Jerimaya 7:1-34
7 Onana họ ẹme nọ o no obọ Jihova bru Jerimaya ze, inọ:
2 “Dikihẹ unuẹthẹ uwou Jihova re whọ jọ etẹe whowho ovuẹ nana, ‘Wha yo ẹme nọ Jihova ọ ta, whai ahwo Juda kpobi nọ a be nya inuethẹ nana ruọ eva nyai guzou kpotọ kẹ Jihova.
3 Enẹ Jihova olori egbaẹmo, Ọghẹnẹ Izrẹl ọ ta: “Wha nwene idhere rai gbe iruẹru rai, mẹ vẹ te kẹ owhai uvẹ re wha gbẹ rria oria nana.+
4 Wha fievahọ eme eviẹhọ họ, be ta nọ, ‘Etẹmpol Jihova ọna,* etẹmpol Jihova, etẹmpol Jihova!’+
5 Keme otẹrọnọ wha gine nwene idhere rai gbe iruẹru rai; otẹrọnọ wha bi gine bru uvioziẹ evaọ udevie ohwo avọ ọrivẹ riẹ;+
6 otẹrọnọ wha gbe bi kienyẹ erara nọ e be rria udevie rai hi, emọ nọ i wo esẹgbini hi,* gbe eyae-uku hu;+ otẹrọnọ wha gbe bi kpe azẹ ekueku evaọ oria nana ha; yọ otẹrọnọ wha gbe bi lele eghẹnẹ efa ha, onọ o rẹ wha enwoma se owhai;+
7 ẹsiẹe mẹ te kẹ owhai uvẹ re wha gbẹ rria oria nana, evaọ ẹkwotọ nọ mẹ rọ kẹ esẹ-esẹ rai re a rria evaọ oke kpobi na.”’”*
8 “Rekọ wha bi fievahọ eme eviẹhọ+—o te wha erere ọvo ze vievie he.
9 Kọ wha re tho uji no,+ kpe ohwo no, bruẹnwae no, duwu iyei ọrue no,+ dhe idhe* kẹ Bale no,+ je lele eghẹnẹ nọ wha riẹ vẹre he no,
10 wha vẹ nyaze ti dikihẹ aro mẹ evaọ uwou nana nọ a rehọ odẹ mẹ se na jẹ ta nọ, ‘A ti siwi omai,’ ghele eware etọtọ nana kpobi nọ wha bi ru na?
11 Kọ uwou nana nọ a rehọ odẹ mẹ se na u zihe ruọ eghogho-utho iwhewheriwhe no evaọ aro rai?+ Mẹ omamẹ mẹ ruẹ oware nọ wha bi ru no,” ere Jihova ọ ta.
12 “‘Rekọ enẹna, wha kpohọ oria mẹ evaọ obọ Shailo,+ oria nọ mẹ kaki ru re odẹ mẹ o jọ,+ re wha ruẹ oware nọ me ru rie fiki eyoma ahwo mẹ Izrẹl.+
13 Rekọ wha ruabọhọ je ru eware nana kpobi,’ ere Jihova ọ ta, ‘yọ dede nọ me je dhe owhai ẹme ẹtẹta kẹ,* wha gaviezọ họ.+ Mẹ ruabọhọ je se owhai, rekọ wha jẹ kpunu hu.+
14 Nwane wọhọ epanọ me ru Shailo na,+ ere me ti ru uwou nọ a rehọ odẹ mẹ se nọ wha bi fievahọ na,+ gbe oria nana nọ mẹ rehọ kẹ owhai gbe esẹ-esẹ rai na.+
15 Me ti gbolo owhai kufiẹ no aro mẹ, nwane wọhọ epanọ me gbolo imoni rai kpobi, ahwo uyẹ Ifremu soso kufiẹ na.’+
16 “Rọkẹ owhẹ, whọ lẹ fiki ahwo nana ha. Who bo via hayo lẹ olẹ hayo lẹ omẹ fiki rai hi,+ keme mẹ te gaviezọ kẹ owhẹ hẹ.+
17 Kọ whọ be ruẹ oware nọ a bi ru evaọ ikpewho Juda gbe evaọ iyẹrẹ Jerusalẹm?
18 Emezae na i bi hwe ire kokohọ, esẹ na i bi koko erae na họ, yọ eyae na e be gua eka nọ a wuhu no kugbe re a ruẹsi ru ikeki nọ a re ro dhe idhe kẹ Ovie-aye Odhiwu* na,+ yọ a bi ku idhe udi kẹ eghẹnẹ efa re a ro ru omẹ eva dha.+
19 ‘Kọ mẹ họ ọnọ a be nwoma?’* ere Jihova ọ ta. ‘Kọ ogbẹrọnọ omobọ rai a bi ru, onọ o be wha omovuọ se ai?’+
20 Fikiere, enẹ Jihova Olori nọ Ọ Mai Kpehru na ọ ta, ‘Rri! Me ti ku evedha mẹ gbe ofu ọgaga mẹ ku oria nana,+ te ohwo-akpọ te arao, te ire obọ ẹwọ te eware nọ i no otọ na ze; o te to, yọ a ti furie iei hi.’+
21 “Enẹ Jihova olori egbaẹmo, Ọghẹnẹ Izrẹl ọ ta, ‘Wha ruabọhọ oware nọ wha bi ru na, wha ku idhe emahọ rai kugbe idheidhe efa rai, re whai ọvo wha re iwo erao na.+
22 Keme evaọ ẹdẹ nọ mẹ rọ rehọ esẹ-esẹ rai no ẹkwotọ Ijipti ze, mẹ ta ẹme kẹ ae hayo jie uzi kẹ ae kpahe idhe emahọ gbe oghẹrẹ idheidhe efa ha.+
23 Rekọ uzi nana me jie kẹ ae: “Wha yoẹme kẹ urru mẹ, mẹ vẹ te jọ Ọghẹnẹ rai, wha vẹ te jọ ahwo mẹ.+ Yọ wha re koko uzi kpobi nọ me jie hrọ, re eware e ruẹse riẹ nya kẹ owhai.”’+
24 Rekọ a gaviezọ hayo fi ezọ rai hotọ họ;+ ukpoye, a je ru lele omaa* obọrai, be rọ udu ogaga lele udu umuomu rai, a te zihe kpemu,+ a kparo ho,
25 no anwọ ẹdẹ nọ esẹ-esẹ rai i ro no ẹkwotọ Ijipti ze rite ẹdẹ inẹnẹ na.+ Fikiere mẹ ruabọhọ je vi idibo mẹ kpobi eruẹaro na se owhai, me je dhe ai evievi, kẹdẹ kẹdẹ.*+
26 Rekọ a rọwo gaviezọ kẹ omẹ hẹ, yọ a fi ezọ rai hotọ họ.+ Ukpoye, a wo udu ogaga,* a te ru yoma vi esẹ-esẹ rai!
27 “Whọ te ta eme nana kpobi kẹ ae,+ rekọ a te gaviezọ kẹ owhẹ hẹ; who ti se ai, rekọ a te kpọ owhẹ unu hu.
28 Whọ te ta kẹ ae nọ, ‘Orẹwho nana họ onọ u yoẹme kẹ urru Jihova Ọghẹnẹ rai hi, a tẹ jẹ siọ ọwhọkuo. Ọtẹruo ọ gbẹ riẹ hẹ, yọ a be tubẹ fodẹ iẹe evaọ udevie rai hi.’*+
29 “Nware eto ra nọ i di fihọ thethei* na no re who gbolo ai kufiẹ, re whọ kpare ole uweri evaọ ehru ikpehru ivevẹ na, keme Jihova ọ se oge nana nọ o ru rie eva dha na no, yọ o ti gbabọkẹ ae.
30 ‘Keme ahwo Juda a ru oware nọ u yoma no evaọ aro mẹ,’ ere Jihova ọ ta. ‘A rehọ emedhọ etọtọ rai ro vi evaọ uwou nọ a rehọ odẹ mẹ se, re a ruẹsi zue uwou na.+
31 A bọ eria ikpehru Tofẹt, onọ o rrọ Ukiekpotọ Ọmọzae Hinọm,*+ re a ruẹse mahe emezae rai gbe emetẹ rai evaọ erae,+ oware nọ me jie uzi riẹ hẹ, yọ o re tubẹ ziọ omẹ udu vievie he.’*+
32 “‘Fikiere rri! edẹ e be tha,’ ere Jihova ọ ta, ‘nọ a gbe ti sei Tofẹt hayo Ukiekpotọ Ọmọzae Hinọm* ho, rekọ Ukiekpotọ Ikpakpe. A ti ki ahwo fihọ Tofẹt bẹsenọ oria ovo o gbe ti kiọkọ họ.+
33 Iri ahwo nana e te jọ emu rọkẹ evra obọ ehru* na jẹ rọkẹ erao otọakpọ na, yọ ohwo ọvo o ti le ai hi.+
34 Me ti ru edo evawere gbe edo oghọghọ serihọ, koyehọ edo uvou ọva gbe uvou ọmọtibobo,+ evaọ ikpewho Juda gbe evaọ iyẹrẹ Jerusalẹm, keme a te raha ẹkwotọ na fihọ otọ.’”+
Eme-Obotọ
^ Evaọ Hibru, “ena,” o be ta kpahe iwou kpobi nọ e rrọ etẹmpol na.
^ Hayo “emọ nọ i wo esẹ hẹ.”
^ Hayo “no ebẹdẹ rite ebẹdẹ.”
^ Hayo “ru iwiri idhe kuye.”
^ Evaọ Hibru, “mẹ jẹ riọ kpama jẹ ta ẹme kẹ owhai.”
^ Odẹ-ova ọghẹnẹ-aye nọ ahwo Izrẹl nọ a siọ orọwọ no a jẹ gọ; o sae jọ nọ ọghẹnẹ-aye nọ ọ rẹ wha ẹvi ze.
^ Hayo “bi ru eva dha; kpọ eva.”
^ Hayo “ohrẹ.”
^ Evaọ Hibru, “mẹ jẹ riọ kpama kẹdẹ kẹdẹ je vi ai.”
^ Evaọ Hibru, “a ru uriohọ rai kekeke.”
^ Evaọ Hibru, “a bru rie kufiẹ no unu rai no.”
^ Hayo “who ro mudhe.”
^ Hayo “o re ziọ omẹ iroro vievie he.”
^ Hayo “idhiwu.”
