! Otẹrọnọ ahwo nọ a bruoziẹ kpe he inọ a da egho na a rẹ dae hrọ, kọ whẹ a rẹ kẹ uye vievie he? A te siọ owhẹ uye ba ẹkẹ hẹ, keme whọ rẹ dae hrọ.”+
13 “Keme mẹ rehọ omobọ mẹ duwu iyei no,” ere Jihova ọ ta, “inọ Bọzra o ti zihe ruọ oware idudu,+ oware ekela, oware nọ o raha gaga no, gbe oware nọ a rẹ rọ bọwo ehao; yọ ikpewho riẹ kpobi i ti zihe ruọ eria nọ a raha muotọ no.”+
14 Me yo usi jọ no obọ Jihova ze no,A vi ọnyukọ ruọ udevie erẹwho na no, inọ:
“Wha koko omarai họ re wha wọ ẹmo bru ei;Wha ruẹrẹ oma kpahe kẹ ẹmo.”+
15 “Keme rri! me ru owhẹ fihọ ọnọ o fioka ha no evaọ udevie erẹwho na;Ọnọ a bi leri evaọ udevie ahwo.+
16 Idudu nọ whọ be wha se ahwo e viẹ owhẹ họ no,Omorro nọ o rrọ udu ra,O whẹ nọ ọ be rria eria nọ i siomano evaọ ugbehru-utho,Ọnọ ọ be rria ukpehru nọ o mai kpehru na.
Dede nọ whọ bọ uwou ra fihọ obọ ehru wọhọ ugo,Mẹ te rehọ owhẹ no obei ziọ otọ,” ere Jihova ọ ta.
17 “Edọm o ti zihe ruọ oware idudu hrọ.+ Ohwo kpobi nọ ọ be nya akotọ riẹ vrẹ o ti rri rie avọ idudu, ọ vẹ te fiunu fiki iye riẹ kpobi.
18 Nwane wọhọ epanọ o jọ evaọ okenọ a raha Sọdọm avọ Gomora gbe ewho nọ e wariẹ e rai họ na, ere o te jọ re,”+ ere Jihova ọ ta, “ohwo ọvo ọ te jọ etẹe he, yọ ohwo ọvo ọ te rria etẹe he.+
19 “Rri! Ohwo jọ ọ te wọ ohọre ziọ etọ nọ erao e rẹ jọ re ẹbe nọ oma o fọ na wọhọ okpohrokpo nọ+ o no etuetue nọ ọ rrọ akotọ Ethẹ Jọdan ze, rekọ o te raha oke he, me ti ru ei dhẹ se iẹe ba. Mẹ vẹ te rehọ ọnọ a salọ na mu re o wuzou riẹ. Keme, ono ọ wọhọ omẹ, yọ ono ọ te nọ omẹ unu? Othuru-igodẹ vẹ ọ rẹ sae dadamu kẹ omẹ?+
20 Fikiere, whai ahwo, wha yo oware nọ Jihova ọ jiroro riẹ nọ o ti ru Edọm gbe oware nọ o roro no inọ o ti ru ahwo nọ a be rria Timan:+
Ababọ avro, a ti si imigodẹ nọ e rrọ uthuru na vrẹ ototọ.
O ti ru oria nọ a be rria fihọ ofofe fiki rai.+
21 Otọakpọ na u nuhu no fiki edo ukie rai.
Ahwo jọ a bi bo!
A be jọ ugbo obọ Abade Ọwawae na yo edo na.+
22 Rri! O ti kpobọ ehru wọhọ ugo, ọ vẹ tehe ziọ otọ,+Yọ ọ te rriẹ ibekpe riẹ fihọ tehe bru Bọzra.+
Evaọ ẹdẹ yena, udu egbaẹmo EdọmO te wọhọ udu aye nọ o bi yẹ.”
23 Rọ kpahe Damaskọs:+
“A ru oma vuọ Hemat+ avọ Apad no,Keme a yo ekpehre usi no.
Ozọ u kpe rai no.
A wọhọ ẹkporo nọ ọ rrọ abade nọ a rẹ sai ru fọ rirẹ hẹ.
24 Udu u no Damaskọs awọ no.
O kuomarẹriẹ no re ọ dhẹ, rekọ awa o kpe rie no.
Uye gbe edada i te rie oma no,Wọhọ aye nọ o bi yẹ.
25 Fikieme a gbẹ re rọ dhẹ siọ okpẹwho ujiro na ba ha,Ẹwho oghọghọ na?
26 Keme izoge emezae riẹ i ti kie evaọ iko-ore riẹ,Yọ isoja na kpobi i ti whu evaọ ẹdẹ yena,” ere Jihova olori egbaẹmo ọ ta.
27 “Me ti tu erae họ ugbẹhẹ Damaskọs,Yọ e te mahe iwou ikpehru Bẹn-hedad nọ e rẹ bẹ ẹvẹruọ muotọ.”+
28 Rọ kpahe Kida+ gbe ekwotọ-ivie Hezọ, enọ Nebukadneza* ovie Babilọn o fi kparobọ, enẹ Jihova ọ ta:
“Kparoma, nya kpobọ Kida,Re whọ raha emezae obọ Ovatha-ọre na no.
29 A te rehọ iwou-udhu rai gbe ithuru erao rai,Ehọ iwou-udhu rai gbe eware rai kpobi.
A te rehọ ekamẹle rai vrẹ,Yọ a ti bo kẹ ae nọ, ‘Idudu e rrọ oria kpobi!’”
30 “Wha dhẹ, wha dhẹ thethabọ!
Wha nyae jọ obọ eria ididi na, O whai ahwo nọ a be rria Hezọ,” ere Jihova ọ ta.
“Keme Nebukadneza* ovie Babilọn ọ ma omaa oware uyoma jọ kpahe owhai no,O roro oware uyoma jọ nọ o ti ru owhai no.”
31 “Wha kparoma, wha wọ ohọre bru orẹwho nọ udhedhẹ o rrọ na,Onọ o be rria avọ omofọwẹ na!” ere Jihova ọ ta.
“U wo ethẹ hayo ekpọ nọ a rẹ rọ kare ẹthẹ hẹ; ae ọvo a be rria oria rai sa.
32 A ti mu ekamẹle rai rehọ,Yọ erao ibuobu rai na i ti zihe ruọ egbo-ẹmo.
Mẹ te vaha ae fihọ rọkẹ ofou kpobi,*Enọ e nware eto akotọ aruezo rai no na,+Yọ mẹ te rehọ okpẹtu te ai no ofẹ kpobi ze,” ere Jihova ọ ta.
33 “Hezọ o ti zihe ruọ eghogho nọ ikozi e rẹ jọ,Oria nọ o te jọ ofofe bẹdẹ bẹdẹ.
Ohwo ọvo ọ te jọ etẹe he,Yọ ohwo ọvo ọ te rria etẹe he.”
34 Onana họ ẹme Jihova nọ o bru Jerimaya ọruẹaro na ze kpahe Ilam+ evaọ obọ emuhọ esuo Zẹdikaya+ ovie Juda:
35 “Enẹ Jihova olori egbaẹmo ọ ta, ‘Rri, me bi wiri uze Ilam+ no, oria nọ ogaga rai u bi no ze.*
36 Mẹ te rehọ ifou ene nọ i no ibienẹ ene idhiwu na ze ro fou Ilam, yọ mẹ te vaha ae fihọ rọkẹ ifou nana kpobi. Orẹwho ovo o te jariẹ hẹ nọ ahwo Ilam nọ a vahabọ na a ti kpohọ họ.’”
37 “Me ti fi ozọ họ ahwo Ilam oma evaọ aro ewegrẹ rai gbe evaọ aro enọ e be gwọlọ uzuazọ* rai kpe; yọ mẹ te rehọ okpẹtu te ai, ofu ọgaga mẹ,” ere Jihova ọ ta. “Me ti vi ọgbọdọ na ro le ai bẹsenọ me re kpe ai muotọ no.”
38 “Mẹ te rehọ agbara-uvie mẹ vi evaọ Ilam,+ yọ mẹ te raha ovie na gbe ikpahwo-esuo na no etẹe no,” ere Jihova ọ ta.
39 “Rekọ evaọ abọ urere edẹ na, me ti koko ahwo Ilam nọ a mu vrẹ na họ,” ere Jihova ọ ta.
Eme-Obotọ
^ Hayo o sae jọ nọ, “Edo ubo ẹmo.”
^ Hayo “ewho nọ e wariẹ e riẹ họ.”
^ Hayo “ehọ-ẹkporo.”
^ Hayo “iwou igodẹ.”
^ Hayo “ikiekpotọ epraprara.”
^ Evaọ Hibru, “Nebukadreza,” oghẹrẹ ofa nọ a kere i rie.
^ Evaọ Hibru, “Nebukadreza,” oghẹrẹ ofa nọ a kere i rie.
^ Hayo “fihọ ofẹ kpobi.”
^ Evaọ Hibru, “emuhọ ogaga rai.”
