Jerimaya 9:1-26
9 Dodokọ uzou mẹ yọ ẹtẹre-ame,Ibiaro mẹ kọ eyeri-ame irui-oviẹ!+
Mẹ hae te viẹ te aso te uvoFiki enọ a kpe evaọ udevie ahwo mẹ.
2 Dodokọ me wo oria nọ erara e rẹ kpahe evaọ udhude na!
Mẹ hae te nyasiọ ahwo mẹ ba, mẹ vẹ kẹ ae uvẹ lelele,Keme aikpobi yọ ibruẹnwae,+Utu ahwo nọ a re ru ẹghẹ.
3 A rẹ vẹ ẹrọo rai wọhọ uze;Ọrue họ oware nọ o da ẹkwotọ na fia, orọnikọ uzẹme he.*+
“A bi no eyoma ruọ eyoma,Yọ a be gaviezọ kẹ omẹ hẹ,”+ ere Jihova ọ ta.
4 “Jọ ohwo kpobi ọ yọroma kpahe ọrivẹ riẹ,Who tube fievahọ oniọvo ra ha.
Keme oniọvo kpobi yọ ohwo ovivie,+Yọ ọrivẹ kpobi yọ ohwo ọtaraha.+
5 Omomọvo ọ be wha ọrivẹ riẹ re,Yọ ohwo ọvo ọ be ta uzẹme he.
A wuhrẹ ẹrọo rai re ọ ta ọrue.+
A rẹ ruabọhọ ru oware nọ o thọ te epanọ oma o rẹ rọ rrọ ai no.
6 Whọ be rria udevie eviẹhọ.
A rọwo nọ a rẹ riẹ omẹ hẹ fiki eviẹhọ rai,” ere Jihova ọ ta.
7 Fikiere enẹ Jihova olori egbaẹmo ọ ta:
“Mẹ te ghra rai jẹ dawo ae,+Kọ eme ọfa mẹ rẹ sai gbe ru kẹ ọmọtẹ ahwo mẹ?
8 Ẹrọo rai yọ ose nọ o rẹ sae wha uwhu ze nọ o be ta eme eviẹhọ.
Ohwo ọ rẹ rehọ unu riẹ ta ẹme udhedhẹ kẹ ọrivẹ riẹ,Rekiyọ ọ jọ obeva bru ebe họ enu be hẹrẹ iẹe.”
9 “Kọ u gbe fo re mẹ rehọ ai guẹdhọ fiki eware nana?” ere Jihova ọ ta.
“Kọ u gbe fo re me* ru orẹwho utioye na kele?+
10 Mẹ te viẹ je bruenu fiki igbehru naJẹ kpare ole uweri fiki etọ nọ erao e rẹ jọ re ẹbe evaọ udhude na,Keme a mahe rai muotọ no, fikiere ohwo ọvo ọ be nya etẹe vrẹ hẹ,Yọ a bi yo edo erao ho.
Evra obọ ehru na avọ erao ẹwọ na e dhẹ no; e gbẹ riẹ hẹ.+
11 Me ti ru Jerusalẹm fihọ eria nọ a kwa itho kuku,+ eghogho nọ ikozi e rẹ jọ,+Yọ me ti ru ikpewho Juda fihọ ofofe, ohwo ọvo ọ gbẹ te rria ae eva ha.+
12 Ono o wo areghẹ te epanọ o re ro wo otoriẹ onana?
Ono unu Jihova o ta ẹme kẹ no, re ọ ruẹsi whowho iei?
Fikieme ẹkwotọ na ọ rọ raha no?
Fikieme ọ rọ to no wọhọ udhude na,Nọ ohwo ọvo ọ gbẹ be rọ nyae vrẹ hẹ?”
13 Jihova ọ tẹ kẹ uyo nọ: “Fikinọ a siọ uzi* mẹ nọ mẹ kẹ rai, gbe fikinọ a lele uzi na ha, yọ a yoẹme kẹ urru mẹ hẹ.
14 Ukpoye, a rọ udu ogaga lele udu obọrai,+ je lele emema Bale, wọhọ epanọ esẹ rai i wuhrẹ i rai nọ a ru.+
15 Fikiere enẹ Jihova olori egbaẹmo, Ọghẹnẹ Izrẹl ọ ta, ‘Rri, me bi ru ahwo nana re a re ẹbe ọyayare, yọ me ti ru ai da ame nọ a nua.+
16 Mẹ te vaha ae fihọ udevie erẹwho nọ ae omarai avọ esẹ rai a riẹ hẹ,+ yọ me ti vi ọgbọdọ ro le ai bẹsenọ me re kpe ai muotọ no.’+
17 Enẹ Jihova olori egbaẹmo ọ ta,‘Wha roro kpahe oware nọ o be via na.
Wha se eyae nọ e rẹ so ile uweri ze,+Re wha je vi uwou se eyae nọ i wo onaa ziezi re a nyaze,
18 Re a ruẹsi siawọ ze a ve mu ole enuobro họ ẹso kẹ omai,Re irui-oviẹ e ruẹsi su no ibiaro mai ze pata pata,Ame o ve bi su no ikpe-aro mai ze.+
19 Keme a jọ obọ Zayọn yo edo enuobro inọ:+
“Rri epanọ a raha omai muotọ no!
Omovuọ na o rro kẹhẹ!
Keme ma no ẹkwotọ na no, yọ a kporo iwou mai kuotọ no.”+
20 Whai eyae na, wha yo ẹme nọ Jihova ọ ta.
Jọ ẹme nọ o no unu riẹ ze ọ ruọ ezọ rai.
Wha wuhrẹ emetẹ rai enuobro nana,Re wha je wuhrẹ ohwohwo ole uweri nana.+
21 Keme uwhu o rehọ inwido mai ruọ eva no;O ruọ eva iwou ikpehru mai nọ e rẹ bẹ ẹvẹruọ noRe o rehọ emọ na no iyẹrẹ na no,Re o jẹ rehọ izoge emezae na no iko-ore na no.’+
22 Ta nọ, ‘Enẹ Jihova ọ ta:
“Iri ahwo e te vọ otọ wọhọ emaniọ nọ e rrọ otọ udhu,Wọhọ ekakọ nọ a bru fihọ otọ obọ nọ e rrọ uhie evaọ emu ọnọ o bi bru rai,Yọ ohwo ọvo ọ riẹ nọ o re koko ai họ họ.”’”+
23 Enẹ Jihova ọ ta:
“Jọ ohwo owareghẹ na ọ rehọ areghẹ riẹ seha ha;+Jọ ọgba na ọ rehọ ogaga riẹ seha ha;Yọ ajọ ọdafe na ọ rehọ efe riẹ seha ha.”+
24 “Rekọ jọ ọnọ o bi seha, ọ rehọ onana seha:
Inọ o wo otoriẹ udidi gbe eriariẹ kpahe omẹ,+Inọ mẹ họ Jihova, Ọnọ o bi dhesẹ uyoyou nọ o rẹ hiẹ hẹ, uvioziẹ, gbe ẹrẹreokie evaọ otọakpọ na,+Keme eware nana họ eware nọ e rẹ were omẹ,”+ ere Jihova ọ ta.
25 “Rri! Edẹ e be tha,” ere Jihova ọ ta, “nọ mẹ te rehọ ohwo kpobi nọ a yawo no rekiyọ ọ gbẹ rrọ ohwo nọ a yawo ho ro guẹdhọ,+
26 te Ijipti+ avọ Juda+ gbe Edọm+ avọ ahwo Ammọn+ gbe Moab,+ jegbe ahwo kpobi nọ a nware eto akotọ aruezo rai no nọ a be rria obọ udhude na;+ keme erẹwho na kpobi e yawo ho, yọ uwou Izrẹl soso o yawo evaọ udu hu.”+
