Job 7:1-21
7 “Kọ uzuazọ ohwo evaọ otọakpọ na o gbẹ wọhọ iruo ọgbahọ,Kọ edẹ riẹ e gbẹ wọhọ erọ ohwo nọ a rehọ iruo?+
2 Wọhọ ọrigbo, o bi rẹro eriosehọ* gaga,Wọhọ ohwo nọ a rehọ iruo, ọ be hẹrẹ osa riẹ.+
3 Fikiere a kẹ omẹ emerae erọ uye-oruẹ kufiẹYọ a kẹ omẹ eso buobu nọ mẹ rẹ rọ reakọ.+
4 Nọ me te kiẹzẹ mẹ vẹ be nọ nọ, ‘Oke vẹ mẹ te kpama?’+
Rekọ nọ oke o gbẹ be rọwo ke he, mẹ vẹ be thuẹ be rova bẹsenọ oke o rẹ ke.*
5 Ihoi gbe okpa iluhu e vọ omẹ oma;+Emela nọ e va fihọ gbe eruẹso nọ e ruọ ori no e vọ ohọroma mẹ.+
6 Edẹ mẹ e be dhẹ vẹrẹ vi ọkpọ nọ a whaliẹ ufi fihọ bi ro zuo eware,+Yọ i ti kuhọ ababọ ẹruore.+
7 Kareghẹhọ nọ uzuazọ mẹ yọ ofou,+Inọ ubiẹro mẹ o gbẹ te ruẹ evawere* ofa ha.
8 Ubiẹro nọ o be ruẹ omẹ enẹna o gbẹ te ruẹ omẹ ofa ha;Ibiaro rai e te gwọlọ omẹ, rekiyọ mẹ nyavrẹ no.+
9 Wọhọ ẹgho nọ ọ rẹ hiẹ jẹ rayẹ no,Ọnọ o bi kpobọ Uki* o re gbe zihe ze he.+
10 Ọ rẹ gbẹ wariẹ zihe kpobọ uwou riẹ hẹ,Yọ a gbẹ te ruẹ e riẹ evaọ oria riẹ ofa ha.*+
11 Fikiere me ti ruru unu mẹ hẹ.
Mẹ te rehọ evedha mẹ ta ẹme;Mẹ te rehọ idhọvẹ egaga nọ e rrọ omẹ oma* ta ẹme!+
12 Kọ mẹ yọ abade hayo arao ologbo obọ abade,Nọ who bi ro fi umuo họ kẹ omẹ?
13 Nọ mẹ tẹ ta nọ, ‘Ehwa mẹ e te sasa omẹ oma;Gbe nọ ehwa mẹ i ti ru oma voro omẹ omojọ,’
14 Whọ vẹ rọ ewezẹ ru ozọ mu omẹJẹ rọ eruẹaruẹ fi idudu họ omẹ oma,
15 Re mẹ* salọ nọ mẹ rẹ seba ẹwẹ,*Ẹhẹ, uwhu viukpọ ugboma mẹ nana.*+
16 Uzuazọ mẹ o vẹso omẹ no;+ mẹ gwọlọ gbẹ jọ uzuazọ họ.
Kẹ omẹ uvẹ, keme edẹ mẹ e wọhọ ẹwẹ nọ a ku.+
17 Eme ohwo-akpọ ọ rrọ nọ who je bi fiẹrohọ iẹeNọ whọ jẹ tẹrovi ei?*+
18 Fikieme who bi ro rri rie kohiohiẹ kohiohiẹNọ whọ be rọ dawo iẹe evaọ oke kpobi?+
19 Kọ who gbe si ẹro ra no omẹ re who rri obọfa?Kọ whọ gbẹ kẹ omẹ uvẹ kri te epanọ me re ro si eya lọ?+
20 Otẹrọnọ mẹ raha uzi, ẹvẹ mẹ sae rọ nwa owhẹ oma, whẹ Ọnọ o bi muẹrohọ ahwo-akpọ?+
Fikieme whọ jẹ rọsuọ omẹ?
Kọ me zihe ruọ owha kẹ owhẹ no?
21 Fikieme whọ gbẹ rọ iruthọ mẹ vrẹ omẹ hẹJẹ kpairoro vrẹ uzioraha mẹ hẹ?
Keme kẹle na me ti kiẹzẹ evaọ ẹkpẹ,+Whọ te gwọlọ omẹ, rekiyọ mẹ nyavrẹ no.”
Eme-Obotọ
^ Hayo “ekuhọ iruo okpẹdoke riẹ.” Evaọ Hibru, “uwoho.”
^ Hayo “bẹsenọ oke u re rrie.”
^ Evaọ Hibru, “ruẹ ewoma.”
^ Hayo “Oria riẹ o gbẹ te riẹe he.”
^ Hayo “ẹwẹ mẹ o re bru dhe.”
^ Evaọ Hibru, “viukpọ igbenwa mẹ.”
^ Evaọ Hibru, “gale udu ra vi ei?”
