Jerimaya 51:1-64
51 Enẹ Jihova ọ ta:
“Rri mẹ be rehọ ofou ọraha zeRọsuọ Babilọn+ avọ ahwo nọ a be rria Lẹb-kemae.*
2 Me ti vi enọ e rẹ frẹ erara no ibi ekakọ kpobọ Babilọn,A vẹ te frẹ riẹ kpehru fihọ ofou je ru ẹkwotọ riẹ fihọ ofofe;A te rọsuọ ẹe evaọ ofẹ kpobi evaọ ẹdẹ okpẹtu.+
3 Jọ ọnọ ọ rẹ sa ose ọ vẹ* uze riẹ hẹ.
Yọ ajọ ohwo ọvo ọ kpama dikihẹ avọ ewu-ẹmo nọ o ku họ họ.
Wha dhesẹ ọdawẹ kẹ izoge emezae riẹ hẹ.+
Wha raha ogbaẹmo riẹ kpobi muotọ.
4 A ti whu fihọ otọ evaọ ẹkwotọ ahwo Kaldia na,Avọ epanọ a ro duwu ai lafi evaọ iyẹrẹ riẹ.+
5 Keme Jihova olori egbaẹmo, Ọghẹnẹ rai ọ nyasiọ Izrẹl avọ Juda ba re a jọ wọhọ eyae-uku hu.+
Rekọ ẹkwotọ rai* ọ reabe vọ uzou evaọ aro Ọrẹri Izrẹl.
6 Wha dhẹ no eva Babilọn,Re wha dhẹ kẹ uzuazọ rai.+
Wha whu fiki oruthọ riẹ hẹ.
Keme oke orukele Jihova u te no.
Ọ be hwosa eware nọ o ru zihe kẹe.+
7 Babilọn ọ jọ egho igoru evaọ obọ Jihova;O ru idi mu otọakpọ na soso.
Erẹwho na e jọ enwaene riẹ da;+Oyejabọ nọ oruẹ u ro kru erẹwho na no na.+
8 Babilọn o kie no idudhe jẹ nwoma no.+
Wha kuenu oviẹ fiki riẹ!+
Wha gwọlọ balsam ze fiki edada nọ e riẹe oma; ẹsejọhọ a te sai siwi omonwa riẹ kpo.”
9 “Ma jẹ daoma re ma siwi omonwa Babilọn, rekọ ma sai siwi ei hi.
Wha nyase iẹe ba re ma nyavrẹ kpohọ ọvuọ ẹkwotọ riẹ.+
Keme oware nọ a rọ fiki riẹ bruoziẹ kpei u te obọ idhiwu na no;O rrọ kpekpehru wọhọ ẹgho na.+
10 Jihova o ru oware ukiẹrẹe kẹ omai no.+
Wha nyaze re ma jọ Zayọn gbiku iruo Jihova Ọghẹnẹ mai.”+
11 “Wha thọ ese na fihọ dada;+ wha tọlọ ejese igheghelie na.*
Jihova o duobọte udu* ivie Midia no,+Keme ọ gwọlọ nọ ọ rẹ raha Babilọn no.
Keme onana yọ orukele Jihova, orukele fiki etẹmpol riẹ.
12 Wha kpare oware oka*+ kpehru rọsuọ igbẹhẹ Babilọn.
Ru iroiro na ga, fi iroroke na họ ọvuọ oria riẹ.
Ruẹrẹ enọ i dhere be hẹrẹ na kpahe.
Keme Jihova ọ ma omaa oware nọ o ti ru no,Yọ o ti ru oware nọ ọ ya eyaa riẹ nọ o ti ru ahwo nọ a be rria Babilọn na gba.”+
13 “O aye nọ ọ be rria ehru ame obuobu,+Nọ o wo ekwakwa-aghae gbidi gbidi,+Urere ra o ze no, erere nọ who bi wo o te oba no.+
14 Jihova olori egbaẹmo ọ rehọ omobọ riẹ* duwu iyei no inọ,‘Me ti ru ezae zurie ziọ eva ra, yọ a te jọ buobu wọhọ ebaka-ẹkpẹ,A ti bo ubo obokparọ fiki ra.’+
15 Ọye họ Ọnọ ọ rehọ ogaga riẹ ma otọakpọ na,Ọnọ ọ rehọ areghẹ riẹ rọ otọakpọ na vi+Jẹ rehọ otoriẹ riẹ rọ rriẹ idhiwu na fihọ.+
16 Okenọ o te ru re a yo edo urru riẹ,Ẹvohẹ ọ vẹ ruọ ame nọ ọ rrọ idhiwu na,O re ru ẹgho* kuye kpehru no oka avọ oka otọakpọ na ze.
O re ru elo egbrara lo lele oso,*Yọ ọ rẹ rehọ ofou na no iwou riẹ nọ ọ rẹ jọ sẹro* eware ze.+
17 Ohwo kpobi o bi ru eware ababọ iroro gbe ababọ eriariẹ.
A ti ru oma vuọ odhogu kpobi fiki ẹmema nọ a kare na;+Keme ẹmema ayọno riẹ* yọ eviẹhọ,Yọ ẹzi* ọ rrọ ae oma ha.+
18 Eviẹhọ* a rrọ,+ iruo nọ a re ro se ẹkoko.
A te raha ai no evaọ ẹdẹ nọ a ti gu epanọ a ru te.
19 Ọnọ ọ rrọ Ẹkẹ Jekọp ọ rrọ wọhọ eware nana ha,Keme ọye họ Ọnọ ọ ma eware kpobi,Makọ ubiọkpọ ukuoriọ riẹ.+
Jihova olori egbaẹmo họ odẹ riẹ.”+
20 “Whẹ yọ ọkpọ* ẹmo kẹ omẹ, okwakwa nọ a re ro fi ẹmo,Keme whẹ mẹ te rọ fa erẹwho whọlọ.
Whẹ mẹ te rọ raha ekwotọ-ivie.
21 Whẹ mẹ te rọ fa anyenya avọ ọnọ ọ be dhẹe whọlọ.
Whẹ mẹ te rọ fa akẹkẹ ẹmo avọ ọnọ ọ be dhẹe whọlọ.
22 Whẹ mẹ te rọ fa ọzae avọ aye whọlọ.
Whẹ mẹ te rọ fa ọkpọkuọzae avọ ọmọzae whọlọ.
Whẹ mẹ te rọ fa ọmoha avọ aye whọlọ.
23 Whẹ mẹ te rọ fa othuru-igodẹ avọ uthuru riẹ whọlọ.
Whẹ mẹ te rọ fa ọwhẹrẹ avọ utu erao riẹ nọ i re kporo udhu whọlọ.
Whẹ mẹ te rọ fa eba avọ ethabọ isu whọlọ.
24 Mẹ te hwosa zihe kẹ Babilọn avọ ahwo kpobi nọ a be rria KaldiaFiki eware iyoma kpobi nọ a jọ Zayọn ru evaọ iraro rai,”+ ere Jihova ọ ta.
25 “Rri, mẹ te rọsuọ owhẹ,+ O ugbehru ọraha na,” ere Jihova ọ ta,“Whẹ ọnọ ọ be raha otọakpọ na soso na.+
Mẹ te rriẹ obọ mẹ rọsuọ owhẹ je ghelie owhẹ fihọ otọ no ehru igbehru-itho na ze,Me ve ru owhẹ fihọ ugbehru nọ erae e to.”
26 “Ahwo a te jọ eva ra rehọ utho ubienẹ hayo utho otọhotọ họ,Keme whọ te jọ ofofe bẹdẹ bẹdẹ,”+ ere Jihova ọ ta.
27 “Wha kpare oware oka* jọ kpehru evaọ ẹkwotọ na.+
Wha kporo onware evaọ udevie erẹwho na.
Rehọ erẹwho na mu* re a rọsuọ ẹe.
Se ekwotọ-ivie Ararat,+ Minae, gbe Ashkenaz+ ze re a rọsuọ ẹe.
Vi ọgbaẹmo nọ ọ rẹ rehọ ahwo fihọ ogbaẹmo re ọ nyae rọsuọ ẹe.
Ru re enyenya na e wọ ze wọhọ ebaka-ẹkpẹ eboba nọ i bi su gbidi gbidi.
28 Rehọ erẹwho na mu* re a rọsuọ ẹe,Ivie Midia,+ eba riẹ avọ ethabọ isu riẹ kpobiGbe ekwotọ kpobi nọ a bi su.
29 Otọakpọ na u ti nuhu je guegue,Keme a ti ru oware nọ Jihova o wo họ iroro kpahe Babilọn gba,Re o ru ẹkwotọ Babilọn zihe ruọ oware idudu, nọ ohwo ọvo ọ be rria ha.+
30 Egbaẹmo Babilọn e siọ ohọre ba no.
A keria eria omofọwẹ rai.
Ẹgba rai o re no.+
A wọhọ eyae enẹna.+
A tu erae họ iwou riẹ no.
A wiri ekpọ riẹ nọ a rẹ rọ kare ẹthẹ no.+
31 Ọwhovuẹ ọ be dhẹ ku ọwhovuẹ ọfa,Yọ ọnyukọ ọ be dhẹ ku ọnyukọ ọfa,A be dhẹ nyae vuẹ ovie Babilọn inọ a jọ ofẹ kpobi fi okpẹwho riẹ kparobọ no,+
32 Inọ a rehọ eria ekpakpafua ethẹ na no,+Inọ a rehọ erae mahe ekọ papirọs na no,Gbe nọ iguegue e ruọ isoja na oma no.”
33 Keme enẹ Jihova olori egbaẹmo, Ọghẹnẹ Izrẹl ọ ta:
“Ọmọtẹ Babilọn ọ wọhọ oria nọ a rẹ jọ si ibi no igbe ekakọ.
Oke nọ a te rọ rehọ ogaga thihi ei nyaotọ u te no.
Uviemenẹ oke nọ a ti ro vu ei o te ze.”
34 “Nebukadneza* ovie Babilọn ọ re omẹ no;+Ọ whẹ ozighi họ omẹ oma no.
O fi omẹ họ otọ no wọhọ othẹ ofofe.
Ọ lọ omẹ no wọhọ araomuomu ologbo;+Ọ re emamọ eware mẹ vọ eva riẹ no.
O wurie omẹ kufiẹ no.
35 ‘Jọ ohọre nọ a họre omẹ gbe oma mẹ o ziọ uzou Babilọn!’ ere ohwo nọ ọ be rria Zayọn ọ ta.+
‘Jọ azẹ mẹ ọ ziọ uzou ahwo nọ a be rria Kaldia!’ ere Jerusalẹm ọ ta.”
36 Fikiere enẹ Jihova ọ ta:
“Rri, mẹ be thọ owhẹ evaọ ẹdhọ ra,+Mẹ te kioja kẹ owhẹ.+
Me ti ru abade riẹ kpọ yamu je ru eza riẹ kpọ no.+
37 Babilọn o ti zihe ruọ eria nọ a kwa itho kuku,+Eghogho nọ ikozi e rẹ jọ,+Oware idudu gbe oware nọ a rẹ rọ fiki riẹ fiunu,Oria nọ ohwo ọvo ọ be rria ha.+
38 Aikpobi a ti do enu wọhọ ikpohrokpo egaga.*
A te go wọhọ emọ ikpohrokpo.”
39 “Okenọ isiuru e tẹ da ae oma fia no, mẹ te wọ okpemu ze rọ kẹ ae je ru idi mu ai,Re a ruẹse ghọghọ;+Kẹsena a vẹ te wezẹ owezẹ ebẹdẹ bẹdẹ,Owezẹ nọ a te rọwo no ze he,”+ ere Jihova ọ ta.
40 “Mẹ te rehọ ae ze wọhọ imigodẹ nọ a bi su kpohọ oria nọ a re jo kpe erao,Wọhọ igbo jegbe ewe.”
41 “O, rri epanọ a fi Shishak* kparobọ no,+Epanọ a fi okpẹwho nọ a je jiri evaọ otọakpọ na soso kparobọ no!+
Rri epanọ Babilọn o zihe ruọ oware idudu evaọ udevie erẹwho na no!
42 Abade na ọ wọ ruru Babilọn no.
Ẹkporo ọgaga abade na ọ wọ ruru iei no.
43 Ikpewho riẹ i zihe ruọ oware idudu no, ẹkwotọ nọ ame ọ rrọ họ gbe udhude.
Ẹkwotọ nọ ohwo ọvo ọ te rria ha, gbe oria nọ ohwo ọvo ọ te nyavrẹ hẹ.+
44 Mẹ te rẹriẹ ovao ku Bẹl+ evaọ Babilọn,Yọ mẹ te rehọ oware nọ ọ lọ na no unu riẹ ze.+
Erẹwho i ti gbe zurie kpohọ iẹe ofa ha,Yọ ugbẹhẹ Babilọn u ti kie.+
45 Wha no eva riẹ no, ahwo mẹ!+
Wha dhẹ kẹ uzuazọ rai+ re ofu ọgaga Jihova+ ọ siọ owhai ba ete!
46 Wha bru udu hu hayo dhozọ họ fiki iyẹrẹ nọ wha ti yo evaọ ẹkwotọ na.
Wha ti yo iyẹrẹ na evaọ ukpe ọvo jọ,Evaọ ukpe nọ u lele i rie wha ti yo iyẹrẹ ọfa,Iyẹrẹ ozighi nọ ọ rrọ ẹkwotọ na gbe osu nọ ọ be họre osu.
47 Fikiere rri! edẹ e be thaNọ mẹ te rẹriẹ ovao ku emema nọ a kare nọ e rrọ Babilọn.
A ti ru oma vuọ ẹkwotọ riẹ soso,Yọ a ti kpe ahwo riẹ kpobi nọ a rrọ eva riẹ fihọ otọ.+
48 Idhiwu na avọ otọakpọ na gbe eware kpobi nọ e rrọ eva raiA ti bo ubo oghọghọ fiki Babilọn,+Keme enọ e rẹ raha ọraha na i ti no obọ ẹkpẹlobọ ovatha-ọre bru ei ze,”+ ere Jihova ọ ta.
49 “Orọnikọ ahwo Izrẹl ọvo Babilọn o kpe he,+Rekọ a jọ Babilọn kpe ahwo otọakpọ na kpobi re.
50 Whai enọ e va ọgbọdọ na abọ, wha dhẹ vrẹ ọvo, wha dikihẹ oria ovo ho!+
Wha jọ ugbothabọ kareghẹhọ Jihova,Yọ ajọ Jerusalẹm ọ ziọ udu rai.”+
51 “A ru oma vuọ omai no, keme a be poviẹ omai.
Omovuọ u ruru ovao mai no,Keme ahwo erẹwho efa* a wọ ze te raha eria ọrẹri uwou Jihova no.”+
52 “Fikiere rri! edẹ e be tha,” ere Jihova ọ ta,“Nọ mẹ te rẹriẹ ovao ku emema riẹ nọ a kare,Yọ ahwo nọ a nwoma a ti dimẹ evaọ ẹkwotọ riẹ soso.”+
53 “Otẹrọnọ Babilọn ọ tẹ make gadiẹ kpobọ idhiwu na dede,+Otẹrọnọ ọ tẹ maki ru eria omofọwẹ ikpekpehru riẹ fihọ gaga dede,Obọ mẹ enọ e te raha iẹe i ti no ze,”+ ere Jihova ọ ta.
54 “Gaviezọ! Edo oviẹ o bi do no obọ Babilọn ze,+Edo okpẹtu ologbo o bi do no obọ ẹkwotọ ahwo Kaldia ze,+
55 Keme Jihova ọ be raha Babilọn no,O ti ru nọ a gbe ti yo edo uvou ulogbo riẹ hẹ,Yọ edo ewegrẹ riẹ o ti do wọhọ ame obuobu.
A ti yo edo uvou rai.
56 Keme ọnọ ọ rẹ raha ọraha na ọ te wọ ruru Babilọn;+A ti mu egbaẹmo riẹ,+A ti wiri ize rai,Keme Jihova yọ Ọghẹnẹ orukele.+
Ọ te se iẹe ba ẹhwa zihe kẹ hẹ.+
57 Me ti ru idi mu ikpahwo-esuo riẹ gbe ezae iwareghẹ riẹ,+Te eba riẹ avọ ethabọ isu riẹ gbe egbaẹmo riẹ,A te wezẹ owezẹ ebẹdẹ bẹdẹ,Owezẹ nọ a te rọwo no ze he,”+ ere Ovie na, ọnọ odẹ riẹ o rrọ Jihova olori egbaẹmo ọ ta.
58 Enẹ Jihova olori egbaẹmo ọ ta:
“Dede nọ ugbẹhẹ Babilọn o rrọ kẹkẹe na, a ti kporo iei fihọ otọ riẹriẹriẹ,+Yọ dede nọ inuethẹ riẹ e rrọ kpekpehru na, a ti tu erae họ ae.
Ahwo na a te ruẹ uye kufiẹ;Erae e te to eware kpobi nọ erẹwho na e ruẹ uye fihọ no.”+
59 Onana họ ẹme nọ Jerimaya ọruẹaro na o ro jie uzi kẹ Seraya ọmọzae Neraya+ ọmọzae Masaya okenọ o lele Zẹdikaya ovie Juda kpobọ Babilọn evaọ ukpe avọ ene esuo riẹ; Seraya ọ jọ ọnọ ọ jẹ rẹrote eware ovie na.
60 Jerimaya o kere okpẹtu kpobi nọ o ti te Babilọn fihọ obe ovo, koyehọ eme nana kpobi nọ a kere kpahe Babilọn na.
61 Ofariẹ, Jerimaya ọ ta kẹ Seraya nọ: “Okenọ who te te Babilọn jẹ ruẹ e riẹ no, who re se eme nana kpobi do via hrọ.
62 Kẹsena whọ vẹ ta nọ, ‘O Jihova, whọ ta kpahe oria nana inọ a te raha iẹe no, yọ a gbẹ te rriae he, te ohwo te arao, gbe nọ o ti zihe ruọ ofofe bẹdẹ bẹdẹ.’+
63 Nọ who te se obe nana re no, whọ rẹ gba utho fihọ iẹe, who ve gbolo iei fihọ udevie Ethẹ Yufretis na.
64 Kẹsena whọ vẹ ta nọ, ‘Enẹ Babilọn o ti kiediwi kpobọ otọ, ọ gbẹ te va ze ofa vievie he+ fiki okpẹtu nọ me bi ti ro tei na; yọ oma o te lọhọ ae.’”+
Etenẹ eme Jerimaya e jọ kuhọ.
Eme-Obotọ
^ O wọhọ nọ onana yọ odẹ ofa nọ a re se Kaldia re a gbẹ riẹ nọ ọye a bi se he.
^ Evaọ Hibru, “o thihi.”
^ Koyehọ, ẹkwotọ ahwo Kaldia na.
^ Hayo o sae jọ nọ, “wha kwa owha-ese na vọ.”
^ Evaọ Hibru, “ẹzi.”
^ Hayo “ọkpọ oka.”
^ Hayo “erri.”
^ Hayo o sae jọ nọ, “O re ru inu nọ oso o re ro hwẹ ze.”
^ Hayo “rawo.”
^ Hayo “ẹmema riẹ nọ a ghra ayọno ro ru.”
^ Hayo “ẹwẹ.”
^ Hayo “Oware ufofe.”
^ Hayo “ọkpọkọlọ.”
^ Hayo “ọkpọ oka.”
^ Evaọ Hibru, “Ru erẹwho na fo.”
^ Evaọ Hibru, “Ru erẹwho na fo.”
^ Evaọ Hibru, “Nebukadreza,” oghẹrẹ ofa nọ a kere i rie.
^ Hayo “ikpohrokpo nọ e rrọ whẹvu.”
^ O wọhọ nọ onana yọ odẹ ofa nọ a re se Bebẹl (Babilọn) re a gbẹ riẹ nọ ọye a bi se he.
^ Hayo “erara.”
