Usi Uwoma Mak 12:1-44
12 Kẹsena o te mu etadhesẹ họ ẹrọ ta ẹme kẹ ae, inọ: “Ọzae jọ ọ kọ ọgbọ evaene+ je di ogba wariẹe họ, yọ ọ tọ ọgọdọ udi-uruo fihọ iẹe, ọ tẹ jẹ bọ uwou ukpehru fihọ iẹe;+ ọ tẹ rehọ iẹe kẹ enọ e rẹ rẹrotei, o te kpohọ erẹ evaọ orẹwho ọfa.+
2 Nọ ezi nọ ibi na e rẹ rọ ware u te, o te vi ọrigbo jọ bru enọ e be rẹrote ọgbọ na re a kọrọ ibi ọgbọ evaene na jọ sei.
3 Rekọ a te kru ei, a te kpei, a te vi ei zihe ababọ.
4 Ọ tẹ wariẹ vi ọrigbo ọfa bru ai, a tẹ rọ eware fae uzou je ru ei oma vo.+
5 O te je vi ọfa, a te kpe ọyena whu, gbe efa buobu nọ o vi, a kpe ejọ ukpe igbabọ, a kpe ejọ whu.
6 Ọvo jọ o gbe kiọkọ nọ o wo, ọmọzae oyoyou riẹ.+ Ọye o vi se ae whremu, inọ, ‘A te rọ adhẹẹ kẹ ọmọzae mẹ.’
7 Rekọ enọ e be rẹrote ọgbọ na a tẹ be ta kẹ omoma rai nọ, ‘Ọnana họ ọreuku na.+ Wha nyaze ma kpei no, ukuoriọ na o vẹ te jọ omai.’
8 Fikiere a te kru ei, a te kpei no, a te gbolo iei fihọ otafe ọgbọ evaene na.+
9 Kọ eme ọnọ o wo ọgbọ evaene na o ti ru? Ọ te nyaze, o ve kpe enọ e be rẹrote ọgbọ na no, ọ vẹ rehọ ọgbọ evaene na kẹ amọfa.+
10 Kọ wha ri se ikereakere nana: ‘Utho nọ ebebabọ na e se, oye u zihe ruọ utho ubienẹ nọ o mai wuzou* no na.+
11 Obọ Jihova* onana u no ze, yọ u woma gaga evaọ aro mai’?”+
12 Fikiere a tẹ gwọlọ nọ a re kru* ei, rekọ a dhozọ ogbotu na, keme a riẹ nọ ae omarai o wo họ iroro nọ ọ rọ rehọ ọtadhesẹ na ta ẹme na. A tẹ nyavrẹ se iẹe ba.+
13 Kẹsena a te vi otu Farisi gbe ahwo utu Herọd jọ bru ei re a ruẹse rọ ẹmeunu riẹ kru ei.+
14 Nọ a te etẹe, a tẹ ta kẹe nọ: “Owuhrẹ, ma riẹ nọ whọ rẹ ta uzẹme, yọ who re ru eware rọ gwọlọ aruoriwo ohwo ọvo ho, keme who re rri oghẹrẹ nọ ahwo a rrọ evaọ okafe he, rekọ who re wuhrẹ edhere Ọghẹnẹ wọhọ epanọ uzẹme na o rrọ. Kọ u fo* re a hwa osa-uzou kẹ Siza manikọ u fo ho?
15 Kọ u fo re ma hwa, manikọ u fo nọ ma rẹ hwa ha?” Nọ o muẹrohọ nọ onọ eviẹhọ a be nọ na, ọ tẹ ta kẹ ae nọ: “Emejabọ wha be rọ dawo omẹ? Wha rehọ dinariọs* se omẹ re me rri.”
16 A tẹ rehọ ọjọ ze, ọ tẹ nọ ae nọ: “Nọ uwoho gbe odẹ ono?” A tẹ ta kẹe nọ: “Erọ Siza.”
17 Jesu ọ tẹ ta nọ: “Wha hwa eware Siza zihe kẹ Siza,+ rekọ eware Ọghẹnẹ kẹ Ọghẹnẹ.”+ Eme riẹ i te gbe ai unu.
18 Whaọ otu Sadusi, enọ e rẹ ta nọ ẹkparomatha ọ rrọ họ+ a tẹ nyaze, a tẹ nọe nọ:+
19 “Owuhrẹ, Mosis o kere kẹ omai nọ otẹrọnọ oniọvo ohwo jọ o whu siọ aye ba yọ o yẹ ọmọ họ, oniọvo riẹ ọ rẹ rehọ aye na re ọ ruẹsi yẹ ọmọ kẹ oniọvo riẹ nọ o whu no na.+
20 Inievo ihrẹ jọ e jariẹ. Ọrọ ọsosuọ o wo aye, rekọ o te ti whu siọ aye na ba ababọ ọmọ nọ a yẹ.
21 Ọrọ avọ ivẹ ọ tẹ rehọ aye na, rekọ o te je whu siọ aye na ba ababọ ọmọ, ere ọvona o via kẹ ọrọ avọ esa re.
22 Ere inievo ihrẹ na kpobi i ro whu ababọ ọmọ. Ukuhọ riẹ, aye na o te whu re.
23 Evaọ ẹkparomatha na, aye ono ọ te jọ? Keme ọ jọ aye kẹ inievo ihrẹ na.”
24 Jesu ọ tẹ ta kẹ ae nọ: “Kọ ogbẹrọnọ fiki onana wha bi ro roro thọ na, keme wha riẹ Ikereakere na gbe ogaga Ọghẹnẹ hẹ?+
25 Keme okenọ a te kparoma no uwhu ze, ezae i ti wo eyae he, yọ a te rọ eyae kpohọ orọo ho, rekọ a te jọ wọhọ ikọ-odhiwu.+
26 Rekọ kpahe enọ i whu no na nọ a te kpare ze, kọ wha gbe ri se evaọ iku nọ Mosis o kere kpahe ure inwe nọ erae e jẹ jọ ware na, nọ Ọghẹnẹ ọ ta kẹe nọ: ‘Mẹ họ Ọghẹnẹ Abraham gbe Ọghẹnẹ Aiziki gbe Ọghẹnẹ Jekọp’?+
27 Ọ rrọ Ọghẹnẹ enọ i whu no ho, rekọ ọrọ enọ e rrọ uzuazọ. Wha bi roro thọ gaga.”+
28 Omọvo otu ikere-obe na jọ nọ ọ nyaze nọ o yo avro nọ a jẹ vro na, nọ ọ ruẹ nọ Jesu ọ kẹ rai uyo evaọ emamọ edhere, ọ tẹ nọe nọ: “Ujaje vẹ họ orọ ọsosuọ* kpobi?”+
29 Jesu ọ tẹ kẹ uyo nọ: “Orọ ọsosuọ họ, ‘Gaviezọ, O Izrẹl, Jihova* Ọghẹnẹ mai yọ Jihova* ọvo,
30 yọ whọ rẹ rehọ udu ra kpobi gbe uzuazọ* ra kpobi gbe iroro ra kpobi gbe ẹgba ra kpobi ro you Jihova* Ọghẹnẹ ra hrọ.’+
31 Orọ avọ ivẹ ona, ‘Who re you ọrivẹ ra wọhọ omobọ ra hrọ.’+ Ujaje ofa nọ o rro vi enana o rrọ họ.”
32 Okere-obe na ọ tẹ ta kẹe nọ: “Owuhrẹ, whọ riẹ ta, wọhọ epanọ uzẹme na o rrọ, ‘Ọvo ọ rrọ, yọ u te noi no ọfa ọ rrọ họ’;+
33 yọ re ohwo ọ rehọ udu riẹ kpobi, iroro* riẹ kpobi, gbe ẹgba riẹ kpobi ro you rie, je you ọrivẹ riẹ wọhọ omobọ riẹ u wuzou vi idhe emahọ gbe idheidhe kpobi.”+
34 Fikiere nọ Jesu ọ ruẹ nọ ọ kpahe emamọ ẹme, ọ tẹ ta kẹe nọ: “Who thabọ no Uvie Ọghẹnẹ hẹ.” Rekọ ohwo ọvo ọ gbẹ sae gbaudu nọe onọ ofa ha.+
35 Rekọ epanọ Jesu o gbe bi ro wuhrẹ evaọ etẹmpol na, ọ tẹ ta nọ: “Ẹvẹ otu ikere-obe na a rọ ta nọ Kristi yọ ọmọzae Devidi?+
36 Devidi omariẹ ọ rọ ẹkwoma ẹzi ọfuafo+ na ta nọ, ‘Jihova* ọ ta kẹ Olori mẹ nọ: “Keria obọze mẹ bẹsenọ me re fi ewegrẹ ra họ otọ awọ ra.”’+
37 Devidi o se rie Olori, kọ ẹvẹ ọ sae rọ rrọ ọmọzae riẹ?”+
Yọ ogbotu na a be gaviezọ kẹe avọ evawere.
38 Nọ o bi wuhrẹ na ọ tẹ ta nọ: “Wha yọroma kẹ otu ikere-obe na nọ e rẹ gwọlọ ku iwu ithethei họ rọ nya wariẹ jẹ gwọlọ nọ ahwo a yere ai evaọ eria eki+
39 jẹ keria egbara obaro* evaọ isinagọgo* gbe eria nọ e mai kpehru evaọ ehaa.+
40 A rẹ re uvuhu họ eyae-uku oma,* jẹ lẹ elẹ ithethei ro dhesẹ oma. Ahwo nana a ti wo obrukpe nọ ọ mae ga.”*
41 Ọ tẹ keria oria nọ ọ be jọ ruẹ itehe okẹ unevaze na,+ o te bi rri epanọ ogbotu ahwo na a bi ro fi igho họ itehe na, yọ edafe buobu i je fi ibiugho buobu họ.+
42 Aye-uku oyogbe jọ ọ tẹ nyaze o te fi ibiugho esese ivẹ họ, enọ i wo emamọ aghare ọvo ho.*+
43 Fikiere o te se ilele riẹ, ọ tẹ ta kẹ ae nọ: “Uzẹme mẹ be ta kẹ owhai inọ aye-uku oyogbe nana o fihọ bu vi ahwo nọ i kiọkọ kpobi nọ a fi igho họ itehe okẹ unevaze na.+
44 Keme evaọ usu enọ e da rai obọ fia aikpobi na a jọ rehọ ze ti fihọ, rekọ aye nana, avọ uvuhu nọ o riẹe oma, o ro fi onọ o wo kpobi họ, onọ o wo kpobi evaọ uzuazọ riẹ.”+
Eme-Obotọ
^ Evaọ Griki, “uzou ubienẹ.”
^ Rri Ẹme-Ofiba A5.
^ Hayo “mu.”
^ Hayo “kiehọ.”
^ Rri Ẹme-Ofiba B14.
^ Hayo “o mai wuzou.”
^ Rri Ẹme-Ofiba A5.
^ Rri Ẹme-Ofiba A5.
^ Rri Ẹme-Ofiba A5.
^ Koyehọ, ẹgba otoriẹ.
^ Rri Ẹme-Ofiba A5.
^ Hayo “nọ e mai woma.”
^ Hayo “iwou-egagọ.”
^ Evaọ Griki, “A rẹ re iwou eyae-uku muotọ.”
^ Hayo “nọ o mae gbẹdẹ.”
^ Evaọ Griki, “lẹpta ivẹ, koyehọ, kwọdrans.” Rri Ẹme-Ofiba B14.
