Job 41:1-34
-
Ọghẹnẹ o dhesẹ Levayatan nọ o wo idudu na (1-34)
41 “Kọ whọ sae rọ oghọlọ emeri ro mu Levayatan*+Hayo rọ ufi gba ẹrọo riẹ fihotọ?
2 Kọ whọ sae thọrọ ufi* nya ighogho-inwe riẹ vrẹHayo jẹ oghọlọ* họ agba riẹ?
3 Kọ ọ te lẹ owhẹ ẹlẹlẹ,Hayo kọ ọ te rọ unu kpotọ ta ẹme kẹ owhẹ?
4 Kọ o ti lele owhẹ re ọvọ,Re whọ rehọ iẹe ru ọrigbo ra evaọ edẹ uzuazọ riẹ kpobi?
5 Kọ whọ te rehọ iẹe zaharo wọhọ ọvraHayo thuru iei fihọ ufi kẹ emetẹ esese ra?
6 Kọ ethueki e te rọ eware rai ro nwene iei rehọ?
Kọ a te ghale iẹe fihọ udevie egba-ihreki?
7 Kọ whọ te rọ ogha* fi ohọroma riẹ soso+Hayo rehọ ọjọ* fi uzou riẹ?
8 Rọ obọ ra kpahe iẹe;Whọ te kareghẹhọ ohọre na, who gbe ti ru ei ofa ha!
9 Ẹruore kpobi nọ who wo inọ who ti fi ei kparobọ o te jọ ofofe.
Whọ tẹ ruẹ e riẹ ọvo, ozọ u ti mu owhẹ.*
10 Ohwo ọvo o re yiwi nyae rọwo iẹe he.
Kọ ono ọ rẹ sae rọ oma za omẹ?+
11 Ono ọ kake kẹ omẹ oware jọ no nọ mẹ rẹ hwa zihe kẹ?+
Oware kpobi nọ o rrọ otọ idhiwu na omẹ.+
12 Mẹ rẹ siọ ẹme ba ẹta kpahe abọ gbe awọ riẹ hẹ,Te ogaga riẹ gbe ugboma riẹ nọ a nabe riẹ ma ziezi na.
13 Ono o ku ohọrọ noi oma?
Ono ọ rẹ ruọ eva agba riẹ nọ ọ bẹre?
14 Ono ọ rẹ sae gbae họ rovie unu* riẹ?
Ibiakọ unu riẹ kpobi i re muozọ.
15 Uke riẹ u wo ihie egbẹ*Nọ e nabe tamu ohwohwo.
16 Aikpobi a nabe tamu ohwohwoTe epanọ uvumọ ofou ọ rẹ sae rọ ruọ eva rai hi.
17 E tamu omoma rai;E tamu ohwohwo gaga, a rẹ sae hẹriẹ ae he.
18 Ọ tẹ fiẹ inwe,* u re ru elo lo via,Yọ ibiaro riẹ e wọhọ elo oke nọ u bi rrie.
19 Elo egbrara i re no unu riẹ ze;Erae e rẹ la noi ze.
20 Iwiri i re kuye no ighogho-inwe riẹ ze,Wọhọ umuwou-erae nọ a rọ irihi koko erae họ.
21 Ẹwẹ nọ o ku ọ rẹ lẹliẹ iwowo-erae mi erae,Yọ erae i re hwẹ no unu riẹ ze.
22 Ẹgba ologbo ọ rrọ uriohọ riẹ,Udu u re no enọ i zere i rie kpobi awọ.
23 Eware nọ i ruru uwo-oma riẹ e tamu kothi;E tamu gaga wọhọ ẹsenọ a ghra rai fihọ oma riẹ, i re nuhu hu.
24 Ubiudu riẹ o rrọ gaga wọhọ utho,Ẹhẹ, o rrọ gaga wọhọ utho nọ a rẹ jọ wuhu eware.
25 Nọ ọ tẹ kpama, makọ egba dede a re guegue;Nọ o te bi fou kurẹriẹ, idudu e rẹ ruọ ohwo oma.
26 Ọgbọdọ ọvuọvo nọ o te rie nọ ọ rẹ ruọ oma riẹ ọ rrọ họ;Te ozuẹ, ododo, hayo ose.+
27 Ayọno ọ wọhọ ẹbe ọyaya kẹe,Ekọpa o wọhọ ure ugbogbo.
28 Ọ rẹ ruẹ ose dhẹ hẹ;Ibitho nọ a rehọ udeme fi i te tei oma e vẹ wọhọ ẹbe ọyaya.*
29 Ọkpọ* ọ wọhọ ẹbe ọyaya kẹe,Ọ tẹ ruẹ ozuẹ nọ a bi veghe, ọ vẹ hwẹ.
30 Okpeva riẹ o wọhọ ewẹ othẹ nọ e rrọ kpakre kpakre;Ọ rẹ rriẹ oma họ ọloho wọhọ ẹwẹ akpala nọ a re ro si ibi no igbe ekakọ.+
31 O re ru ame odidi na họrọ wọhọ uwho;O re gbudu abade na ku wọhọ uwho nọ a be jọ there udẹ.
32 Oria nọ ọ nyavrẹ u re lo nwranwranwra.
Ohwo o re roro nọ ame odidi na o wo eto efuafo.*
33 Oware ovo nọ o wọhọ e riẹ o rrọ otọakpọ na ha,Omama nọ a ma ozodhẹ kẹ hẹ.
34 O re dhe oware kpobi nọ u wo omorro ozẹro.
Ọye họ ovie evaọ usu erao idudu obọ ẹwọ na kpobi.”
Eme-Obotọ
^ O sae jọ nọ edhere.
^ Hayo “urihi.”
^ Evaọ Hibru, “odhigbo.”
^ Hayo “egha.”
^ Hayo “ozuẹ nọ a re ro kpe iyei.”
^ Hayo “who ti kie.”
^ Evaọ Hibru, “rovie ethẹ ovao.”
^ Hayo o sae jọ nọ, “Oware nọ u bi ru ei fu uke họ egbẹ riẹ nọ i dhe uhie họ na.”
^ Hayo “O te si inwe.”
^ Hayo “ebiesa.”
^ Hayo “Ọkpọkọlọ.”
^ Hayo “ọ dhẹ eza.”
