Job 8:1-22
8 Bildad+ ohwo Shuah+ na ọ tẹ kpahe kẹe nọ:
2 “Ẹvẹ whọ te ta ẹme enẹ kri te?+
Eme nọ i bi no unu ra ze yọ ofou ọgaga!
3 Kọ Ọghẹnẹ ọ rẹ siọ oziẹ okiẹrẹe ba ebru,Hayo kọ Erumeru na ọ rẹ siọ oware nọ u kiẹrẹe ba eru?
4 Otẹrọnọ emezae ra a raha uzi riẹ,Ọ kuvẹ re uye u te ai fiki ọkparesuọ rai;*
5 Rekọ otẹrọnọ who re bo se Ọghẹnẹ+Jẹ lẹ Erumeru na inọ o rri owhẹ aro,
6 Yọ otẹrọnọ whọ ginẹ fo je kiete,+Ọ te gaviezọ kẹ owhẹ*Je zihe owhẹ ziọ epanọ whọ jọ vẹre.
7 Yọ dede nọ eware nọ who wo evaọ emuhọ i tulo ho,Akpọ ra o ti woma gaga evaọ obaro.+
8 Ivie, nọ mi oge nọ ọ vrẹ,Re whọ jẹ gaviezọ kẹ eware nọ esẹ rai a ruẹ vuhumu.+
9 Keme odẹnukpo gheghe a yẹ omai, yọ ma riẹ oware ovo ho,Edẹ uzuazọ mai evaọ otọakpọ na e wọhọ uwoho.
10 Kọ a gbẹ te vuẹ owhẹ oware nọ who re ruJẹ ta oware nọ a riẹ kẹ owhẹ?*
11 Kọ papirọs* ọ rẹ rro kpehru ziezi evaọ oria nọ o rrọ ameame he?
Kọ ukpoko o rẹ rro kpehru ziezi ababọ ame?
12 Nọ ọ gbẹ rrọ ọboba* na, nọ a re nawo iẹe he na,O vẹ te kake rehọ ebe efa whu no.
13 Enẹ ahwo kpobi nọ a kiukeku Ọghẹnẹ a re ro ku uzuazọ rai họ,*Keme irẹro ahwo nọ a be gọ Ọghẹnẹ hẹ* i re rugba ha,
14 Enọ evaifihọ rai o rrọ uvrẹvruEnọ ẹruọrọsuọ rai ọ rrọ deghe deghe wọhọ uwou aruẹ.*
15 Ọ te roma rẹrẹ uwou riẹ, rekọ u ti dikihẹ kri hi;Ọ te gwọlọ gbe kru rie, rekọ u ti kri ẹraha ha.
16 Ohwo yena yọ ẹbe nọ ọ rrọ vuavo nọ ọ rrọ uvo,Nọ egha riẹ e za fihọ evaọ ọgbọ na.+
17 Awọ riẹ i thuru ohwohwo evaọ otọ itho nọ a kwa koko,Ọ be gwọlọ uwou evaọ udevie itho.*
18 Rekọ nọ a te vi ei* no oria riẹ no,Oria yena o vẹ te se iẹe inọ, ‘Mẹ re ruẹ owhẹ ẹdẹvo ho.’+
19 Nwanọ ere o ti ro whu;*+Kẹsena efa i ve ti no otọ ze.
20 Evaọ uzẹme, ohwo nọ o kru ẹgbakiete riẹ,* Ọghẹnẹ ọ rẹ se iẹe he;Yọ o re fiobọhọ kẹ* ahwo omuomu hu,
21 Keme o ti ru re ehwẹ e jọ owhẹ unu ẹsikpobiJe ru re who bo ubo oghọghọ ẹsikpobi.
22 A ti ku omovuọ họ oma enọ i bi mukpahe owhẹ wọhọ ewu,Yọ uwou-udhu ahwo omuomu o gbẹ te jọ họ.”
Eme-Obotọ
^ Evaọ Hibru, “O vi rai bru obọ ọkparesuọ rai.”
^ Hayo “Ọ te kpama fiki ra.”
^ Evaọ Hibru, “Jẹ rehọ eme lahwe no udu rai ze?”
^ Hayo “be whẹ ivo họ.”
^ Evaọ Hibru, “Enẹ idhere ahwo kpobi nọ a kiukeku Ọghẹnẹ e rẹ jọ.”
^ Hayo “ọnọ ọ siọ orọwọ na no.”
^ Hayo “aruẹ nọ adhalolo hayo okigwe ọ bọ.”
^ Hayo “O bi rri uwou nọ a rọ itho bọ.”
^ Hayo “a tẹ lọe.”
^ Hayo “ere edhere riẹ o te rọ raha kufiẹ.”
^ Hayo “ohwo nọ ọ kare afuẹwẹ.”
^ Evaọ Hibru, “o re kru obọ.”
